චරිත්ගෙ සිතුවිලි

ජෛනාගම

2012-01-26T18:24:00.001+05:30

ගොඩක් අය ජෛනාගම ගැන අහල තිබුණට නිඝන්ටයන් දැකල නැතිව ඇතිනෙ. පහල තියෙන වීඩියෝ වල ඉන්නෙ ඒ නිඝන්ටයො. (18+ හොදේ)

O/L, A/L ICT ටියුෂන්

2011-12-26T08:45:00.000+05:30

දැන් ඉතින් SLIIT එකේ ඉගෙන ගෙන ඉවර නිසාත්, කර කර හිටපු රස්සාවෙන් අයින් වුණු නිසාත් අලුතෙන් මොකක් හරි කරන්න හිතුවා. අන්තිම අවුරුද්දෙ "Entrepreneurship" කියන විෂ‍ය ඉගෙන ගත්තු නිසා මමම බොස් වෙලා මොකක් හරි පටන් ගන්නයි ආසාව වුණේ.

ඉතින් ඒ අනුව මම හිතුව ටියුෂන් කරන්න පටන් ගන්න. කරන විෂය තමයි O/L සහ A/L ICT. හිතුව විතරක් නෙමෙයි, දැනටමත් පටන් අරන් තියෙන්නෙ. කලින් කර කර හිටියෙ ගෙදරටම ගිහින් ටියුෂන් කරන්න. ඒත් ලබන අවුරුද්දෙ ඉදන් ස්ථිර ස්ථාන දෙකක ඉදල ටියුෂන් කරන්නයි ඉන්නෙ.

ඉතින් ඔය වැඩේට ඕන කරන වැදගත්ම දේ වෙන ප්‍රචාරණයට මම පාවිච්චි කළේ hand bill බෙදන එකයි, පෝස්ටර් අලවන එකයි. මේ දෙකම අන්තිම අසාර්ථකයි මේ කාලෙ නම්. Hand bill බෙදන එවුන් ඒව විසි කරල යනව. පෝස්ටර් ගැහුවම පාප්ප වේලෙන්නත් කලින් වෙන මොකෙක් හරි ඒකෙ උඩින් අලවනව. නැත්නම් පහුවදාට නගර සභාවෙන් ගලවන් යනව.

ඉතින් ඔය හේතුව නිසා මම හිතුව ප්‍රචාරණ මාධ්‍යයක් විදිහට බ්ලොග් එක පාවිච්චි කරන්න. ඉතින් කාට හරි O/L ICT වලට හරි, A/L ICT වලට හරි ටියුෂන් ඕන නම් මට email එකක් දාන්න, තමන්ගෙ දුරකථන අංකයත් එක්ක මෙන්න මේ email address එකට.

charithsriyan@gmail.com

මේ පාර A/L කරපු අයගෙන් ICT වලට revision කරන්න ඕන අයටත්, Chemistry වෙනුවට ICT කරන්න ඉන්න අයටත් ටියුෂන් ඕන නම් ඉහත email address එකට email එකක් දාන්න.

පානදුරේ ටියුෂන් කරන්නෙ "U.E.S." කියල තැනක. 10,11 පන්ති තියෙන්න ඉරිදා හවස් වරුවෙ. 10 ශ්‍රේණියට සවස 2 - 4 දකවාත්, 11 ශ්‍රේණියට 4 - 6.30 දක්වාත් පන්ති පැවැත්වෙනවා.

දෙහිවල කරන්නෙ "සිප්සර" කියල තැනක. 10 ශ්‍රේණියට සෙනසුරාදා උදේ 8 - 10 දක්වාත්, 11 ශ්‍රේණියට සෙනසුරාදා 10 - 12.30 දක්වාත් පන්ති පැවැත්වෙනවා.

ඉතින් කාටහරි O/L, A/L ICT වලට ටියුෂන් අවශ්‍ය කෙනෙක් ඉන්නවනම් ඉහත email address එකට email එකක් දාන්න කියල ඉල්ලනව. හැබැයි බොරුවට email කිරීමෙන් වළකින්න කියලත් බොහොම කරුණාවෙන් ඉල්ලා සිටිනවා.

යොහෝවාගේ සාක්ෂිකරුවෝ, ඒ කවුද? මොනවද කරන්නෙ?

2011-11-14T18:46:00.001+05:30

යොහෝවාගේ සාක්ෂිකරුවෝ, ඒ කවුද? මොනවද කරන්නෙ?

ගොඩක් අය යොහෝවාගේ සාක්ෂිකරුවෝ කියපු ගමන් බියට පත් වෙනව. ඒ ඔවුන් අන්තවාදී ආගමික කණ්ඩායමක් කියන පිළිගැනීම ඔවුන්ට තිබෙන නිසා. මේ නිසාම ඔවුන් ගැන දැන ගැනීමට ඇති වූ කුහුල නිසා මම ඔවුන්ගේ නිළ වෙබ් අඩවිය වන Watchtower වෙත ගොස් ඔවුන්ගේ ධර්මය දැන ගැනීමට කැමති බව දන්වා එහි ඇති පෝරමය පුරවනු ලැබුවා. දවස් දෙක, තුනකට පස්සෙ වත්තල තිබෙන ඔවුන්ගේ ලාංකීය කාර්යාලයෙන් මට දුරකථකන ඇමතුමක් දී යෝහෝවාගේ පණිවිඩය ගැන මා හට දැන්වීමට කෙනෙකු එවීමට මගේ නිවස පිහිටා තිබෙන ස්ථානය ගැන විමසනු ලැබුවා.

පහත දැක්වෙන්නේ එසේ ආ යොහෝවාගේ සාක්ෂිකරුගෙන් මා දැන ගත් කරුණුයි.

යොහෝවාගේ සාක්ෂිකරුවන් යනු යොහෝවා නමැති දෙවියන් අදහනු ලබන ජනතාවයි. යොහෝවා යනු ජේසු තුමන්ගේ පියා නොහොත් මේ ලොව මැවූ දෙවියන්ය. ඔහුගේ නම "යොහෝවා" ය. ඔවුන් එක් රැස් වී යාඥා කරන ස්ථානය හැදින්වෙන්නේ පල්ලියක් හෝ දේවස්ථානයක් ලෙස නොව "යොහෝවාගේ සාක්ෂිකරුවන්ගේ රාජ්‍ය ශාලාව" (Kingdom hall) ලෙසය.

සාතන් විසින් පාලනය කරනු ලබන මේ ලොව අනාගතයේදී ජේසු තුමන් විසින් විනාශ කරනු ලබන බවත්, ඉන්පසු දැනට ජීවත් වන අයගෙන් හා මියගිය අයගෙන් තෝරා ගත් 1,44,000ක් මගින් මේ ලොව පාලනය කරන බවත්, ඉතිරි අය විනිශ්චයකට ලක් කොට පාරාදීසයක් බවට හැර වූ පොළොව මත සදාකලික ජීවනයක් ලබා දෙන බවත් ඔවුන් පවසා සිටියා.

එමෙන්ම ඔවුන් විශ්වාස කරන ආකාරයට ජේසු තුමන් මරා දැමුවේ කුරුසයක ඇණ ගැසීමෙන් නොවේ. ඔහුව ඇණ ගසා මරා දමන ලද්දේ තනි ලී කණුවක අත් දෙක ඉහලට සිටින සේ එල්ලා තැබීමෙනි.

මේ ඔවුන් විසින් නොමිලේ දෙන ලද පත්‍රිකා හා පොත් පත් කිහිපයය.

මොවුන් විසින් පුන පුනා පැවසුවේ යොහෝවාගේ සාක්ෂිකරුවන් කිසි දිනෙක මුදල් දී අන්‍යාගමිකයන් යොහෝවාගේ සාක්ෂිකරුවන් බවට පත් නොකරන බවත්, ලෙඩ රෝග ආදිය සුව නොකරන බවත්ය. එමෙන්ම ඔවුන් විසින් ප්‍රකාශයට පත් කර ඇති "බයිබලසේ සඳහන් ඉගැන්වීම් නිවැරදිව තේරුම් ගනිමු" යන පොතෙහි ඇති පාඩම් 19 නොමිලේ නිවසටම පැමිණ ඉගැන්වීමටද ඔවුන් විසින් කැමැත්ත පළ කරන ලදී. මෙම පාඩම් මාලාවෙන් පසු තමාට අවශ්‍ය නම් පමණක් බෞතිස්මය ලබා යොහෝවාගේ සාක්ෂිකරුවෙකු වීමට හැකි බවද ඔවුන් විසින් පවසන ලදී. එමෙන්ම ඔවුන්ගේ රාජ්‍ය ශාලාවේ පැවැත්වෙන යාඥා මෙහෙයන් සඳහා පැමිණෙන ලෙසද ආරධනා කරන ලදී.

පහත දැක්වෙන වීඩියෝවේ ඇත්තේ යොහෝවාගේ සාක්ෂිකරුවන් ගැන සංක්ෂිප්ත විස්තරයකි.

Top Cat ද හොඳ? පිස්සු පූස ද හොඳ?

2011-10-30T16:55:00.002+05:30

Top Cat

පිස්සු පූසා

සෙනසුරාදත් ගියා, හෙටත් යනවා

2011-09-20T21:31:00.001+05:30

පොත් ප්‍රදර්ශනේ පටන් ගත්ත දවසෙ උදේ 10 වෙද්දිම ප්‍රදර්ශනය බලන්න ගියත් කිසිම පොතක් ගත්තෙ නම් නෑ. ඒකට හේතුව වුණේ එදා අතේ සල්ලි නොතිබීමත්, හදිස්සියෙම යන්නට සිදු වීමත්. ඉතින් හෙට තමයි පොත් ගන්න යන්න හිතන් ඉන්නෙ.

හෙට ගන්න හිතන් ඉන්න පොත් තමයි මේ.

උපුල් ශාන්ත සන්නස්ගලගෙ පොත් කීපයක් ගන්න උවමනාවක් තිබ්බත් පොත් ප්‍රදර්ශනයෙන් නම් එයාගෙ පොත් ගන්න එක ලාබ නෑ. එතන ලැබෙන්නෙ 20%ක විතර වට්ටමක්නෙ. ඊට වඩා 40%ක වට්ටමකට එයාගෙ පොත් හා සංහිඳ එකෙන් ගහපු අනික් පොත් ගන්න පුළුවන්, නුගේගොඩ තියෙන සංහිඳ මුද්‍රණාලයට ගියාම. ගිය පාර ප්‍රදර්ශනයෙන් සන්නස්ගලගෙ පොත් අරන් ඔය මෝඩකම කරපු නිසා, මේ පාරනම් එයාගෙ පොත් නම් ගන්නෙ නෑ.

තව ගන්න ඉන්න පොත් තමයි සයිමන් නවගත්තේගම ලියපු පොත් වලින් දැනට මුද්‍රණය කරල තියෙන පොත් තුන. මේ ගැන ලිපියක් කලින් ලියපු නිසා ඒ ගැන මෙතනින් බලන්න.

තව පොත් ගන්න හිතන් ඉන්න ලේඛකයො තමයි කේ. ජී. කරුණාතිලක, ජයසේන ජයකොඩි, සුගතපාල ද සිල්වා වගේ අයගෙ පොත්. ඒ ඇරෙන්න අනෝමා ජනාදරීගෙ "පුනරුක්ති" කියන පොතත් හිතුනොත් ගන්නව. හැබැයි වැඩක් තියෙන පොතක් කියල නම් හිතන්න බෑ. සල්ලි ඉතුරු වුණොත් විතරක් ගන්නව. තව "නිරුවත් වානරයා" පොතත් ගන්න හිතන් ඉන්නව. සමින්ද ලංකා සමරසිංහ ලියපු "බැමි" කියන පොතත් ගන්න හිතා ගෙන ඉන්නව.

මේ පාර පොත් ගොඩක් ගන්න බලාපොරොත්තුවක් නෑ. ගොඩක් අරන් තියා ගන්න තැනකුත් නෑ. ඒ නිසා අවශ්‍යම පොත් ටිකක් විතරයි ගන්න හිතන් ඉන්නෙ.

තව ගන්න හොඳ පොත් තියෙනවනම්, ඒ ගැන කියල comment එකක් දාල යන්න.

සයිමන් නවගත්තේගමගෙ පොත්වලට ආස කවුද?

2011-09-19T11:39:00.000+05:30

සුභ ආරංචියක් කියන්න තියෙනව. කාලයක් හොයා ගන්න බැරුව තිබ්බ සයිමන් නවගත්තේගම මහත්මයගෙ පොත් කීපයක නැවත මුද්‍රණයක් "ෆාස්ට් පබ්ලිෂින්" ආයතනය කරල තියෙන්ව. 25%ක වට්ටමක් පොත් ප්‍රදර්ෂණයෙ දෙනව. මරදානෙ සුරස පොත් හලෙත් 25%ක වට්ටමක් මේ මාසෙ පුරාම දෙනව. දැනට මුද්‍රණය කරල තියෙන්නෙ "සාගර ජලය මදි හැඬුවා ඔබ සන්දා", "දඩයක්කාරයාගේ කතාව" සහ "සුභ සහ යස" කියන පොත් තුන විතරයි. ලබන මාසෙදි "සංසාරණ්‍ය අසබඩ" හා "සුද්දිලාගෙ කතාව" කියන පොත් දෙකත් මුද්‍රණයෙන් පිට වෙනවලු.

පුළුවන් අය මේ පොත් ටික අරන් කියවන්න. වෙනස් විදිහක සිංහල නවකතා කියවන්න කැමති අයට හොඳ පොත් ටිකක් තමයි මේ. ඒ වගේම අවුරුදු ගාණකට මේ පොත් ටික ආපහු මුද්‍රණයකින් පිට වෙයිද කියල හිතන්නත් අමාරුයි.

රස්සාව

2011-09-09T19:17:00.000+05:30

topjobs වල කරක් ගහල vacancies ගොඩකට apply කළා.

එයින් එකක interview ගිහින් අමාරුවෙන් රස්සාවක් හොයා ගත්තා.

Training එකටත් ගියා.

Production එකට ගිහින් දවස් තුනකින් නොදන්වාම නිවාඩු 2ක් ගත්තා.

ආපහු රස්සාවට යන්නද? එපාද? නැත්නම් දැනටමත් මාව රස්සාවෙන් අයින් කරල ඇද්ද?

පළවෙනි රස්සාවෙ මේ වගේ අත්දැකීම් තියෙන අය පොඩි උපදෙසක් දීල යන්න.

Bombay Meri Hai

2011-08-08T19:35:00.002+05:30

නීල් විජේරත්නගෙ "කේරළ නළඟන" පොත කියවන කොට මතක් වෙච්ච සිංදුවක් තමා මේ දාලා තියෙන්නෙ.

මේ ගීතය මුලින්ම පටිගත කරල තියෙන්නෙ 1696 වසරේදී. ගීතය මුලින්ම ගායනා කරල තියෙන්නෙ ඌශා උතුප් විසින්. සංගීතය සපයල තියෙන්නෙ මීනා කාවා විසින්. ද්විභාෂික පදමාලාව රචනා කරල තියෙන්නෙ නජු කාවා විසින්.

Verse
Come from England, come from Scotland, come from Ireland
Come from Holland, come from Poland, come from any land,
If you're looking out for a pleasant holiday,
Come to Bombay, come to Bombay, Bombay meri hai.

Chorus
Bom bom bom bom
Bombay meri hai
Born bom bom bom
Bombay meri hai

Our ladies are nice, they are so full of spice
Come to Bombay, come to Bombay Bombay meri hai.

Wear a dhoti, put a topi and a small coatie
Mini or bikini is so good for you honey
If you ain't so gay then you can live the sadhu way
Come to Bombay, come to Bombay Bombay meri hai.

Verse
Puri bhaji, bhelpuri you can try and tell
Idli dosa, hot samosa you will like it well
Once you come to stay then you won't like to go away
Come to Bombay, come to Bombay Bombay meri hai.

ඔයා මාරයි සුනේත්‍රා!!!

