Thursday, January 29, 2009

මගේ විනෝදාංශය

අද මට හිතුන මගේ විනෝදාංශය ගැන බ්ලොග් සටහනක් ලියන්න.ඔන්න ඉතින් මගේ විනෝදාංශය තමයි movies එකතු කරන එක.අද ඔන්න 600 වෙනි එකත් එකතු කලා.

වැඩියෙන්ම මම බලන්න කැමති හිංදි චිත්‍රපටි.ඊට පස්සෙ ඉංග්‍රීසි චිත්‍රපටි.ඒත් ඉතින් මගෙ ගාව වැඩියෙන් තියෙන්නෙ නම් ඉංග්‍රීසි චිත්‍රපටි.තව සිංහල චිත්‍රපටි කීපයකුත් තියෙනව.

මගේ මේ චිත්‍රපටි එකතු කරන වැඩේ පටන් ගත්තෙ ගිය අවුරුද්දෙ ඉදල.මුලින්ම මිලදී ගන්න ගියෙ බම්බලපිටියෙ Eagle එකට.එතන DVD එකක් රු.80ක් නිසා ඉස්සර හැමදාම වගේ ගෙදර යනකොට DVD එකක් අරගෙන යන්න අමතක කරන්නෙ නැහැ.ඒත් දැන් නම් ගන්නෙ වෙන තැන් වලින්.

මම චිත්‍රපටි ගන්න කොට ගොඩක් වෙලාවට බලන්නෙ මම ආස කරන නිළියක් ඒකෙ රගපානවද කියල.මම කැමති නිළියො දෙන්න තමයි Kate Winslet හා Angelina Jolie.Kateගෙ Titanic වලට පස්සෙ ආපු හැම චිත්‍රපටියක්ම වගේ එකතු කරල තියෙනව.වෙන මොන නිසාවත් නෙමේ.Kate මගේ ප්‍රියතම නිළිය නිසා.Titanic, Holy Smoke, Romance & Cigarettes, Little Children, The Holiday, Revolutionary Road මේ චිත්‍රපටි ටික තමයි මට හිතෙන විදිහට Kateගෙ හොදම චිත්‍රපටි ටික.ඒ වගේම Angelina Jolieගෙ Gia, Gone in Sixty Seconds, Original Sin, Beyond Borders, Mr. & Mrs. Smith, A Mighty Heart, Wanted, Changeling කියන චිත්‍රපටි වලට ආසයි.

හිංදි චිත්‍රපටි වලින් වැඩියෙන්ම කැමති Fashion, Bachna Ae Haseeno, Om Shanti Om, Chak De India, Taare Zameen Par, Bhool Bhulaiyaa, Fanaa කියන චිත්‍රපටි වලට.Fashion තමයි ආසම හිංදි movie එක.

මුලින් මුලින් චිත්‍රපටි download කලත්, පස්සෙ ඒත් එක්ක සමහර වෙලාවට නොමිලේම එන virus නිසා download කරන එක එපා වුනා.ඒ නිසා දැන් නම් සල්ලි දීල තමා ගන්නෙ.ඒත් දැන් නම් චිත්‍රපටි බලන්න වෙලාවක් හොයා ගන්න තියෙන අමාරුව නිසා දැන් නම් මිලදී ගන්නෙ කලාතුරකින්.

සිංහල චිත්‍රපටි වල මිල වැඩි නිසා මිලදී ගන්නෙ නම් කලාතුරකින්.ඒත් දැන් අඩුවට මිලදී ගන්න තැනක් හම්බවෙච්ච නිසා දැන් සිංහල චිත්‍රපටිත් එකතු කරනව.සිංහල චිත්‍රපටි වලින් නම් ආස මචං, අබා, නිධානය හා සරුංගලය කියන චිත්‍රපටි වලට.ලගදිම ලීඩර් බලන්න යන්නයි හිතාගෙන ඉන්නෙ.තාම වෙලාවක් ලැබුනෙ නැති නිසා යන්න බැරි වුනා.රන්ජන්ගෙ පාර්ලිමන්ට් ජෝක්ස්-1 වලට නම් මම වැඩිය කැමති නැහැ.ඒත් වන් ෂොට් වන් වලට නම් මම කැමතියි.

මේව ඇරෙන්න මම බලපු ඒවයින් ආසම චිත්‍රපටි තමයි Basic Instinct, Basic Instinct 2, Hotel Rwanda, Catch Me If You Can, 13 Going On 30, Sense and Sensibility, The Sleeping Dictionary, Mean Girls, Material Girls, Awake, Border Town, Eurotrip, The Eye කියන ඒව.

දැන් ඉතින් ඇතියි කියල හිතෙනව මගේ මේ විනෝදාංශය ගැන ලියපු ටික.හෙට මම ඉගෙන ගන්න ශ්‍රී ලංකා තොරතුරු තාක්ෂණ ආයතනයේ 2009 වසරට අලුතින් බදව ගත්ත ශිෂ්‍යයින් හට දෙන Freshers Day එකත් පැවැත්වෙනව.හෙට ඒකටත් යන්න ඕන.ඒ වගේම තමයි මගේ ජීවිතයේ මුහුන දෙන පලවෙනි සම්මුඛ පරීක්ෂණය යෙදිල තියෙන්නෙත් හෙට.Dialog වල තමා තියෙන්නෙ.මොනව අහයිද දන්නෙත් නැහැ.රස්සාව ලැබුනත්, නැතත් ඕන දෙයක් වෙන්න ගිහින් බලනව.තාම මට දරු පවුලක් නෑනෙ නඩත්තු කරන්න.ඒත් ඉතින් ඊට වඩා වියදමක් යනව පෙම්වතියගෙ අවශ්‍යතාවලට.ඒ නිසයි දැන්මම රස්සාවකට යන්න කියල හිතුවෙ.

ගිහින් එන්නම්.හැමෝටම ජය වේවා!!!!

Monday, January 19, 2009

රාජ්‍ය නොවන සංවිධාන හා අන්‍යාගම්කරණය

අද දෙරණ රූපවාහිනී සේවයේ ගිය ප්‍රවෘත්තියක් දැකලයි මේ බ්ලොග් සටහන ලියන්න හිතුනෙ.ප්‍රවෘත්තියෙ තිබ්බෙ රාජ්‍ය නොවන සංවිධාන ගැන පත් කරපු පාර්ලිමේන්තු කාරක සභාවේ වාර්තාවක් ගැන.

මෙම වාර්තාවේ දැක්වෙන ආකාරයට ලංකාවේ බොහෝ ප්‍රදේශවල ක්‍රියාත්මක වෙන රාජ්‍ය නොවන සංවිධාන මගින් කරන ප්‍රධානම කාර්යය වන්නේ දුප්පත් ජනතාවට මුදල් හා වෙනත් ද්‍රව්‍යමය ආධාර දී ඔවුන් වෙනත් ආගම් වලට හරවා ගැනීමයි.මෙම අන්‍යාගම්කරණය බොහෝ විට යුද්ධය පවතින ප්‍රදේශ ආශ්‍රිතව සිදුවන අතර අනෙක් ප්‍රදේශ වලද තවමත් නිදහසේ කරගන යනු ලබනවා.විශේෂයෙන් යුද්ධය පවතින ප්‍රදේශවල ජීවත්වන හිංදු ආගම අදහන ජනතාවත්, අනෙක් ප්‍රදේශවල බෞද්ධයන් ඉලක්ක කර ගෙනත් මෙම අන්‍යාගම්කරණය සිදු කර ගෙන යනු ලබනවා.

නමුත් මෙම දුප්පත් ජනතාවට සම්පූර්ණ වැරැද්දේ බර පැටවීමෙන්ද වැඩක් නැත.මන්ද ඔවුන් වෙනත් ආගමකට යන්නේ ඔවුන්ට ලැබෙන ප්‍රතිලාභ සලකා බලා නිසාය.එදා වේල කන්න නැති, හරි හමන් රස්සාවක් නැති අයකු හට මුදල් දුන් විට වෙනත් ආගමක් ඇදහීමට ඔහු අනිවාර්යයෙන්ම පෙලබෙනවා ඇත.

එසේම මෙම රාජ්‍ය නොවන සංවිධාන අප රටෙහි පාසල් විෂයයන්ද වෙනස් කිරීමට පටන් ගෙන ඇති බව මෙම ප්‍රවෘත්තියෙහි සදහන් විය.මෙසේ අප රටෙහි අධ්‍යාපන විෂය ක්ෂේත්‍රයට අත ගැසීමට ඔවුන්ට අයිතියක් තිබේද යන්නත් බරපතල ගැටලුවකි.එසේම මොවුන් අප රටෙහි ඉතිහාසය විකෘති කොට පාසල් විෂය පද්ධතියට ඇතුලු කර තිබුනද ඒ ගැන පුදුම විය යුතු නැත.