2011-08-01T17:03:00.002+05:30

සුනේත්‍රා, ඔයා මේ පාරත් කොහොම හරි අර ස්වර්ණ පුස්තක කියන සම්මානෙ ගන්න කොහොම හරි ඔයාගෙ පොතක් රිංගවා ගත්ත නේද? කොහොම හරි ගිය අවුරුද්දෙ "බුද්ධදාසිට" ලැබුනෙ රුපියල් පනස්දාහක් විතරක් හින්ද මේ පාර "කවි කඳුර" රිංගවා ගත්ත නේද?

කාටවත්ම කියවන්න බැරි "පොදු පුරුෂයා" පොතෙන් එක පාරම රුපියල් පන් ලක්ෂ පනස්දාහක් හොයා ගත්තු ඔයා දැන් හැමදාම ස්වර්ණ පුස්තකේ අන්තිම පොත් පහට තේරෙන්නෙ කොහොමද කියන එක ගොඩක් දෙනෙකුට නොතේරෙන දෙයක්. ඔයා ඔය ලක්ෂ පහමාර වෙනුවෙන් විනිශ්චය මණ්ඩලයට වියදම් කරන ගාණත් කිව්වනම් හොඳයි නේද?

බොරුවට සුදු සිල් රෙද්දක් පොරව ගෙන සාන්ත දාන්ත තීන්ත කූඩුව වගේ ඉන්න ඔයා ලක්ෂ පහමාරක් වෙනුවෙන් කරන මේ බොරුවෙන් වෙන්නෙ ස්වර්ණ පුස්තකේ හැමදාමත් එක් පිරිසකට විතරක් ලැබෙන එක විතරයි නේද? කවදාවත් මේ ස්වර්ණ පුස්තකෙන් අපේ සිංහල සාහිත්‍යය නගා සිටුවන්න ඔයා වගේ මේ කීප දෙනෙක් කරන වංචාවෙන් බැරි වෙනව නේද?

විනිශ්චය මණ්ඩලවල ඉන්න උදවියත් ස්වාධීනව කටයුතු කරනවනම් මේ වගේ හැමදාම එකම කට්ටියකට විතරක් සම්මාන ලැබෙන්න විදිහක් නැහැ නේද?

The Ashok Ferrey Show

2011-07-31T10:05:00.003+05:30

"The Ashok Ferrey Show" කියන්නෙ අශෝක් ෆෙරී කියන ලේඛකයා විසින් ඉදිරිපත් කරනු ලබන ඉංග්‍රීසි සාහිත්‍ය, කලාව, ගීත ආදිය පිළිබඳව ඉදිරිපත් කරනු ලබන වැඩසටහනක්. සාමාන්‍ය සිංහල සාහිත්‍ය වැඩසටහනක් ඉදිරිපත් කරන ආකාරයට වඩා වෙනස් ආකාරයකටත්, මැදිරියක රූපගත නොකර වෙනස් පසුබිම් තල වල ඉඳල රූපගත කරල තිබෙන නිසා කම්මැලිකමක් නැතිවත් බලා සිටිය හැකි වැඩසටහනක්.

අශෝක් ෆෙරී කියන්නෙ සිංහල පොත් පත් කියවන්නන් අතර නම් ප්‍රසිද්ධ පුද්ගලයෙක් නෙමේ. “Colpetty People” සහ “Serendipity” කියන්නෙ ඔහු ලියන ලද ඉංග්‍රීසි සාහිත්‍ය කෘතීන් දෙකක්.

අශෝක් ෆෙරී ගැන වැඩිදුර තොරතුරු මෙතනින් බලා ගන්න.

"The Ashok Ferrey Show" ගැන වැඩි විස්තර හා විකාශය වන වේලාවල් මෙතනින් බලා ගන්න.

Put A Chat With auntie netta

2011-06-30T20:52:00.002+05:30

"Put A Chat With auntie netta" කියන්නෙ ETV රූපවාහිනී සේවයේ විකාශය වන නිම්මි හරස්ගම විසින් ඉදිරිපත් කරන විනෝදාතමක සම්මුඛ සාකච්ඡා වැඩසටහනක්. ගොඩක් අයට මේක ඇල්ලුවෙ නැති වුනත් මට නම් මේ වැඩසටහන ගොඩක් සිංහල වැඩසටහන් වලට වඩා හොඳයි. හරසාර, බරසාර වචන යොදා ගන්නෙ නැතුව කරන මේ වැඩසටහන සිංහල වැඩසටහන් ඉදිරිපත් කරන්නන්ටද බලල ඉගෙන ගන්න දේවල් ගොඩක් තියෙනව. හැබැයි මේ වගේ එකක් සිංහලෙන් කරන්න නම් තව අවුරුදු ගාණක් යයි. මොකද ගොඩක් අයට මේ වගේ වැඩසටහන් අල්ලල යන්නෙ නැති නිසා.

"Put A Chat With auntie netta" ගැන වැඩි විස්තර හා විකාශය වන වේලාවල් මෙතනින් බලා ගන්න.

ETV පේන්නෙ නැති අය "Put A Chat With auntie netta" මෙතනින් බලන්න.

රෝස කටු - බෞද්ධ නවකතා ලියූ ලේඛයකුගේ ජීවිත කතාව

2011-05-30T21:55:00.000+05:30

ජයසේන ජයකොඩි කියන්නෙ බෞද්ධ ධර්මයෙහි ඇතුළත් කරුණු මුල් කරගෙන නවකතාකරණයෙහි යෙදිච්ච ලේඛකයෙක්. බුදුන් වහන්සේගේ ජීවිත කතාව "අමාවැස්ස" හා "ගෝතම ගීතය" යන පොත් දෙකෙහි එතුමා ඉතා අලංකාරව නවකතාවකට ගැළපෙන අයුරින් සකස් කර තිබෙනවා.

ඒ වගේම තමයි එතුමා විසින් ලියපු රාහුල තෙරණුවන්ගේ කතාව ඇතුළත් පිච්චමල නවකතා මාලව. එහි නවකතා පොත් 8ක් ඇතුළත් වෙනවා. මෙම රාහුල තෙරුන් ජීවත් වූ ප්‍රදේශය ලෙසට යොදා ගෙන තිබෙන්නෙත් එතුමාගේ ගම වූ හොරණ ප්‍රදේශයමයි.

මේ ආදී පොත් ලියපු ජයසේන ජයකොඩි මහත්මයා තමන්ගේ ජීවිත කතාව විදිහට ලියාපු පොත තමයි "රෝස කටු" කියන්නෙ. එතුමාගේ ජීවිතයේ කුඩා අවධියේ ඉඳල 2008 වසර දක්වා එතුමාගේ ජීවිත කාලය මෙම පොතෙහි විස්තර කරල තියෙනවා.

තමන්ගේ ජීවිතයේ සිදු වූ අඩුපාඩු කිසිවක් නොසගවමින් ලියා ඇති මේ පොත කාටත් රසවිඳිය හැකි පොතක් ලෙසටයි මම සලකන්නෙ.

කියවන්න පොත් 8ක්

2011-04-29T22:39:00.000+05:30

සිංහල නවකතා මාලාවක් විදිහට තියෙන පොත් ගොඩක් අඩුයි. ප්‍රසිද්ධම කතා මාලාව තමයි මාර්ටින් වික්‍රමසිංහ මහතාගේ "ගම්පෙරළිය", "යුගාන්තය" හා "කලියුගය" කතා මාලාව. තව ගුණදාස අමරසේකරගෙ "ගමනක මුල" ඉඳල "ගමනක අඟ" කියන පොත් 8ක විතර කතා මාලාවක් තියෙනව.

ජයසේන ජයකොඩි මහත්මයා ලියපු රාහුල තෙරණුවන්ගේ කතාව ඇතුළත් කතා මාලාව මේ ඔක්කොටම පොත් වලට වඩා ඉහළ මට්ටමක කතා මාලාවක් විදිහට හඳුන්වන්න පුළුවන්. ඒ නිසා පුළුවන්නම් මෙන්න මේ පොත් ටික හොයා ගෙන කියවල බලන්න කියල ඉල්ලා හිටිනව.

1. පිච්චමල

2. අරලියමල් ආරාමය

3. මහමෙර

4. උපේකා

5. පින්කෙත

6. සිල් සුවඳ

7. සුදු නෙළුම

8. තෙර තරණය

කතා දෙකක්

2011-03-23T13:04:00.000+05:30

මේ කියන්න යන්නෙ ඊයෙ දවසෙ මට දකින්න ලැබිච්ච සිද්ධි දෙකක්. කතා දෙකක් කිව්වට මේ සිද්ධි දෙකේ රසවත් දෙයක් ඇත්තෙම නැති තරම්.

පළවෙනි සිද්ධිය වුනේ පානදුරෙන් පටන් අරන් මරදාන බලා යන "මුතු කුමාරි" දුම්රියේදී. (දැන් අහන්න එපා හලාවතින් පටන් ගන්න "මුතු කුමාරි" කෝච්චිය පානදුරෙන් පටන් ගන්නෙ කොහොමද කියල. පානදුරේ පැත්තෙන් කෝච්චියෙ යන අය "මුතු කුමාරි" ගැන දන්නව ඇති කියල හිතනව.)

උදේ 9.35ට පානදුරෙන් "මුතු කුමාරි" පිටත් වෙන්නෙ "ගාලු කුමාරි" පානදුරෙන් ගියාට පස්සෙ. ඉතින් මට යන්න ඕන දුම්රිය ස්ථානයේ "ගාලු කුමාරි" නවත්තන්නෙ නැති නිසා මම නැග්ගෙ "මුතු කුමාරි" කෝච්චියට. ඔය වෙලාවට වැඩිය සෙනග නැති නිසා මම ගිහින් වැඩිය සෙනග නැති, ෆෑන් වැඩ කරන තැනක වාඩි වුණා.

ටික වෙලාවකින් මම ඉන්න තැනට පිටි පස්සෙ ආසනයට ආවා ළමයෙක් වඩා ගත්ත පිරිමි කෙනෙක්. මිනිහ වාඩි වෙලා කෝච්චිය පිටත් වෙන කල්ම කළේ සිගරට් බීපු එක. තමන් ගාව පොඩි ළමයෙක් ඉන්න බවක්වත්, කෝච්චියේ සිගරට් බීම තහනම් බවවත් ඒ මිනිහට තේරෙන්නෙ නෑ වගේ සිගරට් බොනව. කව්රුවත් මිනිහට විරුද්ධව කතා කරන්නෙවත් නෑ. ඒ මිනිහගෙ සිගරට් බීම නවත්තන්න කියල කියපු එකම මිනිහ වෙච්ච මට වුණේ මිනිහගෙන් හොඳට බැණුම් අහල කෝච්චියෙ වෙන ආසනයක් වෙත යන්න වෙච්ච එක විතරයි. ඔන්න ප්‍රසිද්ධ ස්ථානවල දුම් බීමට විරුද්ධව කතා කරන්න යන මිනිස්සුන්ට වෙන දේ.

දෙවෙනි සිද්ධිය සිද්ධ වුනේ පිටකොටුවෙන් පටන් අරන් මහරගම බලා යන 138 බස් එකකදි, දවල් එකට විතර. මම වාඩි වෙච්ච සීට් එකට පිටි පස්සෙන් වාඩි වෙච්ච කෙනා තමන්ගෙ ජංගම දුරකථනයෙන් ටිකක් හයියෙන් මොහිඩීන් බෙග් මහත්මයාගෙ සින්දු දාගෙන ආවා. ටිකක් කරච්චලයක් වුනත් කව්රුවත් ඒකට විරුද්ධව කතා කළේ නෑ.

ටික වෙලාවක් යද්දි සින්දු දාගෙන යන මිනිහගෙ සීට එකේ වාඩි වෙලා හිටපු අනිත් මනුස්සයා බස් එක ඇතුළෙ කෙළ ගහන්න ගත්තා. ඒ මිනිස්සු දෙන්නා අතරෙ පොඩි බහින් බස් වීමකුත් ගිහින් අන්තිමට පැමිණිල්ල කොන්දස්තරට කිව්වා. කෙළ ගහපු මිනිහ කෙළ ගහන්න හේතුව විදිහට කිව්වෙ මොකක්ද කියල හිතා ගන්න පුළුවන්ද? මිනිහගෙ හේතුව වුනේ "තම්බියෙක්ගෙ සින්දු මිනිහට ඇසීමට ලැබීමයි."

ප්‍රශ්නෙ වැඩිය දුර දිග යවන්නෙ නැතුව මිනිහ බස් එකෙන් මහජන පුස්ථකාලය ළඟදි බැහැල ගියා. නැත්නම් මිනිහට යන්න ලැබෙන්නෙ බස් එකේ හිටපු මිනිස්සුගෙන් ගුටි කාලයි. මට එක පාරටම මතක් වුණේ සිංහල බ්ලොග් අවකාශයේ ඉන්න හැකර් කෙනෙක් හරි, "රාළලා" ගෙන් කෙනෙක්වත්ද මේ කෙළ ගැහුවෙ කියලයි.

දේව පාමුල

2011-03-13T09:34:00.001+05:30

ඔබටත් වෛද්‍ය ප්‍රතිකාර මගින් සුව කර ගත නොහැකි රෝගයක් වැළඳී තිබෙනවාද?

පිළිකා, ඇස් නොපෙනීම, කන් නොඇසීම, ගොළු බව, කොර වීම වැනි රෝගාබාධයන් තිබෙනවාද?

මෙන්න එහෙනම් එම රෝගාබාධයන් සුව කර ගැනීමට හැකි එකම මග.

අද දින (මාර්තු 13) සවස 5ට පමණ ගාළු මුවදොර පිටියේ පැවැත්වෙන "දේව පාමුල" යාඥාවට සහභාගි වන්න. ඔබට ඇති සියළුම කායික, මානසික දුර්වලතා මග හරවා ගත හැක.

හැබැයි බැරිවෙලාවත් ඔබේ ආත්මය ශුද්ධාත්මයාණන් වහන්සේ හා එක් වුවහොත් එනම් ඔබ මරණයට පත් වුවහොත් එයට මා වග කියනු නොලැබේ.

මෙය මුදල් නොගෙවා, පිං තකා ප්‍රචාරය කරන ලද දැන්වීමකි.

ප.ලි. - මේ යාඥාවන් කරන පාස්ටර්ල්ලා කීප දෙනෙක් මහරගම පිළිකා රෝහල, කොළඹ මහ රෝහල වගේ රෝහල් කීපෙකට අනුයුක්ත කලොත් අනාගතේ දොස්තරලට යන වියදම ඉතුරු කර ගන්න පුළුවන් වෙයි.

මගේ ක්‍රිකට් මතකයෙන් බිඳක් - 2 || එදා මෙදා තුර හොඳම සිංහල ක්‍රිකට් ගීතය

2011-03-12T23:32:00.001+05:30

මේ දවස්වල ක්‍රිකට් ලෝක කුසලානය වෙනුවෙන් තරග වදින ශ්‍රී ලාංකික ක්‍රීඩකයන්ගේ මොරාල් එක නග්ගන්න එක එක සිංදු රූපවාහිනී නාලිකා වල ප්‍රචාරය වෙනවා. ඇත්තටම ඒ එක සිංදුවක්වත් මිනිසුන් අතර ජනප්‍රිය නැහැ. ජනප්‍රිය කියන එකෙන් මම අදහස් කළේ මිනිස්සුන්ට ඒ එක ගීතයක්වත් කටපාඩම් හිටින්නෙ නැති නිසයි.

ශ්‍රී ලංකාවට ටෙස්ට් වරම් හිමි වුනු 1982 කාලයේ ක්ලැරන්ස් විජේවර්ධනයන් ඒ වෙනුවෙන් නිකුත් කළ "Test Cricket Souvenir" නම් ඇල්බමයේ අඩංගු වුනු "තණ නිල්ල දිගේ" ගීතය තරම් වෙනත් ක්‍රිකට් ගීතයක් අපේ රටේ ජනප්‍රිය නොවුනු තරම්. මේ ගීතය තවමත් මිනිසුන් අතර ජනප්‍රියයි. ඒකට හේතුව සරල වචන කීපයකින් මිනිසුන්ට මතක හිතෙන ආකාරයට මේ ගීතය නිර්මාණය කර තිබීම. දැන් කාලෙ ලියැවෙන ගීත වල පද මාලා මීටත් වඩා සරල වුනත් කාටවත් ඒව මතක හිටින්නෙ නෑ.