එමෙන්ම මොවුන් කොටි ත්‍රස්තවාදීන් හටද උදවු දුන් බව ඕනෑම කෙනෙක් දන්නා කාරණාවකි.ඔවුන්ගේ කුරුම්බැට්ටි ගුවන් යානා සෑදීමටද, කොටි ගුවන් විදුලියට අවශ්‍ය උපකරණ ලබා දීමටද මොවුන් කටයුතු කර ඇත.එමෙන්ම මොවුන් කොටි පාලන ප්‍රදේශවල සිට පැමිණීමේදී මොවුන් සතු රථ වාහන, පරිගණක හා අනෙකුත් ද්‍රව්‍ය කොටි සංවිධානයට ලබා දී පැමිණි බවද ඕනෑම කෙනෙකු දන්නා කරුණකි.

එමෙන්ම මොවුන්ගේ ක්‍රියාවලට විරුද්ධව වැඩ කරන පුද්ගලයින් අභිරහස් ලෙස ඝාතනයටද ලක් වේ.පූජ්‍ය ගංගොඩවිල සෝම හිමියන් මෙයට නිදසුනකි.මහාචාර්ය සේනක බිබිලේ මහතා තවත් නිදසුනකි.

අවසාන වශයෙන් කිව යුත්තේ අප මෙම රාජ්‍ය නොවන සංවිධානවලට බිය වී කටයුතු කිරීම දැන් අවසන් කල යුතු බවය.නමුත් අප තවමත් සංවර්ධනය වන රටක් නිසා මෙවැනි සංවිධාන වලින් අවශ්‍ය තාක්ෂණික දැනුම ආදිය ලබා ගත්තාට වැරැද්දක් නොමැත.නමුත් ඔවුන් අන්‍යාගමකරණය හා ත්‍රස්තවාදීන්ට උදවු දීම වැලකිය යුතුය.

Wednesday, January 14, 2009

Well done Bangladesh



බංග්ලාදේශය හා ශ්‍රී ලංකාව අතර පැවතිච්ච එක් දින තරගය ඉවර වෙච්ච ගමන්මයි මේ සටහන ලියන්නෙ.වෙන මොකකටවත් නෙමේ.හිතේ තියෙන සතුටට.

අවුරුදු කීපයක් අධ්‍යාපනය ලබපු රට දැන් ලබල තියෙන දියුණුව දැක්කම ඇතිවෙන සතුට වචන වලින් කියන්න බැහැ.ඒත් ලංකාව පරාජය ලැබුවම සියුම් දුකකුත් හිතේ ඇති වුනා.ඒත් බංග්ලාදේශය අවුරුදු කීපයක් තුල ලබා ඇති දියුණුව දැක්කම ඊටත් වඩා සතුටක් හිතේ ඇති වෙනව.

වෙනම සංස්කෘතියක්, වෙනම භාෂාවක්, වෙනම ආගමක් අදහන රටක ලබපු අත්දැකීම් ජීවතය ගොඩ නගා ගන්න උදව් වුනා.නමුත් ඔවුන් කිසි දිනෙකත් අපට අනෙකුත් විදේශිකයන්ට සලකන ආකාරයට සැලකුවෙ නැහැ.ලාංකිකයන් හට ඉතාමත් උසස් ලෙස සලකන එකම රට විදිහට කියන්න පුලුවන් බංග්ලාදේශය විතරයි.එසේ වී ඇත්තේ බංග්ලාදේශයේ බොහෝ උසස් රැකියාවල තනතුරු හොබවන්නේ ලාංකිකයන් වීම නිසා.

නමුත් ඔවුන් ලංකාවට වඩා ඉතා සීග්‍ර දියුණුවක් ලබමින් තියෙනව.ස්වභාවික විපත් නැත්නම් ඔවුන් ආසියාවේ ඉතාමත් දියුණු රටක් බවට දැනටමත් පත් වී හමාරයි.

මෙම එක් දින තරගාවලියේ අවසන් තරගයේ ජයත් බංග්ලාදේශ කණ්ඩායමට ලැබේවායි පතමින් මේ සටහන නිමා කරනවා.