2011 ක්‍රිකට් ලෝක කුසලානය වෙනුවෙන් ශ්‍රී ලාංකාවේ ක්‍රිකට් තේමා ගීතය විදිහට "තණ නිල්ල දිගේ" ගීතය යොදා ගත්ත නම් ඒක කොයිතරම් වටිනවද. ඒත් මේ වගේ ගීත යට කරල දාල "කොදෙව් රටේ පොල්ගස්වල කරටි කඩන්න" එන්න කියන සිංදු යොදා ගැනීමෙන් පේන්නෙ අපේ රසඥතාවය 80 දශකයේ ඉඳල 2011 වසරට එන කොට මොට වෙලා ගිහිල්ලා කියන එක නේද?

ভাল সম্পন্ন বাংলাদেশ || Well done Bangladesh

2011-03-11T22:56:00.001+05:30

මේ බ්ලොග් පෝස්ට් එක ලියන්නෙ බංග්ලාදේශය අද ක්‍රිකට් මැච් එකෙන් දිනුව ප්‍රීතිය නිසා. කාලයක් බංග්ලාදේශයෙ හිටපු කෙනෙක් විදිහට ඔවුන්ගෙ ජයග්‍රණයට සුභ පතන්නයි මේ පුංචි සටහන තිබ්බෙ.

ඉතිරි මැච් ටිකත් කොහොම හරි අද වගේ දිනාගෙන අවසන් තරගයට ශ්‍රී ලංකාවත් සමග සහභාගි වෙන්න ලැබේවායි කියල බංග්ලාදේශ ක්‍රිකට් පිළට මුළු හදවතින්ම සුභ පතනව.

ভাল সম্পন্ন বাংলাদেশ। আল্লাহ কি আশীর্বাদ করতে পারে

(මේ තියෙන්නෙ මීට කලින් බංග්ලාදේශ ක්‍රිකට් ජයග්‍රහණයක් වෙනුවෙන් මම තබපු බ්ලොග් සටහනක්.)

මගේ ක්‍රිකට් මතකයෙන් බිඳක් - 1

2011-02-18T13:22:00.001+05:30

මම මුලින්ම ක්‍රිකට් බලන්න ඇබ්බැහි වුනේ 1996 ලෝක කුසලාන තරගාවලියත් එක්කයි. ඊට පස්සෙ 2003 විතර වෙනකම්ම වගේ මේ ඇබ්බැහි වීම මට තිබුණා. දැන් නම් ඒක අඩු වුනත් ආපහු ක්‍රිකට් උණ වැළඳිලයි තියෙන්නෙ.

මුලින්ම ක්‍රිකට් මතකයෙන් බිඳක් යටතේ මම කියන්න යන්නෙ 1996
ලෝක කුසලාන ක්‍රිකට් තරඟාවලියේ මතකයන් ගැන.

මට මතක විදිහට 96 ලෝක කුසලානෙ ලංකාව ගහපු පළමුවැනි මැච් එක ගැහුවෙ සිම්බාබ්වේ ටීම් එකත් එක්ක. සිම්බාබ්වේ තමයි මුලින්ම පන්දුවට පහර දුන්නෙ. සිම්බාබ්වේ ඉනිම නම් මට බලා ගන්න බැරි වුනා. දෙවෙනි ඉනිමෙදි කළුවිතාරන එක හතරෙ පාරක් ගැහුවට පස්සෙ කකුලේ ආබාධයකට කල් වුණා වගේ මතකයි. ඊට පස්සෙ ජයසූරිය ඇවිත් කකුල තද කරල ප්‍රථමාධාරයක් ලබා දුන්නත් ඊට ටික වෙලාවකට පස්සෙ කළුව දැවී ගියා. තරගය පැවැත්වුනේ මට මතක විදිහට SSC පිටියේදී.

ඊලඟට මතක තරගය තමයි කෙන්යාවත් එක්ක ගහපු මැච් එක. ඒකෙදි මුලින්ම පන්දුවට පහර දුන්නෙ ලංකාවයි. ඒ කාලෙ එක්දින ජාත්‍යන්තර තරගයකදි වාර්තා කරපු වැඩිම ලකුණු ගණන වෙච්ච ලකුණු 396ක් වාර්තා කරන්න ලංකාවට පුළුවන් වුණා. දෙවෙනි ඉණිමට ක්‍රීඩා කරපු කෙන්යාවත් මැච් එක අත අරින්නෙ නැතුව ලකුණු 250ක් විතර ලබා ගත්තා වගේ මතකයි. මේ තරගය පැවැත්වුනේ අස්ගිරිය ක්‍රීඩාංගනයේදී වගෙයි මට මතක.

ඊට පස්සෙ මතක තරගය තමයි එංගලන්තයත් එක්ක ක්‍රීඩා කරපු තරගය. මේක මට සම්පූර්ණයෙන්ම නරඹන්න බැරි වුනත් මතක හිටිය දේවල් කීපයක් තියෙනවා. එකක් තමයි ජයසූරිය වාර්තා කරපු ශතකය. ඒ වගේමයි එංගලන්තෙ කඩුළු රකින්නා වෙච්ච ඇලෙක්ස් ස්ටුවර්ට්. (මට මතක විදිහට ඇලෙක්ස් ස්ටුවර්ට් තමයි කඩුළු රැක්කෙ. පස්සෙ කාලෙකදි ඔහු එංගලන්ත කණ්ඩායමේ නායකත්වයටත් පත් වුණා.) ඔහු මූණ පුරා රැවුල වවා ගෙන තමයි ක්‍රීඩා කළේ. සාමාන්‍යයෙන් එංගලන්ත කණ්ඩායමේ ක්‍රීඩකයෙක් රැවුල වවා සිටීම කලාතුරකින් දක්නට ලැබෙන දෙයක් නිසා ඒකත් සුවිශේෂී කාරණයක්.

අනෙක් මතක තියෙන තරගය තමයි ඉන්දියාවත් එක්ක අවසන් පූර්ව වටයේ ගහපු මැච් එක. තරගය පැවැත් වුනේ කොල්කටාවේ ඊඩ්න් ගාඩ්න් ක්‍රීඩාංගනයේ. මුලින් පන්දුවට පහර දුන්නෙ ලංකාවයි. පළමු ඉනිම යන්තමින් ගොඩ දාන්න ලංකාවෙ හැම ක්‍රීඩකයම පන්දුවට පහර දුන්න වගේ මතකයි. මහානාම කකුලේ ආබාධයකට ලක් වෙලා ඔහු වෙනුවෙන් කඩුළු අතර දුවන්න වෙනත් ක්‍රීඩකයෙක් යොදා ගත්ත වගෙත් මතකයි. (ඒ කාලෙ මහානාම කකුලේ ආබාධවලට ලක් වීම සාමාන්‍ය දෙයක්. ඒත් පුදුමයකට වගේ ජයසූරියත් එක්ක වාර්තාගත් සම්බන්ධතාවයක් පැවැත්වූ ටෙස්ට් තරගයේදී නම් ඔහුට කකුලේ ආබාධයක් ඇති වුනේ නැහැ.) ඒ වගේම හෂාන්, කුම්බ්ලේගේ පන්දුවකට ගහපු හතරේ පහරත් අමතක වෙන්නේ නැහැ. මේ තරගය ප්‍රේක්ෂකයන්ගේ නොසන්සුන්තාවය නිසා තරග තීරක වෙච්ච ක්ලයිඩ් ලොයිඩ් විසින් ලංකාවට ජයග්‍රහණය ලබා දෙනු ලැබුවා. එහෙම නැතත් ජය ගන්නෙ ලංකාවම තමයි.

අවසන් තරගය නම් දැන් රූපවාහිනියෙ පෙන්වනව. මේකෙදි මුලින්ම පන්දුවට පහර දුන්නෙ ඕස්ට්‍රේලියාව. ලංකාව වෙනුවෙන් අරවින්ද ශතකයකුත්, අසංග ගුරුසිංහ අර්ධ ශතකයකුත් වාර්තා කළා. ගුරා තමයි ලංකාව වෙනුවෙන් එකම හයේ පාර ගැහුවෙත්. (ඒත් අවාසනාවකට 1997දී ඔහු ක්‍රිකට් ක්‍රීඩාවෙන් සමු ගෙන ඕස්ට්‍රේලියාවෙ පදිංචියට ගියා.) තරගය පැවැත්වුනේ පාකිස්ථානයේ ගඩාෆි ක්‍රීඩාංගනයේ. තරගයේ වීරයා වුනේ අරවින්ද ද සිල්වායි. තරගාවලියේ වීරයා වුනේ සනත් ජයසූරියයි.

අද වෙනකොට 96 ලෝක කුසලාන තරගාලියේ ක්‍රීඩා කරපු ජයසූරියයි, අර්ජුනයි පක්ෂ දෙකකින් පාර්ලිමේන්ති මන්ත්‍රීවරුන් වී ඉන්නව. හෂාන් බස්නාහිර පළාත් සභා මන්ත්‍රීවරයෙක්. අරවින්ද ක්‍රිකට් තේරීම් කමිටු සභාපති. මහානාම තරග තීරකවරයෙක්. ගුරා ලංකාවෙත් නෑ. ධර්මසේන තරග විනිසුරුවරයෙක්. මුරලි විතරක් මේ පාර ලෝක කුසලානයට ක්‍රීඩා කරනව.

මේ කාලෙ මම වඩියෙන්ම කැමති ක්‍රීඩකයන්වත් කියල යන්න ඕන. මේ කාලෙ මම කැමති ක්‍රීඩකයන් වුනේ ගුරා, වසීම් අක්‍රම්, අරවින්ද වගේ ක්‍රීඩකයන්. ගුරාගෙ මූණ පුරා තිබිච්ච රැවුලත් විශේෂ දෙයක්. ඒ වගේමයි පන්දුවට පහර දෙන්න කලින් ඔළුව හෙල්ලීමත් විශේෂ දෙයක්. ගුරා කඩුළු රකින්නෙක් වුනත් කවදාවත් කඩුලු රකිනව බලන්න නම් මට ලැබිල නැහැ. ඒ වගේමයි ගුරා වේග පන්දු යවන්නෙක් විදිහට ක්‍රීඩා කලා 97 පැවතිච්ච තරගාවලියකදි. ඒ වගේමයි වසීම් අක්‍රම්ගෙ පන්දු යැවීමටත්, අරවින්දගෙ පන්දුවට පහර දීමටත් මම ඒ කාලෙ විශාල කැමැත්තක් දැක්වූවා.

සැ. යු. -මේ ලිපිය ලියුවෙ මගේ මතකය අනුවයි. ඒ නිසා මෙහි වැරදි කරුණු අඩංගු විය හැක. වැරදි කරුණක් තිබ්බොත් නිවැරදි කරන මෙන් ඉල්ලා සිටිමි.

බතුයි, සම්බෝලයි, මාළුයි

2011-02-11T21:46:00.000+05:30

නිකන් දුන්නත්

මාළු කෑල්ලක් කන්නෙ

නැති මම,

අද

තනියෙන්ම උයාගෙන

පරා මාළුත් එක්ක

සම්බෝලයි බතුයි

කෑවෙමි

පිංතූරෙ ගත්තෙ මෙතනින්.

ඔබත් සුරතල් මසුන් ඇති කරනවාද? එසේ නම් සුදු තිත් රෝගය (White spot disease) ගැන දැනුවත් වන්න.

2011-01-07T20:02:00.001+05:30

මගේ එක විනෝදාංශයක් තමයි විවිධ වර්ගයේ සුරතල් මසුන් ඇති කිරීම. විවිධ වර්ගයේ කිව්වට වැඩිපුර ඇති කරල තියෙන්නෙ කාර්ෆ් හා ගෝල්ඩ් ෆිශ් මසුන් වර්ග තමයි. ඒ ඇරෙන්න විවිධ ගුරාමි වර්ගත්, ගප්පි වර්ගත් ඇති කරල තියෙනව. එකම එක වතාවක් ඔස්කා මසුන් ජෝඩුවකුත් ඇති කළා. මාළු ලොකු වුනාට පස්සෙ ආපහු ගත්තු තැනටම විකුණල දැම්මා.

මේ කොයි මාළු ඇති කළත්, මාළුන්ට බහුලව ඇති වන රෝගයක් තමයි සුදු තිත් රෝගය කියන්නෙ. සුරතල් මසුන් ඇති කරන මත්ස්‍යාගාර එක වරක් හරි මේ රෝගයෙන් පීඩා විඳල තියෙනව. මීට සතියකට විතර කලින් මගේ ගාව ඉන්න කාර්ෆ් මත්ස්‍යයන් 7 දෙනෙකුටත් මේ රෝගය වැළඳුණා. එයින් එක් කාර්ෆ් මත්ස්‍යයකුත් මිය ගියා.

මේ රෝගය හැඳීමේදී මුලින්ම පෙන්වන රෝග ලක්ෂණය තමයි ටැංකියේ සිටින මසුන් ටැංකි බිත්තිය දිගේ තම සිරුර අතුල්ලමින් පිහිනා යාම. ඊට පස්සෙ දවස් දෙක, තුනකට පස්සෙ මත්ස්‍යයන්ගෙ ඇගේ කුඩා තිත් ඇති වනවා.

ඉතින් රෝගයට ප්‍රතිකාර හැටියට කළේ ටැංකියට ලුණු අහුරු දෙකක් එක් කර, ඉන්පසු එම ජලයට Anti Parasite එක් කිරීමයි. Anti Parasite එක් කළ යුත්තේ එම බෝතලයේ තිබෙන මූඩියෙන් දෙගුණයක ප්‍රමාණයක් පමණයි. මෙම ප්‍රමාණය අඩි 2*1*1 ටැංකියක් සඳහා සුදුසුයි. Anti Parasite එක් කළ විට ටැංකියේ ජලය නිල් පැහැ ගැන්වෙනවා. එයට හේතුව Anti Parasite හි මෙතලින් බ්ලූ අඩංගු වීමයි. මෙම Anti Parasite එක් කිරීම පැය 72කට පසු (එනම් දින 3කට පසු) නැවත එක් කළ යුතුයි. නමුත් මෙහිදී නැවතත් ලුණු එක් කිරීමට අවශ්‍ය නැත. ලුණු කැට මිස ලුණු කුඩු දැමීම සුදුසු නැත.

සුදු තිත් රෝගය ඇති වීමට බොහෝ දුරට හේතු වන්නේ මත්ස්‍යය ටැංකියේ ඇති ජලයේ අපිරිසිදුතාවයයි. ෆිල්ටරයක් යෙදීම මගින් ජලය පිරිසිදු කර ගත හැක. එමෙන්ම ටැංකියේ ජලය ඉවත් කර අලුත් ජලය එක් කරන විට ජලයට ලුණු කැට අහුරු 2ක් පමණ එක් කිරීම මගින්ද සුදු තිත් රෝගයෙන් ඔබේ මත්ස්‍යයන් ආරක්ෂා කර ගත හැක.

(පින්තූර ලබා ගත්තේ අන්තර්ජාලයෙනි.)

ටියුෂන් හා ටියුෂන් ගුරුවරු හා රාජකීය විද්‍යාලයේ ගුරුවරු

2011-01-01T10:01:00.001+05:30

2011 ජනවාරි පළවැනිදාම 2013 අවුරුද්දෙ උසස් පෙළ කරන අයට ටියුෂන් පන්ති පටන් අරන් තියෙනව. මේ ලියන්නෙ මගේ ටියුෂන් අත්දැකීම් කීපයක්.

මුලින්ම මම උසස් පෙළ ටියුෂන් පන්තියකට කියල ගියෙ ප්‍රසන්න බද්දෙවිතාන සර්ගෙ රසායන විද්‍යාව පන්තියට. පන්ති ගියෙ පාණදුරේ අබාන්ස් එක ගාව තිබ්බ New Academy එකට. මේක group class එකක්. ඒ කාලෙ නම් රුපියල් පන්සීයක් ගත්තා. දැන් නම් කීයක් ගන්නවද දන්නෙ නෑ. A/L කරපු 2005 අවුරුද්දට කිට්ටු වෙද්දි කළුතර පන්තියට ඒ කාලෙ group class එකේ අය මාරු වෙන්න ඕන. ඒකෙ ගාන නම් මට මතක විදිහට රුපියල් 200ක් 250ක් විතර. දැන් නම් සර් group class එකක් කරන්නෙ කොහුවල සක්යා එකේ විතරයි.

මුලින්ම Chemistry ගැන කිව්ව නිසා Chemistry වලට ටික කාලයක් ටියුෂන් ගිය අනිත් ගුරුවරය ගැනත් කියන්න ඕන. ඒ තමයි ශ්‍රීනාත් වික්‍රමසිංහ සර්. ගියෙ සිප්නා එකට. හැබැයි මාස තුන, හතරකට වඩා ගියෙ නම් නෑ.

ඊළඟට Physics වලට ගිය අය ගැන බලමු. මුලින්ම ගියෙ සුනිල් මෙන්ඩිස් සර් ගාවට. ගියෙ පාණදුරේ එඩික්ස් එකට. ඊට පස්සෙ නුගේගොඩ රොටරියෙ ටිල්නි ද සිල්වා සර්ගෙ ටියුෂන් වලට ගියා. 2004 අවුරුද්ද වෙද්දි ටිල්නි සර්ගෙ කළුතර ටියුෂන් පන්තියට ගියා. හේතුව සෙනසුරාදා පන්තියකට යාම මට පහසු වීම.

Physics වලට ටික කාලයක් ටියුෂන් ගන්න ගිය ගුරුවරු තමයි අමිත් පුස්සැල්ල සර් හා ජගත් පටබැඳිගේ සර්. ජගත් සර්ගෙ පන්තියෙ නින්ද යන නිසාත් පුස්සැල්ල සර්ගෙ පන්තියෙ නින්ද යන්නෙ නැති නිසාත් මේ දෙකින්ම මම අයින් වුණා. මේ සර්ල දෙන්නගෙම රොටරියෙ තිබබ class වලටයි ගියෙ.

දැන් බලමු Biology වලට ගිය ගුරුවරු ගැන. මුල ඉඳලම ගියෙ ආචාර්ය හිරාන් අමරසේකර සර්ගෙ රොටරියෙ තිබිච්ච පන්තියට. නියම විදිහෙ ටියුෂන් ගුරුවරයෙක් කියන්න පුළුවන් පුද්ගලයෙක් තමයි හිරාන් සර්. කවදාවත් නින්ද ගිහිල්ලත් නෑ. එපා වෙලත් නෑ. ළමයින්ව පාඩමට හිත යොමු කරල තියාගන්න පුදුම හැකියාවක් තියෙන්නෙ.

බොහොම පොඩි කාලයක් චිත්‍රාණි ජයවීර මිස්ගෙ සිග්මා එකේ තිබ්බ Biology revision class එකට ගියා. නමුත් මිස්ගෙ අභාවය නිසා ඒ පන්තිය නැවතුනා.

ටියුෂන් ගුරුවරු ගැන කිව්වත් ඉස්කෝලෙ උගන්නපු ගුරුවරුන්වත් අමතක නොකර බැහැ. මම ගියෙ කොළඹ රාජකීය විද්‍යාලයට. 2005 හා 2006 අවුරුදු වල ජීව විද්‍යා අංශයෙන් A/L කළේ.

ඉස්කෝලෙ Biology කළේ පන්ති භාර ගුරුවරිය වෙච්ච කාන්ති දිසානයක මිස්. දැන් නම් ඉස්කෝලෙ උගන්නනවද කියන්න දන්නෙ නෑ. ඒ කාලෙ Bio කරන්න හිටියෙත් මිස්ල විතරයි. පිරිමි ගුරුවරු එක් කෙනෙක්වත් හිටියෙ නෑ.

Bio කියන කොට අමතක කරන්න බැරි නමක් තමයි Biology lab එකේ වැඩ කරපු රංබණ්ඩා අන්කල්. මොන පිස්සු වැඩක් Biology lab එක ඇතුළෙ කළත් කවදාකවත් තරහ ගත්තෙ නෑ.

Physics කළේ රණතුංග සර්. වැඩිය හිනා වෙන්නෙ නැති, හයියෙන් කතා කරන්නෙ නැති සර් කෙනෙක්. පන්තියට ආපු ගමන් ඉඳල උගන්නනව. උගන්නන ඒවයින් වැඩි ප්‍රමාණයක් තේරෙන්න ඇත්තෙ සර්ටම තමයි. එහෙම කිව්වෙ සර් උගන්නන විදිහ වැඩිපුර ගැළපෙන්නෙ Bio කරපු අපිට වඩා Maths කරපු අයට වීමයි.

Physics lab එකේ හිටපු නෝවා වත් රණතුංග සර්ව වගේම අමතක කරන්න බැරි කෙනෙක්. නෝවා වැඩිපුරම ඒ දවස්වල කළේ ජේසුස් ගැන ලියවිච්ච පොඩි පොතක් අතේ තියන් ඒක කියව කියව හිටපු එක.

Chemistry කළේ ඩයස් සිරිවර්ධන සර්. හොඳ සද්ධන්ත පුරුෂයෙක්. එකම එක දවසයි මට මතක විදිහට පුටුවෙ වාඩි වෙලා ඉගැන්නුවෙ. සමහර විට ඒ සර්ගෙ ඇගේ ප්‍රමාණයට පුටුවෙ ප්‍රමාණය හා පුටුවෙ සවි ශක්තිය නොගැලපීම වෙන්න ඇති. ඉගැන්නුවට වඩා කළේ වෙන වෙන ඒවා කියව කියව හිටපු එක.

Chemistry lab එකේ හිටපු එදිරිමාන්න අන්කල්වත් අමතක කරන්න බැහැ. අන්කල්ගෙ පුතා ඉගෙන ගත්තෙත් අපේ පන්තියෙයි.

A/L කරපු කාලෙ රාජකීය විද්‍යාලයේ හිටපු ගුරුවරුන්ගෙන් අමතක නොවෙන ගුරුවරු තමයි පටබැඳිගේ සර්, ශ්‍රීනාත් සර්, දංගල්ල සර්, ඉලේපෙරුම සර්, පොතුපිටිය මිස්, බස්නායක සර්, කළුපහන මිස්, කත්‍රිආරච්චි මිස් වගේ ගුරුවර, ගුරුවරියො. ඒ වගේම සුනාමියෙන් මිය ගිය රාජකීය විද්‍යාලයේ චිත්‍රාණි ජයවීර මිස්වත් ආදරයෙන් මතක් කරන්න ඕනෙ.

හරාකිරි || Harakiri (Seppuku)

2010-12-16T22:45:00.000+05:30

ආසද
ඔබත්
හරාකිරි ක්‍රමේට
බඩ
කපන්
ජපනෙක් වගේ
මැරෙන්න?

එකම ගීතය භාෂා තුනකින් ("මගෙ සුදු මාමේ", "Chinna Maamiye", "My Fair Uncle")

2010-12-07T12:01:00.000+05:30

පහත දක්වල තියෙන්නෙ සී.ටී. ෆර්නෑන්ඩු ගායනා කරන "මගෙ සුදු මාමේ" කියන ගීතය භාෂා තුනකින් ගායනා කරල තියෙන ආකාරයයි. මේකෙ ඉංග්‍රීසි ගීතය යම් තරමක් සිංහල අය අතර ජනප්‍රිය වුවත් දෙමළ ගීතය නම් ගොඩක් අය අහල නැතුව ඇති. සිංහල අය අතර මේ දෙමළ ගීතය ජනප්‍රිය නැති වුවත් දෙමළ ගුවන් විදුලි නාලිකාවලින් නම් සමහර වෙලාවට මේ ගීතය ප්‍රචාරය වෙනව අහන්න පුළුවන්.

"මගෙ සුදු මාමේ" ගීතය සී.ටී. ෆර්නෑන්ඩු විසින් ගායනා කරන වීඩියෝවක් හොයා ගන්න බැරි වුණා. ඒ නිසා මෙහි දක්වල තියෙන්නෙ "Los Caballeros"ල ගායනා කරපු "මගෙ සුදු මාමේ" ගීතය.

මේ තියෙන්නෙ දෙමළ ගීතය. (Chinna Maamiye)

මේ තියෙන්නෙ ක්‍රිස්ටෝෆර් පෝල් විසින් ගායනා කරන "My Fair Uncle" ගීතය.

"සරා" සහ "සුබා"

2010-11-16T22:59:00.000+05:30

මේ දවස්වල තිරගත වන චිත්‍රපට දෙකක් තමයි "සරා" සහ "සුබා". එම චිත්‍රපටි දෙකේ කතාවත් මේ දෙක අතරෙ තියෙන වෙනස්කම් ගැනත් තමයි මේ කියන්න යන්නෙ.

මුලින්ම "සරා" ගැන කියල ඉන්නම්. මේක "දෙරණ" රූපවාහිනී නාලිකාවේ ගිය "සරා" ටෙලිනාට්‍යය short & sweet කරල හදපු චිත්‍රපටියක්. කතාවෙ සාරාංශ මේකයි. සරා කියන්නෙ නාගරික මන්ත්‍රීවරියක්. ඇය ජීවත් වෙන්නෙ අඩු ආදායම් ලාභීන් ජීවත් වෙන ප්‍රදේශයක. සරා ජීවත් වෙන ප්‍රදේශය කඩා දාල එතන මහල් නිවාස සංකීර්ණයක් හදන්න පළාතේ මන්ත්‍රීවරායාගේ (මොහු ඇමතිවරයෙකි.) සහාය ගන්නව වෙනත් පුද්ගලයෙක්. සරාගේ විරුද්ධත්වය නිසා ඇමතිවරයා මේ කොන්ත්‍රාත්තුව ප්‍රතික්ෂේප කරනව. ඊට පස්සෙ අර තැනැත්තා සරා සිටින ප්‍රදේශයට වෙනත් පුද්ගලයකු යවා ප්‍රදේශයේ ආරවුල් ඇති කරන හැටිත්, සරා තමන් සිටින දේෂපාලන පක්ෂය අත් හැර තමාගේ ප්‍රදේශය විනාශ කරන්නට හදන පුද්ගලයාගේ පක්ෂයට එක් වන හැටිත්, අවසානයේදී සත්‍යය දැනගෙන තම ප්‍රදේශවාසීන් සරා විසින් බේරා ගන්නා හැටිත් ගැන තමයි මේ චිත්‍රපටියෙන් කියවෙන්නෙ.

දැන් බලමු "සුබා" ගැන. යකා මහත්තයා නම් මිනී මරුවකු විසින් තම බිරිඳ මරා දැමීම නිසා මිනී මරුවෙකු බවට පත් වන කළු මහත්තයා ගැන තමා මේ චිත්‍රපටියෙන් කියවෙන්නෙ. කළු මහත්තයා ගැන පරීක්ෂණ පවත්වන සියළුම පොලිස් නිළධාරීන් මරා දමන කළු මහත්තයා අවසානයේ තමන්ගේ පුතා වන පොලිස් අධිකාරවරයා විසින් අත් අඩංගුවට ගනු ලබනව. එල්ලුම් ගසට නියමිත වීමට පෙර මෙම පියා සහ පුතා හඳුනා ගනු ලබනව. "සුබා" කතා සාරාංශය මෙපමණයි.

දැන් මේ චිත්‍රපටි දෙකේ වෙනස්කම් බලමු. "සරා" කියන්නෙ වේගයෙන් ගලා ගෙන යන කතාවක්. කුතුහලයක් අති නොවුනත් බලන් ඉන්න පුළුවන් මට්ටමින් "සරා" චිත්‍රපටිය නිපදවල තියෙනව. "සුබා" කියන්නෙ ඉතාමත් මන්දගාමීව යන චිත්‍රපටියක්. මුල් විනාඩි 20ක විතර කාලය පුරාම දකින්නට ලැබෙන්නෙ ක්ලීටස් මෙන්ඩිස්ගෙ රංගනය විතරයි. තවත් ස්වල්ප දෙනෙක් මේ කාලයේදී රඟපෑවත් ඒවා එතරම් ප්‍රබල චරිත නෙමේ.

රූපගත කරල තියෙන දර්ශන තල දිහා බැලුවොත් "සරා" චිත්‍රපටිය "සුබා" චිත්‍රපටියට වඩා ගව් ගානක් ඉස්සරහින් ඉන්නව. "සුබා" වල දර්ශන තල ගැලපෙන්නෙ 80 දශකයේ හා 90 දශකයේ මුල් භාගයේ නිපද වූ චිත්‍රපටිවලට. ඒ වගේම කතාවත් හින්දි චිත්‍රපටියක කතාවකට සමානයි. ගොඩක් දුරට හින්දි කොපියක්ම වෙන්න පුළුවන්. අම්බලමක් වැනි ස්ථානයක් උසාවියක දර්ශනයක් රූපගත කිරීමට ගැනීමෙන්ම චිත්‍රපටියේ මට්ටම හිතා ගන්න පුළුවන් නේද?

නළු නිළියන් ගැන බැලුවොත් "සරා" චිත්‍රපටියේ රඟපාන නළු නිළියන් හොඳ රඟපෑමක නිරත වෙනවයි කියල කියන්න පුළුවන්. "සුබා" ගැන කිව්වොත් කිසිම හොඳ රඟපෑමක් දකින්නට ලැබෙන්නෙ නෑ. පොඩ්ඩක් හරි හොඳ රංගනයක නිරත වෙන්නෙ ක්ලීටස් මෙන්ඩිස් විතරයි. අනෙක් අය කරන්නෙ දෙබස් කට පාඩමින් කියවීම විතරයි. ඒ වගේම "සුබා" චිත්‍රපටියෙ චීන කටු වෛද්‍ය "දේශමාන්‍ය, දේශබන්ධු, දේශශක්ති, සමාජ සේවා සුභසාධන ආචාර්ය වෛද්‍ය ප්‍රසාද් දේශප්‍රියගෙ" දුර්වල රංගනයත් බලා ගන්න පුළුවන්.

චිත්‍රපටි දෙකේ ධාවන කාලය දිහා බැලුවොත් "සුබා" පැය දෙකක පමණ ධාවන කාලයක් සහිත චිත්‍රපටියක්. "සරා" නම් පැය එකහමාරකටත් වඩා අඩු ධාවන කාලයල් සහිත චිත්‍රපටියක්. ධාවන කාලයෙන් විතරයි "සුබා" චිත්‍රපටිය "සරා" ව ඉස්සර කරල තියෙන්නෙ. හැබැයි මේ විදිහටම "සරා" ටෙලිනාට්‍යය කෙටි කරන්න තිබුණ නේද කියල "සරා" බැලුවම ඕන කෙනෙකුට හිතෙන එක වලක්ව ගන්නත් බෑ.

සමස්තයක් විදිහට බැලුවම "සරා" සහ "සුබා" චිත්‍රපටි දෙකෙන් කෙනෙකුට බලන්න කියල නිර්දේශ කරන්න පුළුවන් "සරා" විතරයි. හැබැයි ඒකෙන් අදහස් වෙන්නෙ නෑ "සරා" කියන්නෙ උසස් චිත්‍රපටියක් බව. නමුත් "සුබා" ට සාපේක්ෂව "සරා" කියන්නෙ උසස් චිත්‍රපටියක්. "සුබා" කියන්නෙ චිත්‍රපටියක් නිර්මාණය නොවිය යුත්තේ කෙසේද කියල ඉගෙන ගන්න හොඳ චිත්‍රපටියක්.

මීට කලින් චිත්‍රපටි ගැන ලියපු බ්ලොග් සටහන්.