Monday, January 12, 2009

2009 දෙවන බ්ලොග් සටහන

ජනවාරි පළවෙනිද තමයි මේ අවුරුද්දෙ පලවෙනි බ්ලොග් සටහන දැම්මෙ.ඊට පස්සෙ ලියන පළවෙනි බ්ලොග් සටහන තමා මේක.

පහුගිය දින කීපයෙදිම අපේ හමුදාව විශාල ජයග්‍රහණ ප්‍රමාණයක් ලැබුව.කිළිනොච්චි, අලිමංකඩ ත්‍රස්තවාදීන්ගෙන් මුදවා ගත්ත.දැන් තියෙන්නෙ ඉතුරු ප්‍රදේශ ටිකත් අල්ලගෙන යුද්ධය නිමා කරන එකයි.නමුත් හමුදාව ජයග්‍රහණය ලබන කොට රතිඤ්ඤා පත්තු කරපු එකට වඩා ඒ මුදල් වලින් රණවිරුවන් හට නිවාස තනා දුන්න නම් හොදයි කියලයි මට නම් හිතුනෙ.ඒ වගේම ආබාධිත රණවිරුවන්හටත්, රණවිරු පවුල් වල දරුවන්ගේ අධ්‍යාපනය වෙනුවෙනුත් යමක් කලා නම් හොදයි කියලයි මට නම් හිතුනෙ.අපි ඉපදෙන කොටත් යුද්ධය තිබ්බ.ඒත් මේ යුද්ධය අපේ ඉදිරි පරම්පරාවට දායද නොකිරීමට පාලකයන් ක්‍රියා කල යුතුයි.

ඊට පස්සෙ ඉතින් සිරස මාධ්‍යය ජාලයට පහර දීපු එක නම් අනුමත කරන්න බැහැ.ඔවුන් කරන හැම දේම 100%ක් අනුමත කරන්න බැරි උනත් මාධ්‍යය ආයතනයකට පහර දෙන එක නම් හොද දෙයක් නෙමෙයි.නමුත් මේ වගේ මාධ්‍යය ජාලයක ආරක්ෂාව ගැන එම ආයතනයේ පාලකයින් එතරම් හොදින් කටයුතු නොකර සිටීම නම් පුදුමයට කරුණක්.

ඊටත් පස්සෙ ලසන්ත වික්‍රමතුන්ග මහත්මයාව වෙඩි තබා ඝාතනය කලා.කවුරු කලත් මේකත් අනුමත කරන්න බැහැ.මොකද මනුස්සයෙක් මරන්න ලේසි උනත්, කිසිම මනුස්සයෙක් මරන්න අපිට අයිතියක් නැති නිසා.

Dream Starත් ඉවර උනා.ඒත් මේ වගේ වැඩසටහන් වලින් වැඩිපුරම ලාභ ලබන්නෙ ජංගම දුරකතන සමාගමුයි, මේ වැඩසටහන් කරන මාධ්‍යය ආයතනයි.දිනපු අයත් තව ටික කාලෙකින් නැතුව යයි.දැන් තියෙන Star වැඩසටහනුත් වැඩියි කියලයි මට නම් හිතෙන්නෙ.පොඩි ලමයිනුත් බලන්නෙ තරුවක් වෙන්න.මොනව උනත් මේ වගේ වැඩසටහන් වලින් ඉදිරියට එන එක් තරගකරුවෙකු හරි මතකයේ රැදෙන දෙයක් කලොත් තමා මේ වැඩසටහන් වටින්නෙ.කියන්න අමතක උනා.මේ සතියෙ සෙනසුරාදා Dancing Star අන්තිම තරගය.ඒකත් කැමති අය බලන්න හොදේ...:D මොනව උනත් මට නම් රූපවාහිනිය බලන්න වෙලාවක් ඇත්තෙම නැහැ.ඉදල හිතල තමා බලන්නෙ.ඒත් කවදාවත් SMS නම් කරන්නෙ නැහැ....:D

දැන් ඉතින් මේ බ්ලොග් සටහනත් ලියල ඉවර කරන්න වෙලාව ඇවිල්ල.ආපහු ඊලග බ්ලොග් සටහනින් හමු වෙමු.