සිංහල කතා කරන දෙමළ චරිත

ඇත්තම "මචන්ල" සෙට් එක

"වාසනා ලොවක්"

අහෝ "තුෂාරා"

එකමත් එක රටක

"Dancing Star"

මම "ලීඩර්" බැලුවෙමි

Mega Star හි මෙගා ගුටි කෙළිය

2010-10-31T01:20:00.000+05:30

ඊයෙ පැවත්වෙච්ච ස්වර්ණවාහිණියෙ මෙගා ස්ටාර් තරගයෙ අවසන් ප්‍රතිඵලය අද අළුයම 12.30 ට විතර කමල් අද්දරාරච්චි විසින් ප්‍රකාශ කරනු ලැබුව. මෙගාර් ස්ටාර් වුනේ අජිත් වීරසිංහ. දෙවනිය වුනේ දයාසිරි ජයසේකර මන්ත්‍රීතුමා.

ඉතින් තරග ප්‍රතිඵල කියල ඉවර වුනාම තැගි දෙන්න සෝමා එදිරිසිංහයි, ස්වර්ණවාහිනී වැඩසටහන් අධ්‍යක්ෂක බුද්ධිකයි වේදිකාවට ආව. දයාසිරිටත් තරගයේ දෙවෙනියට හිමි තෑගි ලබා දුන්නා.

ඒත් තරගයෙන් දිනුව අජිත්ට තෑගි දෙන්න කලින් වේදිකාව උඩ රණ්ඩුවක් ඇති වුණා. ඒත් එක්කම බුද්ධිකයි, සෝමයි වේදිකාවෙන් බැහැල යනව පෙන්නුව. ඊට පස්සෙ එහෙම්ම මෙගා ස්ටාර් රූප රාමුත් නැවැත්තුව. ඊටත් පස්සෙ පැය කාලකින් විතර මෙගා ස්ටාර් අවසන් වූ බව ස්වර්ණවාහිනී තිරයේ පෙන්වනු ලැබුව.

ඕකෙන් මේකෙන් වුණේ අජිත් වීරසිංහ කිරුළු නොපලන් මෙගා ස්ටාර් වීමයි. හරියට අනුර බණ්ඩාරණායක වගේ. අනුර ඔටුන්න හිමි කුමාරයෙක් වුනත් කවදාවත් රජ වෙන්න එතුමටත් බැරි වුනානෙ.

සිද්ධියට අදාළ රූප රාමු පහත දැක්වේ. රූප රාමු අනුව පෙනී යන්නෙ නම් මේ සිද්ධියට කැළණියෙ වැඩ වාසය කරන දුටුගැමුණු කුමාරයා වග කිව යුතු බවයි.

ප.ලි. - මේ සිද්ධ වෙච්ච සිද්ධිය පිළිබඳ සැබෑ තොරතුරු කිසිවක් තාමත් මම නොදනිමි. මේ ලිව්වේ ස්වර්ණවාහිනියෙන් මම දුටු දේ පමණි. හෙට දින වන විට සැබෑ තොරතුරු දැන ගත හැකි වනු ඇත.

විශේෂඥයන්ගේ අනාවැකි || Expert opinions

2010-10-25T19:03:00.000+05:30

"මං හිතන්නෙ නෑ කිසි කෙනෙකුට ඕන වෙයි කියලා ගෙදර පරිඝනකයක් තියා ගන්න."

විඩිටල් ඉක්විප්මන්ට් සමාගමේ සභාපති කේන් ඔල්සන් 1977 දී.

"පරමාණුවෙහි ශක්තිය ප්‍රයෝජනයට ගැනීමට මිනිසා කිසි දිනෙක සමත් නොවනු ඇත."

භෞතික විද්‍යාව සඳහා නොබෙල් ත්‍යාගයෙන් පිදුම් ලත් රොබට් මිලිකෑන් 1923 දී.

"අනාගතයේදී පරිඝනකය ටොන් එකහමාරකට වඩා බරින් වැඩි නොවනු ඇත."

විද්‍යාවේ අනාගත වර්ධනයන් පිළිබඳ අනාවැකි පළ කරමින් Popular Mechanism සඟරාව 1944 දී.

"ගුවන් යානා සෙල්ලම් බඩු හැටියට නම් හරිම රසවත්. නමුත් යුද්ධයට එයින් ඇති ප්‍රයෝජනයක් නැහැ."

ප්‍රංශ යුධ උපාය මාර්ග පිළිබඳ මහාචාර්ය ෆර්ඩිනන්ඩ් ෆෝ.

(සමබිම 2010 ඔක්තෝබර් කලාපයෙන් උපුටා ගන්නා ලදී.)

එකම පක්ෂයක නොවෙනස් වූ ජනාධිපතිවරණ පොරොන්දුව

2010-10-23T08:41:00.000+05:30

"විධායක ජනාධිපතිවරණ ක්‍රමය අහෝසි කළ යුතුයි."

1982 දී හෙක්ටර් කොබ්බෑකඩුව.
1988 දී සිරිමාවෝ බණ්ඩාරණායක.
1994 දී චන්ද්‍රිකා කුමාරතුංග.
1999 දී චන්ද්‍රිකා කුමාරතුංග.
2005 දී මහින්ද රාජපක්ෂ.
2010 දී මහින්ද රාජපක්ෂ.

සිංහල කතා කරන දෙමළ චරිත

2010-10-18T23:16:00.000+05:30

චිත්‍රපටියක හෝ ටෙලිනාට්‍යයක දෙමළ පුද්ගලයකුගේ චරිතයක් තියෙන කොට ඒ චරිතය රඟපාන කෙනා බොහෝ වෙලාවට කතා කරන්නෙ දෙමළෙන් බව අපි දැකල තියෙනව. අද එක්තරා ගුවන් විදුලි නාලිකාවක ප්‍රචාරය වෙච්ච දෙමළ චරිත රැගත් කතාවකත් ඔවුන් භාවිතා කළේ සිංහල භාෂාව. ඒ වගේම දැන් තිරගත වන "ඉර හඳ යට" චිත්‍රපටියෙත් ත්‍රස්තාදී නායකයකු වන පෝල් මාස්ටරුත් එක් අවස්ථාවකදී සිංහලෙන් කතා කරනව. කිසිම දිනෙක සිංහල කතා කරල ඇතැයි සිතිය නොහැකි එවැනි චරිතයක් සිංහලෙන් කතා කරන විට කෘතිම බවක් ඇතිවයි මට පේන්නෙ. මේ විදිහට සිංහල භාවිතා කරන්න හේතුව බොහෝ විට චිත්‍රපටිය නරබන්නෙ සිංහලයන් පමණක් වීමත් වෙන්න පුළුවන්. නමුත් එවන් අවස්ථාවලදී චරිතයට දෙමළෙන් කතා කිරීමට ඉඩ දී සිංහල උපසිරසි භාවිතයෙන් එහි තේරුම ප්‍රේක්ෂකයාට දැන ගැනීමට සැලැස්වීම වඩා ප්‍රායෝගික බවයි මගේ හැගීම.

ඒත් ගුවන් විදුලි නාට්‍යයකදි සිංහල උපසිරසි භාවිතා කරන්න නොහැකි වීම ගැටළුවක් වෙන්න පුළුවන්. මේකට විසඳුමක් විදිහට මට පේන්නෙ නාට්‍යයට හඬ කවන ශිල්පීන් ලෙස දෙමළ ජාතිකයන්ව යොදා ගැනීම. එතකොට ඔවුන්ගේ සිංහල උච්චාරණය අනුව නාට්‍යයයේ කෘතිම ගතිය යම් තරමට හෝ නැති කර ගන්න පුළුවන් බවයි මගේ මතය.

ඒ වගේම සිංහල චිත්‍රපටියක හෝ ටෙලිනාට්‍යයක දෙමළ චරිතයක් ඇති විට ඒ සඳහා සිංහල නළු නිළියන් වෙනුවට දෙමළ නළු නිළියන් යොදා ගැනීමෙන් නාට්‍යයයේ ඇති කෘතිම ගතිය අඩු කර ගන්න පුළුවන්. ලංකාවෙ ඕන තරම් දක්ෂ දෙමළ නළු නිළියන් ඉන්න නිසා ඔවුන්ව සිංහල චිත්‍රපටි සඳහා එක් කර ගන්නත් පුළුවන්. ඒ වගේම අපේ රටේ සිංහල චිත්‍රපටි කර්මානතයටත් වඩා අගාධයේ තියෙන (ඇත්තම කියනවනම් ඇත්තටම නැති) දෙමළ චිත්‍රපටි කර්මාන්තයට නව පණක් දෙන්නත් මේ දෙමළ නළු නිළියන් යොදා ගැනීම හේතුවක් වෙයි.

ඒත් ප්‍රධාන දෙමළ චරිතය කරන්න හැමදාමත් ඉන්දියාවෙන් නළු නිළියන් ආනයනය කළොත් නම් කවදහරි අපේ නළු නිළියන්ගෙත් බඩට වදීවි.

පුංචි කාලෙ අහපු, බලපු සින්දු - 1

2010-10-11T22:32:00.000+05:30

අද මම ලියන්නෙ මම පුංචි කාලෙ ආසාවෙන් අහපු, බලපු සින්දු කීපයක් පිළිබඳව. මේ බොහොමයක් සින්දු මට වයස අවුරුදු 5ක් වෙන්න කලින් අහපු ඒවයි. ඒ නිසා ඒ ගොඩක් සින්දු වලට එදා වගේම තාමත් මම ආසයි.

"මොනවද මුත්තේ" කියන සින්දුව තමයි මට මතක පරණම සින්දුව. මේක ගායනා කරන්නෙ රෝහණ වීරසිංහ මහත්මයත් එක්ක තවත් ළමා ගායකයෙක්. ළමා ගායකයාගෙ නම නම් මම දන්නෙ නැහැ. මේ සින්දුවෙන් කියවෙන්න කුඩා ළමයෙක්ගෙ සීයා කෙනෙක් අනාගතයේ ප්‍රයෝජන ගැනීමට අඹ පැලයක් සිටු වන එක ගැන ඒ කුඩා දරුවාට පැහැදිලි කර දෙන ආකාරය. මේ සින්දුව ඉස්සර නම් රූපවාහිනියෙ ප්‍රචාරය වුණාට දැන් නම් ප්‍රචාරය වෙන්නෙම නැති තරම්.

"අ යන්න කියන්න" මම කැමති ඊළඟ ළමා ගීතය. ගීතය ගායනා කරන්නෙ නන්දා මාලිනී මහත්මිය. ගීතය රචනා කරල තියෙන්නෙ මහාචාර්ය සුනිල් ආරියරත්න විසින්. සංගීතය නිර්මාණය කරල තියෙන්නෙ මර්වින් පෙරේරා මහතා විසින්. මේ සින්දුව මට මතක විදිහට ඉස්සර උදේ හතට විතර හැමදාම රූපවාහිනියෙ ප්‍රචාරය කළා. ඒත් දැන් මේ සින්දුවත් අහන්න ලැබෙන්නෙ බොහොම කලාතුරකින් තමයි.

"කියන්න සුළඟේ" කියන ගීතය මම කැමති තවත් ලස්සන ළමා ගීතයක්. ගීතය රචනා කිරීම හා සංගීතය නිර්මාණය කිරීම කරල තියෙන්නෙ ක්ලැරන්ස් විජේවර්ධන මහත්මයා විසින්. ගීතය ගායනා කරන්නෙ ඇනස්ලි මාලේවන මහත්මයා හා ලිලන්ති කරුණානායක මහත්මිය විසින්. (මම අහල තියෙන විදිහට නම් ලිලන්ති කරුණානයක මහත්මිය ඔය ගීතය ගායනා කරන දවස්වල නම් කුඩා දරුවෙක්.)

අන්තිමට අද මම දාල තියෙන සින්දුව තමයි එදත් අදත් එක වගේම ජනප්‍රිය "නිල් අහස් තලේ" කියන සින්දුව. මේක තිස්ස අබේසේකර මහත්මයා විසින් නිර්මාණය කරපු "මහ ගෙදර" චිත්‍රපටියේ එන ගීතයක්. මේක ළමා ගීතයක් කියල සෘජුවම කියන්න බැරි වුණත් මේ ගීතය දැන් වැඩියෙන්ම ජනප්‍රිය වෙලා තියෙන්නෙ ළමා ගීතයක් විදිහටයි. ගීතය ගායනා කරන්නෙ මොරිස් විජේසිංහ, නීලා වික්‍රමසිංහ, උපාලි රංජිත් හා චිත්‍රා සෝමපාල විසින්. සංගීතය නිර්මාණය කරල තියෙන්න සරත් දසනායක මහත්මයා විසින්. ගීතයට රංගනයෙන් දායක වෙලා තියෙන්නෙ විජය කුමාරතුංග, තිස්ස අබේසේකර, ශ්‍රියානි අමරසේන හා සෝමලතා සුබසිංහ යන මහත්ම මහත්මීන්. සිංහල සිනමාවෙ දැවැන්තයො දෙන්නෙක් ඉන්න මුල් ගීතයට තමා මම වැඩියෙන්ම කැමති. නමුත් මට මුලින්ම මේ ගීතය අසන්නට ලැබුණෙ නම් කීර්ති පැස්කුවල් මහත්මයාගෙ හඬින්. මේ සින්දුව මම සලකන්නෙ සිංහල සිනමාවෙ තිබෙන එක් අමරණීය ගීතයක් විදිහට.

ඉතින් තවත් ළමා ගීත කීපයක් එක්ක ඊලඟ බ්ලොග් සටහනින් හමුවෙන්නම්.

රංගොජා එන විට පාර කාපට් වීම

2010-09-30T20:33:00.000+05:30

පාණදුරේ තියෙන රත්තරන් කොතක් තියෙන පන්සලකට අවුරුදු 200ක් වුනයි කියල ඒකෙ තුන්මහල් ගොඩනැගිල්ලකට මුල්ගල් තියන්න රංගොජා වහන්සේ ඔක්තෝම්බර් මාසෙ දහවෙනිද පාණදුරේට එනවලු. ඉතින් ඒ නිසා මේ මහ වැහි අස්සෙ පන්සලට යන පාරත් අවහිර කරගෙන කාපට් කරනවලු.

ඊයෙ පටන් ගත්ත කාපට් කිරිල්ලත් වැස්ස නිසා අතරමග නවත්තන්න වුනාලු. අදත් පාරෙ ටික දුරක් කාපට් කරනවලු. වහින වෙලාවට කාපට් කරන ටිකත් හේදී ගෙන යනවලු.

පන්සලේ නායක හාමුදුරුවොත් එසේ මෙසේ හාමුදුරු කෙනෙක් නෙමේලු. කැළණිය විශ්ව විද්‍යාලෙ මළ භාෂාවක් උගන්වන මහාචාර්යය කෙනෙක්ලු. ඉස්සර පන්සලේ තිබ්බ ශ්‍රී සුමංගල විද්‍යාලයේ ප්‍රාථමික අංශයත් දේවතා එළි විහිදෙන අඹ ගහක් නිසා ඉවත් කරපු කෙනෙක්ලු. හැබැයි ඉස්කෝලෙ අයින් කර ගත්තු ගමන් දේවතා එළි විහිදෙන අඹ ගහත් කපල දැම්මලු. දැන් එතන තිබ්බ පන්ති ටික කඩල පන්සලේ තුන් මහල් ගොඩනැගිල්ලක් හදන්න යනවලු. පන්සලට අඩු වෙලා තිබ්බෙත් තට්ටු තුනක ගොඩනැගිල්ලක් විතරයි මගෙ හිතේ. තනි තට්ටුවෙ ඉඳල නිවන් යන්නත් බැරිව ඇතිනෙ හාමුදුරුවන්ට.

හැම අවුරුද්දෙම පාණදුරා වාදෙ තිබ්බ තැන අනුස්මරණ ශාලාවක් හදන්න හාමුදුරුවො සල්ලි එකතු කරනවලු. එතන අටවපු මඩුව වටේට කැලේකුත් වැවිලලු. ඒ මඩුවෙන් ගන්න එකම ප්‍රයෝජනේ හරක් බඳින එකයි, මිනිස්සු කුඩු ගහන එකයි, බොන එකයි, බූරුව ගහන එකයිලු.

හාමුදුරුවන්ගෙ හැටි මෙහෙම නිසා මේ තට්ටු තුනේ ගොඩනැගිල්ලත් තව අවුරුදු කීයක් හදයිද දන්නෙ නෑලු. හැම අවුරුද්දෙම පාරත් කාපට් කරයිලු ඒ නිසා. හාමුදුරුවො නිවන් යන්න කලින් කීයක් හරි ඊළඟ ආත්මෙටත් එක්ක හම්බ කර ගන්නත් ඕනැනෙ. ඒ විතරක්යැ. පන්සලේ ඊළඟ නායක කම ගන්න ඉන්න තමන්ගෙ ඥාතියටත් කීයක් හරි හම්බ කර ගන්න පොටක් හොයල දෙන එක වල පයයි ගොඩ පයයි ඉන්න හාමුදුරුවන්ගෙ යුතුකමකුත් නොවැ.

රංගොජාවත් රට වටේ පයින්ම දක්ක ගෙන ගියා නම් හරි. එතකොට හැම නගරෙකම මූලික පහසුකම්වත් වැඩි දියුනු වෙයිනෙ. ඒ වගේම රංගොජාගෙ සහෝදර සමාගමටත් කීයක් හරි කොමිස් ගහ ගන්නත් පුළුවන් වෙයිනෙ. දැන් ඉතින් රංගොජාට අභියෝගයක් වෙච්ච මනුස්සයත් මහ උළු ගෙදර බත් කන නිසා රංගොජාට පාරෙ බැහැල පයින් යන එකත් ප්‍රශ්නයක් නෙමේනෙ.

චිරන් ජයතු දයාවංශ ජයකොඩි මහත්මයාණෙනි

2010-09-27T23:02:00.000+05:30

මේ සැප්තැම්බර් මාසෙ මට වගේම තවත් ගොඩක් අයටත් විශේෂ වෙන්නෙ සාහිත්‍ය මාසය යෙදිල තියෙන හින්ද. ඉතින් හැමෝම බලන්නෙ පුළුවන් තරම් අඩු මුදලකට වැඩි වටිනාකමක් තියෙන පොත් මිලදී ගන්නනෙ. මේ පාර වැඩිම වාසියක් පාඨකයාට ලබා දීපු පොත් ප්‍රකාශකයා විදිහට මට හිතෙන්නෙ "දයාවංශ ජයකොඩි" මහත්මයායි. ඒ මහත්මයා මේ පාර සතියක් පුරාවටම පොත් දහයක් රුපියල් දහසක මුදලට මිලදී ගන්න අවස්ථාවක් ලබා දුන්නා. ඒ කියන්නෙ එක පොතක් රුපියල් සියයක මුදලකට.

ඉතින් මේ පොත් ප්‍රදර්ශනය පටන් ගත්තු සැප්තැම්බර් 14 වෙනිද උදේ 10 වෙද්දිම දයාවංශ ජයකොඩි මහත්මයගෙ පොත් ප්‍රදර්ශනාගාරයට ගියා පොත් මිලදී ගන්න. මුලින් හිතාගෙන හිටියෙ වැඩි සෙනඟක් ඉන්න එකක් නැහැ කියලයි. ඒත් ගියාමයි තේරුනෙ ටිකක් කලින් ගිය එකේ වටිනාකම. ඒ තරමටම පොත් ගන්න සෙනඟ ඇවිත් හිටිය.

මේ තියෙන්නෙ එදා මම මිලදී ගත්තු පොත්.

මම දයාවංශ ජයකොඩි මහත්මයගෙ පොත් ප්‍රදර්ශනයට ගියෙ ලේඛකයො කීප දෙදෙනෙක්ගෙ පොත් හැකි පමණ මිලදී ගන්න හිතා ගෙන. ඒ ලේඛකයො දෙදෙනා තමයි කේ.ජී. කරුණාතිලක මහත්මයා හා ඔරුවල බන්දු මහත්මයා. ඉතින් එතන තිබිච්ච මේ ලේඛකයො දෙදෙනාගෙ හැම පොතක්ම මිලදී ගත්තා.

මේ ලේඛකයන් දෙදෙනාගෙන් මිලදී ගන්න පොත් තිබ්බෙ පොත් 5ක් විතරයි. ඉතින් ඒ නිසා හෙන්රි ජයසේන මහත්මයගෙත්, ටී.බී. ඉලංගරත්න මහත්මයගෙත්, චන්දන මෙන්ඩිස් මහත්මයගෙත්, සිරිලාල් කොඩිකාර මහත්මයගෙත්, ආචාර්ය ජී.ජී. පුංචිහේවා මහත්මයගෙත් පොත් මිලදී ගත්තා.

ඊට පස්සෙ ආපහු ප්‍රදර්ශනයට නොතිබ්බ පොත් තුනකුත් මිලදී ගත්තා. මේ තියෙන්නෙ ඒ පොත් තුන. මේ පොත් තුන මිලදී ගන්න කොට වෙනද දෙන 20% වට්ටම විතරයි ලැබුනෙ.

මම කැමතිම ලේඛකයෙන් වන ඔරුවල බන්දු මහත්මයගෙ දැනට මිලදී ගන්න පුළුවන් හැම පොතක්ම මිලදී ගන්නත් මේ ප්‍රදර්ශනය නිසා මට හැකි වුණා. ඒ වගේම කේ.ජී. කරුණාතිලක මහත්මයගෙත් පොත් සියල්ලම නොවුනත් පොත් ගොඩක් එකතු කරගන්න මට පුළුවන් වුණා.

ඉතින් අවසන් වශයෙන් කියන්න තියෙන්නෙ ඊළඟ වසරෙදිත් දයාවංශ ජයකොඩි මහත්මයාට මේ වගේ පොත් ප්‍රදර්ශනයක් තියන්න ලැබෙන්න හැකියාව ලැබේවා කියලයි.

පුංචි කාලෙ බලපු කාටූන්

2010-08-12T15:32:00.000+05:30

පල්ලෙහා දාල තියෙන්නෙ මම පුංචි කාලෙ ආසාවෙන් බලපු කාටුන් කීපයක්. "දොස්තර හොඳ හිත", "පිස්සු පූසා", "හා හා හරි හාවා", "ගලිවරයන්ගේ සුවිසැරිය" වගේ මම තවමත් ප්‍රිය කරන කාටූන් කීපයක වීඩියෝ කීපයක්. මේවා බලද්දි ආපහු පුංචි කාලෙට යන්න හිතෙනව.

මේවයින් දැන් ඉදල හිටල හරි පෙන්නන්නෙ "පිස්සු පූස" විතරයි. ඒකත් දැන් ගොඩක් කාලෙකින් පෙන්නුවෙ නෑ. දැන් ඉන්න ළමයින්ට මේ වගේ කාටූන් එකක් රස විදින්නත් බැරිව ඇති. ඊටත් වඩා මේව පෙන්නුවත් බලන්නත් වෙලාවක් නැතුව ඇති. මේ කාටූන් අයිති වෙන්නෙ ටයිටස් තොටවත්ත මහත්මයාගෙ යුගයට. ඒ මහත්මයා අඩු තාක්ෂණයක් තිබ්බ ඒ කාලෙ කරපු වැඩ ටිකවත් තාක්ෂණය අතින් ගොඩක් දියුණු දැන් කාලෙ කෙරන්නෙ නැහැ කියලයි මට හිතෙන්නෙ. දැන් ළමයි වෙනුවෙන් රූපවාහිනී නාලිකාවල ප්‍රචාරය වෙන වැඩසටහන් එච්චර ජනප්‍රිය වෙන් නැත්තෙ ඒ නිසා වෙන්න ඇති. එදාට වඩා රූපවාහිනී නාලිකා බහුල අද කාලෙ හරි නම් වෙන්න ඕන ගුණාත්මක බවින් ඉහල වැඩසටහන් වැඩියෙන් නිෂපාදනය වීම. ඒත් දැන් වෙන්නෙම පුළුවන් තරම් කසිකබල් ටෙලි නාට්‍යය නිෂ්පාදනය වීම. ටයි මාමා අංශභාග රෝගයට ගොදුරු නොවී හිටියනම් තවත් අළුත් නිර්මාණ අපිට දැක බලා ගන්න තිබුණා.

කාටුන් නොවුනත් "රොබින්සන් අන්දරය", "මායා බන්ධන" වගේ වැඩසටහනුත් දරුවන් අතරේ ඒ දවස්වල හොඳට ජනප්‍රිය වුණා. මේ කාලෙ ජනප්‍රිය වෙච්ච කාටුන් එක තමයි "ටිං ටිං". මේ අපි පහේ, හයේ පංතිවල හිටපු කාලෙ. මේව අතුල රන්සිරිලාල් මහත්මයාගෙ වැඩ.

පස්සෙ කාලෙක සිරසෙන් කරපු "සූර පප්පා" අතිශයින් ජනප්‍රිය වුණා. ඒ වගේම "කව්ද බෝයි" වගේ කාටුන් එහෙමත් ටිකක් ජනප්‍රිය වුණා. මේව ගියේ මම O/L, A/L කරන කාලෙ.

කව්රුහරි කෙනෙක් ටයි මාමා හඬ කවපු කාටූන් මිලදී ගන්න පුළුවන් තැනක් දන්නවනම් කියල යන්නත් අමතක කරන්න එපා.

ජය පිරිතෙන් නැගිට මහ පිරිතෙන් නින්දට යාම

2010-08-09T21:07:00.000+05:30

සිංහල ගුවන් විදුලි නාලිකාවල අළුත්ම ප්‍රවනතාවය තමයි උදේට, හවසට හා රාත්‍රියට පිරිත්, ජය මංගල ගාථා, පන්සිල් ආදිය ප්‍රචාරය කරවීම. ඒ නිසා දැන් අපිට පුළුවන් වෙලා තියෙනවා උදේට එළාම් එක විදිහට ජය පිරිත යන වෙලාව තියාගෙන කුණු කෙළ පිටින්ම පිරිත් අහගෙන උදෙන්ම නැගිටින්නටත්, හවසට හීනියට අඩියක් ගහන ගමන් ජය මංගල ගාථා ආදී එකී මෙකී නොකී ගාථා අහන්නටත්, රෑට නිදි මර ගාතෙන් මහ පිරිත අහල නින්දට යන්නටත්.

ඇත්තටම මට තියෙන ප්‍රශ්නෙ තමයි මේ පිරිත් අහන අය හෝ අල්ලපු ගෙදරටත් එක්ක ඇහෙන්න පිරිත් දාන අයට ඇත්තටම මේ පාලි වලින් කියන මේ වචන ටික තේරෙනවද කියන එක. අඩු ගානෙ ඒ වචන ටික තේරුනත් ඒ ගාථාවල කියන දේවල් මේ මිනිස්සු පිළිපදිනවද කියන ප්‍රශ්නය මට තියෙනව. නැත්නම් උපන් දා ඉදලම කරපු පස් පව් දුරු කර ගන්නට මේ පිරිත් අහනවද කියලත් මට හිතෙනව.

ඇත්තටම මේ පිරිත් විදිහට කියන වචනවල කිසියම් හෝ බලයක් තියෙනවනම් මේ පිරිත් අහන කිසිම කෙනෙකුට කිසිම අපල උපද්‍රවයක් සිද්ධ වෙන්න විදිහක් නෑ. මේ පිරිත් වලින් වන එකම දේ විදිහට මට තේරෙන්නෙ මිනිස්සුන්ට මානසිකව ලැබෙන සැනසීම විතරයි කියලයි මට නම් හිතෙන්නෙ. ඒ වගේමයි සමහරුන්ට මේ පිරිත් කියල දෙයක් තියෙනවයි කියල මතක් වෙන්නෙ මරණාසන්නව ලෙඩක් හැදිල ඇඳට වැටිල ඉන්නකොට තමයි. ඉතින් ඒ වගේ වෙලාවට පිරිත් කීමෙන් ඇති වෙන එකම ප්‍රයෝජනේ විදිහට මට පේන්නෙ ලෙඩාට හා ඔහුගේ ඥාතීන්ට ඇති වන මානසික සැනසීම විතරයි.

මට තියෙන තවත් ප්‍රශ්නයක් තමයි ඇයි මේ පිරිත් කියන කොට වචන ඇදලා කියන්නෙ ඇයි කියන එක. බුදුන් වහන්සේවත් එහෙම පිරිත් කිව්වද කියල මට නම් සැකයි. අනික ඇයි අපි නොතේරෙන බාසාවකින් පිරිත් කියන්නෙ කියලත් මට ප්‍රශ්නයක් තියෙනව. හැමෝටම තේරෙන සිංහලෙන් නොකියන්නෙ ඇයි? සිංහලෙන් කිව්වොත් පිරිතෙ බලය අඩු වෙනව හරි නැති වෙලා හරි යනවද? එක් ගුවන් විදුලි නාලිකාවක නම් සිංහලෙන් පිරිත් විකාශනය කලත් ඒකත් අහන් ඉන්න තරම් රසවත් තත්ත්වයක නැහැයි කියලයි මට හිතෙන්නෙ.

අනිත් එක තමයි මේ විදිහට පිරිත් විතරක් ගුවන් විදුලි නාලිකාවල විකාශය කළාම අනිත් ආගමිකයන්ට වන අසාධාරණය. හරි නම් මුස්ලිම් ආගමිකයන් ආගම කියන පස් වතාවෙම ඒකත් විකාශනය කරන්න ඕන. එතකොට මුස්ලිම් ජාතිකයොත් ඒ ගුවන් විදුලි නාලිකාව අහන්න එක් වෙනව. ඒ වගේම තමයි හින්දු හා ක්‍රිස්තියානි ආගමේත් ආගමික කටයුතු ප්‍රචාරය කරන්න ඕනෙ. බෞද්ධයන් වැඩි දෙනෙක් බුදුන් වහන්සේට වඩා හින්දු දෙවිවරු විශ්වාස කරන නිසා තව තවත් අසන්නන් ගුවන් විදුලි නාලිකා වටා එක් වේවි.

ලාංකිකයන්ට රාජකාරියට වඩා දේව කාරිය ලොකු නිසා මේ විදිහට සර්ව ආගමික වතාවත් විකාශනය කරන ගුවන් විදුලි නාලිකාව වටා අසන්නන් වැඩි දෙනෙක් එක වේවි.

අද දින කෝච්චියේදී දුටු අවාසනාවන්ත සිදු වීමක්

2010-08-07T20:59:00.000+05:30

මේ සිද්ධිය වුනේ අද දහවල් 12.10ට කොළඹ කොටුවෙන් දකුණු කළුතර බලා යන දුම්රියේදීයි.

දුම්රිය ගල්කිස්සට පැමිණි පසු මා සිටි දුම්රිය පෙට්ටියට කාන්තාවක් හා පිරිමියෙකු අවුරුදු 6ක් පමණ දරුවකු හා මාසයක් වයස යැයි පැවසූ දරුවකු වඩා ගෙන පැමිණියා. ඔවුන් පැමිණ සිටියේ මාසයක් වයස යැයි පැවසූ දරුවාගේ ශල්‍ය කර්මයකට අවශ්‍ය යැයි පැවසූ මුදල් ලබා ගැනීමටයි. එම දරුවාගේ හිස අසාමාන්‍ය ලෙස විශාල වී තිබුණි. ඔවුන් පැවසූ ආකාරයට මුදල් ඉල්ලනු ලබන්නේ එම ළදරුවාගේ හිසේ තිබෙන ජලය ඉවත් කිරීමේ ශල්‍ය කර්මයක් සඳහායි. ඔවුන් එම ළමයාගේ MRI ස්කෑනර් යන්ත්‍රයකින් හිසෙහි විවිධ පැති වලින් ගත් පිටපතක්ද රැගෙන විත් තිබුණි.