Thursday, January 1, 2009

2009

හැමදෙනාටම ලැබුවා වූ නව වසර කිරියෙන්, පැණියෙන් ඉතිරෙන නව වසරක් වේවායි පතමින් මේ වසරේ පලමු බ්ලොග් සටහන තබනව.

අද දෙවන වසරේ පලමු සමාසිකය පටන් ගත්ත.ගිය අවුරුද්දට වඩා මේ අවුරුද්දෙ විභාග කටයුතු හොදට කරන්නයි හිතා ගත්තෙ.ඒක ඉතින් සිතිවිල්ලකට පමණක් සීමා නොවී ක්‍රියාවේ යොදවන්න ලැබෙන්නයි කියල තමයි මම නම් පතන්නෙ.

ඊයෙ රෑ ඉදලම කලේ Facebook මගින් හා SMS මගින් යාලුවන්ට සුභ පතපු එකයි.SMS වලට නම් හොද ගානක් වියදම් උනා.ඒත් ඉතින් අවුරුද්දට එක සැරයක් නැත්නම් දෙසැරයක්නෙ ඔය වගේ SMS යවන්නෙ.ඒ නිසා ඒක ගැන නම් දුකක් නැහැ.කාලෙකට පස්සෙ විදේශ ගතව අධ්‍යාපනය ලබන ගැණු ලමයි දෙන්නෙකුත් කථා කලා.යාන්තම් තාමත් ඒ ගැණු ලමයි දෙන්නට තාම මාව මතක තියෙනව....:P

අද හවස යාලුවොත් එක්ක කොත්තුවක් කන්න හිතා ගෙන ගියා.නමුත් අවාසනාවකට හැමදාම යන කඩේ අද වහල.අලුත් අවුරුද්දෙ මේ මිනිස්සු වැඩ කරන් නැතුව කම්මැලි කමට නිදි ඇති ගෙවල් වලට වෙලා.නැත්නම් ඊයෙ රෑ හොදට බීල තාමත් වෙරි මරගාතෙන් නිදා ගෙන ඇති.මේ වගේ කම්මැලි මිනිස්සු ඉන්න රටක් කවද දියුණු වෙයිද මන්දා....:(

ඔන්න අද කාලෙකට පස්සෙ Loving Star බලන්නත් ලැබුන.අලුත් අවුරුද්දෙ මුලින්ම බලපු වැඩසටහන තමා Loving Star.අද වැල්ලෙ මාලිගාත් හැදුව.ඒත් එක කෙල්ලෙක්ගෙ එක හොද නැහැයි කියල කියපු නිසා මනමාල මහත්තයගෙ ඇදුමයි, කැප් එකයි ගලවල මුහුදට වීසි කරල දැම්ම.අද කාලෙ ඉන්න මේ වගේ කෙල්ලෙක් මටත් ලැබුනොත් වෙන්නෙ ඒ කෙල්ලට යට වෙලා ජීවත් වෙන්න තමා.නැත්නම් ඉතින් ගුටිත් කන්න වෙයි....:(

අපේ රටේ බැංකු පද්ධතිය ගැනත් තියෙන විශ්වාසය දැන් නැති වේ ගෙන වගේ යන්නෙ.සක්විතියයි, දඩුවම් මුදලාලියි රටෙන් පැන්න.නිකම් නෙමේ.අහිංසක දුප්පත් මිනිස්සුන්ට වගේම හොරකමින්, වංචාවෙන් මුදල් හම්බ කල මිනිසුන්ටත් දඩුවමකුත් දීල.කොතලාවල මහත්තයත් කොයි වෙලේ හරි රටින් පනීද දන්නෙ නැහැ.මහ බැංකුවෙ ලියාපදිංචි වෙලා තිබ්බ සෙලාන් හා ප්‍රමුඛ බැංකු කඩා ගෙන වැටුන නම් මිනිස්සුන්ට බැංකු ගැන තියෙන විශ්වාසය නැති වෙයි.ඒ නිසා මේ අවුරුද්දෙ හොදට හිතල මතල ඉතිරි කිරීම් ගැනත් හිතන්න වෙයි.

2009 අවුරුද්දෙ ලියන පලමු බ්ලොග් සටහන නිමා කරනව.

ලැබුවා වූ නව වසර සාමය සතුට පිරි, බලාපොරොත්තු ඉටුවන වසරක්ම වේවා!!!!!!!!!!!!!!!