අවාසනාවන්ත සිද්ධිය මෙය නොවේ. මේ කාන්තාව මීට පෙරත් මෙවැනිම ළදරුවෙකු වඩා ගෙන සිඟමනේ යෙදෙනු පසුගිය සතියේදී මෙන්ම මීට පෙරත් මා දැක තිබීමයි. නමුත් ඇය මීට පෙර රැගෙන ආවේ මේ ළදරුවා නොවේ. සතියක කාලයක් තුළ ළදරුවකුගේ හිසක් මේ තරම් ඉක්මනින් විශාල විය නොහැකිය. මේ කාන්තාවද ඉතාමත් කෘෂ වූ සිරුරක් ඇත්තියකි. සුද්ධ සිංහලෙන් කියනවා නම් හරියට කුඩු ගසන කාන්තාවක් වැනිය. වෙනත් දිනවලද ළදරුවකු වඩා ගෙන කෝච්චි පෙට්ටියෙන් පෙට්ටියට මාරු වෙමින්, ළදරුවාට අව් රශ්මියෙන් සිදු වන පීඩාවද නොතකා සිඟමනේ යෙදෙයි. කිසිම දිනක ඇය වඩා ගෙන සිටින ළදරුවා හඩන්නේවත්, දගලන්නේවත් නැත. විශේෂත්වය වූයේ අද දින ඇය පැමිණ සිටියේ වෙනදා මෙන් තනිවම නොව තවත් පිරිමියෙකු හා දරුවකු සමග වීමයි.

මා මේ ගැන විස්තර ඔවුන්ගෙන් ඇසූ විට ඔවුන්ගේ ප්‍රතිචාරය වූයේ "මහත්තයාට ඒ ගැන විස්තර ඕනෙ නෑනෙ" යැයි පවසා අඟුලාන දුම්රිය ස්ථානයෙන් බැස ඊළඟ පෙට්ටියට මාරු වී යාමයි.

ඔවුන් පැවසූ විස්තර අනුව ළදරුවාගේ ශල්‍ය කර්මය සිදු කරන්නේ ලබන සතියේදීය. නමුත් ස්ථිර දිනයක් පැවසුවේ නැත. ශල්‍ය කර්මය සිදු කරනු ලබන්නේ කොළඹ ජාතික රෝහලේදීය. නමුත් මට ඇති ගැටළුව නම් නොමිලේ සිදු කරන එම ශල්‍ය කර්මයට ඔවුන් මුදල් එකතු කරන්නේ කුමක් සඳහාද යන්නය. අඩු ගණනේ ඔවුන් එම දරුවාට ඇදුමක්වත් අන්දවා තිබුණේ නැත. එම ළදරුවාගේ නියම දෙමාපියන් ඔවුන් නම් එසේ එම ළදරුවාට සලකන්නේ කුමක් නිසාදැයි මට සිතා ගත නොහැක.

මේ ගැන මම මාධ්‍යවේදිනියක් වන ඉන්දු පෙරේරා මහත්මියට කී විට ඈ කීවේ මෙවැනි දේවල් අද ඉතා සුලබ බවත්, ළදරුවා මැරෙන තෙක්ම ඔවුන් ළදරුවා විකුණා මුදල් සොයනු ඇති බවත්ය. ඇය මෙය උපමා කළේ සිඟන්නාගේ තුවාලයටය. ළදරුවාට ප්‍රතිකාර ලබා දුන හොත් ඔවුන්ගේ ආදායම් මාර්ගය නැති වී යන නිසා ඔවුන් කිසි දිනෙක ළදරුවාව ශල්‍ය කර්මයට භාජනය නොකරනු ඇති බව ඇය පැවසුවාය. මෙය අද සමාජයේ ඉතාමත් සුලභ සිදු වීමක් බවත් ඇය පැවසුවාය.

තමන්ගේ දරුවන් මෙන්ම අනුන්ගේ දරුවන්වත් විකුනන් කන අම්මලා ඉන්න අපේ රටේ මතු දරු පරපුරට දෙයියන්ගේම පිහිටය!

බෝම්බයක් පිපිරීම වැනි දෙයකදී කම්පනය නිසා රෝගී වීම

2010-07-29T17:26:00.000+05:30

උපදෙස් - මහාචාර්ය රවින්ද්‍ර ප්‍රනාන්දු.

"බෝම්බයෙන් හටගත් කම්පනය නිසා විශාල පිරිසක් රෝහල් ගත කර ඇත."

මෙවැනි සිද්ධි පිළිබඳ ඔබටත් හොඳින් හුරු පුරුදු විය හැකිය. ඒ අනුව බෝම්බයක් පිපිරීමකදී ඊට ලක් වී තුවාල ලැබූවන් මෙන්ම කම්පනයට ලක් වූවන්ද රෝහල් ගත කෙරේ. මෙවැනි තත්ත්වයකින් මිනිසකුට විය හැකි ආපදාව කුමක්ද?

කම්පනය යනු කුමක්දැයි මෙහිදී විමසා බැලීම වටියි.

කම්පනය දෙආකාරයකි. ඒ ශාරීරික කම්පනය හා මානසික කම්පනය වශයෙනි.

ශාරීරික කම්පනය - ලොකු තුවාලයක්, විශාල ලෙස ලේ ගැලීමක්, අධික ලෙස වමනය හෝ පාචනය, කොදු නාරටියේ ස්නායුවලට හානියක් සිදුවීම, විෂ වර්ගයක් ශරීර ගත වීම වැනි හේතුන් මත කෙනෙකු ශාරීරික කම්පනයට ලක් විය හැකිය.

මානසික කම්පනය - හදිසියේම ඉතාමත් කනගාටුදායක ආරංචියක් අසන්නට ලැබුණු විට, තමන් හදිසි අනතුරකට ලක් වුණු විට, සර්ප දෂ්ටනයක් සිදු වූ විට, තමන්ට බරපතල ලෙස තුවාල සිදු වූ විට කෙනෙකු මානසික කම්පනයට පත් වනු ඇත. සමහරු ශාරීරික කම්පනය හා මානසික කම්පනය යන දෙකම එකවර ඇති වීමටද පුළුවන.

මේ කම්පන දෙකේදීම රෝගියා ක්ලාන්තය හැදී වැටීම , සුළු වෙලාවකට සිහිමඳ ගතියක් ඇති වීම සිදු වනු ඇත. සිහිමඳ ගතිය දුරු වන විට ශාරීරික ආබාධයක් නැති කෙනෙකු වුවත් මානසික කම්පනය සිදුවීමෙන් පසු සිතට දැඩි ආවේග ඇතිවීම, කෝපය හෝ දැඩි කනගාටුවක් ඇතිවීම, මානසික රෝගී තත්වයක් (නින්ද නොයාම, රැකියාවට යාමේ අපහසුව, පවුල් ජීවිතය අසාර්ථක වීම වැනි තත්වයන්) පළ කිරීම සිදු විය හැකිය.

ශාරීරික කම්පනයක් නම් කෙලින්ම රෝහල් ගත කළ යුතුය.

මානසික කම්පනයක් ඇති වී සිහි මඳ තත්ත්වයෙන් පසු වන්නේ නම් රෝගියාට විනාඩි කිහිපයක් එසේ ඉන්නට ඉඩදී සිහිය පැමිණි පසු ඉන්පසු පළවන ලක්ෂණ වලට ප්‍රතිකාර කළ යුතුය. නමුත් සර්ප දෂ්ටනයක්, හදිසි අනතුරක් වැනි දෙයක් නම් වහා රෝහල් ගත කළ යුතුවේ.

කිරි අම්මා

2010-06-30T18:47:00.000+05:30

කිරි දුන්නේ දරුවන්ටයි සිරුරෙන් ඈගේ
පිරිපුන් මිනිසුන් වැඩුනේ බලයෙනි ඈගේ
ඒ කළ ගුණ නොදන්න හිස් මිනිසුන් වාගේ
එපා එපා මස් කන්නට කිරි අම්මාගේ

අහිංසක තිරිසන් ගවයාටත් පණයි තියෙන්නේ
එවන් සතෙකු අහෝ අකාලයේ කිමද මරන්නේ
ටිකක් හිතල බලනු ඌ පිරිසිදු තණකොල කන්නේ
නමුත් මිනිසත් බව ලැබු ඔබ ඇයි මලකුණු කන්නේ
කෙනෙක් තිස්පස් වසරක් කෑවොත් ගවමස් උයලා

බලනු තුන්සිය හැටපහ වැඩිකර තිස්පහ යොදලා
ගණන දොළොස් දහස් හත්සිය හැත්තෑ පහක් වෙලා
ඔබට තේරුනාද ඔබ කල පව් දුර දිග නොබලා

මුදල් තන්හාවෙන් සමහරු ගවයා විකුණන්නේ
අහිංසක සතකුගෙ ඉරණම ඉන්පසු විසදෙන්නේ
යලිත් ඒ මුදලින් මස් ගෙනවිත් රස කර කන්නේ
තමන් විකුණූ ගවයගෙ මස් බව ඔහු නෑ දන්නේ
ගිතෙල් මී කිරි එළකිරි පස්ගෝරස සපයන්නේ
ඉවතලන පොහොරින් මහ එළවලු කොටු සරුවන්නේ
මෙවන් සතකුගෙ මස් නොකන අයට සෙත සැලසෙන්නේ
එවන් පිරිසුදු හදවත් තුල දෙවියන් වැඩ ඉන්නේ

එපා එපා මස් කන්නට කිරි අම්මාගේ///

ගායනය - නිහාල් නෙල්සන්

(පද රචකයාගේ හා සංගීතය සැපයූ පුද්ගලයාගේ නම් නොදන්නෙමි.මෑතකදී මෙම ගීතයේ පද රචකයා පැවිදි වී ඇත.)

ඔබත් ආගමේ නාමයෙන් සතුන් මරනවාද?

2010-06-23T00:05:00.000+05:30

ඔබත් ආගමේ නාමයෙන් සතුන් මරනවාද?

එසේ නම් පහත වීඩියෝ පෙළ බලන්න.

මෙවැනි ආගමික ක්‍රියා කුමන සමාජයකින් හෝ අනුමත කරතියි ඔබ සිතනවාද?

මිනිසාට මෙන්ම සතුන්ටත් ජීවත් වීමට අයිතියක් නැද්ද?

සතුන් යනු දෙවියන් විසින් මිනිසාගේ ප්‍රයෝජනයට මැවූ දෙයක් පමණක්ද?

මෙවන් ආගම්වල දෙවියන්ගේ පිහිට ලැබෙන්නේ මිනිසුන්ට පමණක්ද?

ඇත්තෙන්ම මෙවැනි දේ වලට අනුබල දෙන දෙවියෙක් ලොව සිටීද?

මෙවැනි සතුන්ට ඔබට මෙන්ම මරණ බියක් නොදැනේද?

මෙම සතුන් මිනිසාට වඩා බුද්ධිමත් ජීවීන් කොට්ඨාශයක් වී ඔවුන් මිනිසුන්වත් මෙවැනි ආකාරයට මරා දමා ආහාරයට ගත්තේ නම් අපටත් මෙලෙස මරණ බය නොදැනී තියේවිද?

මිනිසා මෙවැනි දේ කරන්නේ අන්ධ ආගමික විශ්වාස නිසා නොවේද?

එසේ නම් නිවැරදි වන්නේ මිනිසාද?ආගමික ශාස්තෲවරුන්ද?සර්බලධාරී දෙවිවරුන්ද?දේව පුත්‍රයින්ද?නැත්නම් ස්වභාවිකවම මිනිසාගේ යටි සිතෙහි පවතින වනචාරී, කෲර සිතුවිලිද?

මින්පසු ඔබගේ ශරීරයත් මෙවැනි අහිංසක සතෙකුගේ මළකුණු වල දමන සොහොන් පොළක් කර ගන්නේද?

"ජේසු නම් වූ මා" - තවත් පොඩි විස්තරයක්

2010-06-17T12:45:00.000+05:30

"ජේසු නම් වූ මා" නමින් ලියූ බ්ලොග් සටහන ගැන වචන කීපයක් තමයි මේ ලියන්නෙ.

මේ නිසදැස ලිව්වෙ කිසිම ආගමකට අගෞරව කරන්න කරන්න හිතා ගෙන නෙමේ.ජේසුගේ උපත හා ඔහුගේ මරණය ගැන ප්‍රශ්න කරන්න හිතාගෙනයි මේක ලිව්වෙ.

ජේසු නම් තැනැත්තාගේ උප්පත්තිය ඉතාමත් ප්‍රශ්නකාරී එකක්.ඔහු ඉපදී ඇත්තේ කිසිම පුරුෂයකු හා සිදු වූ කායික සම්බන්ධයකින් හට ගත් ඵලයක් ලෙස නොවේ.එනම් ජේසුගේ මවගේ ඩිම්බයක්, පිරිමියෙකුගේ ශුක්‍රාණුවක් මගින් සංසේචනය නොවී සිදු වූ උපතක් ලෙසයි ජේසුගේ උපත සදහන් කළ හැක්කේ.

සමහට විට මෙය ඇමීබා වැනි ක්ෂුද්‍ර ජීවින්ගේ සිදු වනවා වැනි තමාගේම සෛලයක් ද්විඛණ්ඩනය වී අලුත් ජීවීන් දෙදෙනෙකු ඇති වනවා වැනි උපතක් වීමටද බැරි නැත.එහෙත් මෙහිදී උපත ලබා ඇත්තේ එක් දරුවෙකු නිසා ඉහත තර්කය අදාළ වන්නේ සෛලය ද්විඛණ්ඩනය වී සෑදුනු අනෙක් ජීවියා ජේසුගේ උපතට පෙර ගබ්සා වූවේ නම් පමණයි.

මෙම දරු උපතට සම්බන්ධව කළ හැකි තවත් උපකල්පනයක් වන්නේ ජේසුගේ මව යම් පුරුෂයකු අතින් ලිංගික අපයෝජනයකට ලක් වීම නිසා එය වසන් කර ගැනීමට ඇය විසින් පතුරුවා හරින ලද බොරුවක් බවය.

එමෙන්ම ජේසුගේ උපත සත්‍යයක් නම් මදසරු බවට ලක් වූ පුරුෂයන් සමග විවාහ වී සිටින කාන්තාවන්ට දරුවෙකු ලබා ගැනීමට ද මේ ක්‍රමය භාවිතා කළ හැක.එමෙන්ම සමලිංගික විවාහකයින්ට ද මේ ක්‍රමය මගින් දරුවන් ලබා ගත හැක.නමුත් වෛද්‍ය විද්‍යාවෙන් ද ඔප්පු කළ නොහැකි මෙවැනි දරු උපතක් සත්‍යය යැයි සිතීම ආගමික විශ්වාසයන්ගෙන් මනස පුරවා ගත් මෝඩයන්ගේ හෝ මානසික විකෘතිතාවයකින් පෙලෙන්නන්ගේ ක්‍රියාවකි.

ජේසු මරණයෙන් පසු තම කායික ශරීරය හැර දමා යළි උපත ලැබූ බව ද අසත්‍යයක් විය යුතුය.මන්ද මරණයෙන් පසු, ඒ මරණයට පත් වූ පුද්ගලයාට ජීවත් වන්නවුන් සමග කිසිමදාක සන්නිවේදනය කළ නො හැකි බැවිනි.මේ ආකාරයේ ක්‍රියාවක් නවීන විද්‍යාවෙන් ද පැහැදිලි කළ නොහැක.අනෙක් අතට ඔහු සර්බලධාරියෙකුගේ පුතෙකු නම් ඔහුට කිසි දිනෙක බයිබලයේ සදහන් ආකාරයට දුක් විද මිය යන්නේ ද නැත.

ජේසු දේශනා කළ යමක් වේ නම් එය ලෝකය පුරා පතුරුවා හරින ලද්දේ තුවක්කුවේ බලයෙනි.කුරුස යුද්ධ ඇති වූයේත්, පෙරදිග තිබූ බොහෝ වටිනා හරයන් විනාශ වී ගියේත් මොහු දෙසූ ධර්මයේ නාමයෙන්ය.වර්තමානයේ දුප්පතුන්ට මුදල් දී තම ආගමට හරවා ගන්නේත් මොහුගේ නාමයෙන්ය.යාඥාවෙන් ලෙඩ සුව කරනවා කියා හොදින් සිටින මිනිසුන් මරා දමන්නේත් මොහුගේ නමින්ය.ජේසු සත්‍යය වශයෙන්ම සර්බලධාරියෙකුගේ පුතෙකු නම් හා ඔහු මරණින් පසු නැවත උපත ලැබු වේ නම් මෙවැනි දේවලට ඉඩ නො තබනු ඇත.අඩු තරමින් මෙවැනි බ්ලොග් සටහන් ලියන මා හට යහතින් ජීවත් වීමට ඉඩ නොදෙනු ඇත.ඔහු මිය ගිය ආකාරයට මාවත් කුරුසයේ ඇණ ගසා මරා දමනු ඇත.නමුත් මේ කිසිවක් සිදු නො වන්නේ ජේසු යනු සවර්බලධාරී දෙවියෙකුගේ පුතෙකු නිසා නොව ඔහු සාමාන්‍ය අප වැනිම මනුෂ්‍යයකු වන නිසාය.

අවසාන වශයෙන් කිව යුතු දෙයක් ඇත.එනම් මේ බ්ලොග් සටහන ලියූ මා කිසිම ආගමක් අදහන්නෙකු නො වේ.එමෙන්ම ඕනෑම ආගමක ඇති දෙයක් විවෘත මනසකින් ප්‍රශ්ණ කිරීමට නිදහසක් තිබිය යුතු යැයි සිතන්නෙක් වෙමි.එසේ යම් ආගමකට සම්බන්ධ අවිද්‍යාත්මක දෙයක් පෙන්වා දුන් විට "දෙවියන්ගෙන් සමාව ගනින්", "සිංහල බ්ලොග් ලියන අය අතරෙ කකුල් හතරෙ නැට්ට තියන එවුනුත් ඉන්නවා", "යන්න හිතන් ඉන්නේ මොන ලෝකෙකටද මන්ද ?පවු කාරයා" යයි කියන්නවුන් ගැන සිතෙන්නේ අනුකම්පාවකි.ඔවුන් ආගම නැමැති කඩතුරාවෙන් මනස වසා ගෙන සිට්න, ආගමෙන් තොරව විවෘත මනසකින් සිතිය නොහැකි මිනිසුන් ලෙසය මට පෙනෙන්නේ.

මේ ගැන තවත් තර්ක කිරීමට අවශ්‍ය නම් මගෙන් "යන්න හිතන් ඉන්න ලෝකය" ගැන නො අසා විද්‍යාත්මකව සත්‍යය යැයි පෙන්විය හැකි සාක්ෂි ගෙන තර්ක කිරීමට පැමිනෙන්න.

ඕනෑම ආගමක් දෙස ආගම නම් කෝණයෙන් නො බලා විවෘත මනසකින් තර්ක කර එම ආගමෙහි පැවසී ඇති දේ සත්‍යය යැයි හැගේ නම් පමණක් එය විශ්වාස කරන්න.

පහත සදහන් බ්ලොග් සටහන්ද මේ සමග කියවා බලන්න.

http://charithsriyan.blogspot.com/2009/11/blog-post.html
http://charithsriyan.blogspot.com/2009/01/blog-post.html
http://charithsriyan.blogspot.com/2008/11/blog-post_27.html

ජේසු නම් වූ මා

2010-06-17T00:11:00.000+05:30

මම වෙමි ජේසු
පුරුෂ ධාතුවකින් නූපන්
හුදෙක් දෙවියන්ගේ පුතු වූ
සහ
කන්‍යා භාවය අහිමි කර නොගෙන
දරුවෙකු මෙලොවට බිහි කලා වූ
එකම කාන්තාවගේ පුතු

සර්වබලධාරියාගේ පුතු වුවත්
නියත වුනි මටත් මරණය
නමුත්
මුලා කලෙමි බොහෝ සිත්
ලෝ වැස්සන්ගේ
යළිත් මා
මරණයෙන් පණ ලැබූවේ යයි කියා

එදා සිට අදටත්
ලෙයින් තෙත් වෙයි මිහිකත
මුලා වූ නිසා
මගේ බොරුවලින්

කෙලෙස වන්නද දෙවි පුතෙකු
මරණයෙන් ගැලවෙන්නටවත් බැරි වූ මා
ම පියා මැවූ ලෝකයෙන්
වෙන්වන්නටත් සිදු වූ කල

මොන්ටිසෝරියේ සිට ඉස්කෝලෙට

2010-06-14T21:21:00.000+05:30

ළමයෙකුට අවුරුදු දෙක, තුන වන විටම
ඔහු යවයි ළදරු පාසලකට
ළමයාගේ පෙර පිං පවු අනුව
තීරණය වෙයි මොන්ටිසෝරියේ සිටිනා කාලය

අලි බදින දම්වැල් ගෙන
නිවසේ සිට ඉස්කෝලෙට ඇති දුර මැන
දමා ගන්නට වෙහෙසෙයි පාසලකට
කරමින් "මිෂන් ඔෆ් - ඉස්කෝල ඇඩ්මිෂන්" එක

පාසල් වර්ග බොහෝය
සුපිරි ස්කූල්, ඉන්ටකූල් ස්කූල්, හයි ෆයි කොලේජ්, ජාතික පාසල්, සබා පාසල් කියා
හැමෝම වෙහෙසෙන්නේ
සුපිරි පාසලක්ම සොය සොයා

දහසක් බොරු උගන්වා
කැන්දා ගෙන යයි පාසලට ඇතුලු කෙරුමට දරුවා
දසින් බැදි පියලි සහිත දොළ පිදේනි ගෙවා
යවයි දරුවා පාසලට අකුරු කරනට සතොසිනා

ශිෂ්‍යත්වය ලං වන විට
පොවා ටියුෂන් කසාය
සවිබල ගන්වයි ළමා මොළය
යන්නට "ඉන්ටර්කූලර්" පාසලකට

ඇටි කුකුළා බුක් ගසන්නට පෙර පාඩම් කර
ගෙදර නොපෙනෙන තරමට කලුවර වූ පසු පැමිණත් පාඩම් කර
TV බැලීම හා සෙල්ලම් කිරීම ඇලජික් නිසා නතර කර
කරයි ශිෂ්‍යත්වය ළමයා දෙමාපිය උවමනාවට

ශිෂ්‍යත්වෙන් පසු එයි ඕ.ල්. හා සා.පෙ. කඩුලු
මේ කාලෙට හැම දෙමාපියනටම උවමනා දොස් වලින් තොර දරුවකුය
එනිසා ඔහුව දොස්තරෙකු කරන්නට දගලයි නිරතුරුව
එසේ වුවොත් මුලු ලංකාවම දොස්තරලාගෙන් පිරෙයි

දේව කරුණාවේ බලෙන්
හැමෝටම සා.පෙ.න් පනින්නට බැරිය
එනිසා දොස්තරලා වැහි වැහීමෙන්
ලංකාව බේරේය

සා.පෙ. කඩුල්ලෙන් උඩින්ම පනින්නවුන්
වැටෙන්නේ "විජ්ජා" අංශයටය
ඒ නිසා පසු කලෙක ඔවුන්
"විජ්ජා" කරමින් සල්ලි මවනු ඇත

බාගෙට පනින උන්
වැටෙන්නේ "කොමිස්" අංශයටය
උන් නම් ඉතින් සල්ලි ගැවසෙන තැන්වලට ගොස්
"කොමිස්" ගැසීමට පුරුදු වන්නෝය

කඩුල්ලෙන් යන්තම් රූටා ගන්නන් යන්නේ
"හුදකලා" අංශයටය
එනිසා ඔවුන් "හුදකලා" වී
ඇඩ්‍රස් නැති වී යන්නේය

උ.පෙ. හරිහැටි පැන්න උන් යයි "සර්වලෝක" පාසලට
අනිත් උන් යයි නානාප්‍රකාර "කෝස්" වලට
ලාන්තරස් වී ජොබ් කටුවකට පැන ගත නොහැකි වුවොත්
යයි මැදපෙරදිගට වහල් කම් කෙරුමට

සත්වයෙකු නො වූ මිනිසා

2010-06-12T00:27:00.000+05:30

නැත ඉඩක් පූසියෙකුට පැටවුන් දමන්න ට
නැත ඉඩක් බැල්ලියකට පැටව් දමන්න ට
කරලා ඇත වද සැත්කම් උන් ට
නැත කිසි ඉඩක් පැටවුන් දමන්න ට

බැරි වෙලා ඉපදුනොත් පූසෙක් හෝ බල්ලෙක් නිවසක
ඇස් ඇරි විගසම ගෙනිහින් දානව පන්සලට
දානෙ කකා හොදට වැඩී එම සතුනුත්
නොනවත්වා කරයි ප්‍රජනනය උන් මැරෙන තුරු

බිත්තර දමන්නට ආ කිඹුලිය
කුදලා ගෙන යයි වන ජීවෙන්
කිඹුලිය දැමු බිත්තර ටිකත්
රකිනවා ඇත වන ජීවෙන්

යන්නට නැත පාරක් අලියෙකුට
ඉදි කරලා ඇත නිවාස හරහට අලි මංකඩක
මේ කිසිවක් නොදන්නා අලියා ආවොත් ගමට
කුදලා ගෙන ගොසින් දමයි වෙන කැලයකට

මේ හැම විපත් සිදු වන්නේ මිනිසා නිසාය
මිනිසාද සතෙකි අන් සතුන් සේම
සතුන්ට කරනා හැම විපතක්ම
මිනිසාට පල දෙන්නේ එක දෙක වීය

මිනිසාටත් දැන් නිදහසේ පැටවුන් ගසන්නට බැරිය
අවජාතක වූවොත් සමාජයේ ඉන්නට බැරිය
ඒ නිසා ගොස් දමනවා මිනිස් පැටවුන් වැසිකිළි වලවලට
ඒ සියලු පව් මැකී යනවා සෝමාවතී ගොස් බුදු රැස් දැක්කාම

සකල සිරින් පිරි සිරි ලංකාව

2010-06-11T20:24:00.000+05:30

කලකින් පහල වී ඇත
දියසෙන් කුමරකු අප රටට
යුද්ධය දිනීමෙන් පසු
ඔහු විය අග රජු මුලු රටට

යුද්ධය කල සෙන්පති යා
එකල ඔහු දේශප්‍රේමි යා
රජුට විරුද්ධ වූ නි යා
වීය ඔහු මුලු රටේම දේශද්‍රෝහි යා

වෙමින් ඇත ලංකාවම සිංගප්පූරුව ක්
ටික කලකින් වේය ආසියාවේ ආශ්චර්යය ක්
වැටුනෝතින් කොළඹට මල් වැස්ස ක්
සිහිවේය අතීත පැරකුම් යුගය ක්

හාල්, කිරිපිටි, සීනි සුපිරි ආහාරය
පාන් කන්නේ කොළඹ හතේ සුපිරි ධනවතුන්ය
නැත හොකරුන් දැන් පිටකොටුවේ
කන්නට නැතත් සිටියි සැවොම සතුටින් බෝ සේ

හරක් හොරුන්, රේස් පොළ හිමියන් සිටීය රජ මැදු රේ
හිගන්නන්, ගණිකාවන් හා පිම්පියන් සිටීය මහ පා රේ
දුන්නත් මහ දන්සැල් ඡන්ද කාලෙට අනේපිඩු සිටාණන් සේ
රටෙන් භාගයක් සිටීය බඩගින් නේ

තබා ඇති මුත් මතට තිත
යයි ඉල්ලුම ඉහළට මතට
නොමැති මුත් මුදල් තුන් වේල කන්නට
බොයි "ඇති හිටියා" හා "සුදුවා" ඇති පදමට

අවසන් වූ පසු "අයිෆාව"
දැන් ඇත පටන් ගෙන "සීපාව"
නංගිගෙ මුලු රීරි මාංශෙම
උරා බොයි ලොකු අයියා තම රටෙහි සිට

දරු ප්‍රසූතියෙන් පසු ඇතැම් මව්වරුන්ට වැළදෙන "වැදූ ගෙයි සන්නිය" යනු කුමක්ද?

2010-06-10T16:15:00.000+05:30

උපදෙස් - ප්‍රසව හා නාරිවේද විශේෂඥ වෛද්‍ය එල්.ඒ.ඩබ්ලිව්.සිරිසේන.

වැදූගෙයි සන්නිය යනු බියකරු රෝගයක් වශයෙන් අපේ පැරන්නෝ සැලකූහ.මෙයට අමනුෂ්‍ය බලපෑමක් ඇතැයි යන විශ්වාසයද තිබිණි.දරුවකු වැදූ අලුත මවකට සැන්දෑ කාලයේ කොහොඹ කොළ දුම් ඇල්ලීම, දිවා කාලයේ නෑමෙන් පසු සිරුර ඉක්මණින් උණුසුම් වීම සදහා දුම් ඇල්ලීම, සවස් කාලයේ නෑමට හෝ ඇග සේදීමට ඉඩ නොදීම වැනි දෑ මේ සදහා අතීතයේ වැඩිහිටියන් විසින් අනුගමනය කළ සිරිත් විරිත් විය.

වැදූ ගෙයි සන්නිය වෛද්‍ය විද්‍යාත්මකව හදුන්වන්නේ කෙසේද?

සන්නිය යන්න බටහිර වෛද්‍ය විද්‍යාවේ දක්වන්නේ වලිප්පුව ලෙසය.ඒ අනුව මේ රෝග තත්වය පසු ප්‍රසව වලිප්පුව (Postpartum eclampsia) යනුවෙන් හැදින්විය හැකිය.

සාමාන්‍යයෙන් ගර්භනී මවකගේ ශරීරයේ විවිධ ඉන්ද්‍රියයන්හි තරලය රැදී තිබේ.ගැබිනි මවක් තරබාරු වන්නේත්, සිරුරේ බර වැඩි වන්නේත් මේ තත්ත්වය නිසාය.මෙය රෝගයක් නොවේ.

සමහර ගැබිනි මව්වරුන්ට ගැබිනි සමයේදී විශේෂයෙන් අවසන් තුන් මාසයේදී අධි රුධිර පීඩනය හට ගනියි.එවැනි තත්ත්වයක් ඇති වුවහොත් ඇගේ මොළය, හෘදය වස්තුව, අක්මාව, වකුගඩු යන ඉන්ද්‍රියයන්හි තරල රැදීමේ ස්වභාවය වැඩිය.එබදු අවස්ථාවලදී මුත්‍රා සමග ඇල්බියුමින් පිට වීම, ශරීරය ඉදිමීම වැනි ලක්ෂණ මතුවනු ඇත.මෙය රෝගී තත්ත්වයක් ලෙස සලකන අතර, ගර්භ විෂ රෝගය යනුවෙන් හදුන්වන්නේ එයයි.මෙය ශරීරයේ සෑම ඉන්ද්‍රියයකටම බලපෑ හැකි අතර, එහි උග්‍ර තත්ත්වය ගර්භ වලිප්පුවයි.වැදූගෙයි සන්නිය වශයෙන් හදුන්වන්නේ මෙයමය.මෙය ගැබිනි සමයේ අවසන් කාලයේදීත් දරුවා බිහි කළ මුල් පැය කිහිපයේදී හෝ දින කිහිපය තුළදීත් හට ගත හැකි රෝගයකි.එය හට ගන්නා ආකාරය පිළිබදව අපි දැන් සොයා බලමු.

සාමාන්‍යයෙන් මවකගේ දරු ගැබට සති 12ක් පිරුණු පසු සතියකට කි.ග්‍රෑ.දශම පහක් වැනි ප්‍රමාණයකින් එහි බර වැඩිවේ.නමුත් මේ බර වැඩිවීම නිසි පරිදි සිදු වන්නේද යන්න දැනගන්නට හැම සතියකම එකම දිනයක එකම වේලාවට බර කිරිය යුතුය.එක දවසක කෑමට පෙර බර කිරා ඉන්පසුව සතියේ කෑමට පසු බර කිරීම මගින් මේ වැඩිවීම නිසි ලෙස සොයා ගත නොහැකිය.එබැවින් කෑමට පෙර නම් සෑම සතියේම එම දිනයේ එම වේලාවට කෑමට පෙරම බර කිරිය යුතුවේ.නැත්නම් කෑමට පසුය.

සාමාන්‍ය ආකාරයේ බර වැඩිවීමක් ඔය ආකාරයට හදුනාගත හැකිය.ඊට වඩා මද වෙනස්කම් ඇති වුනත් එය සාමාන්‍ය බරක්ද යන්න වෛද්‍යවරයාට හදුනා ගැනීම අපහසු නොවේ.නමුත් යම් මවකගේ බර සීග්‍රයෙන් වැඩි වන්නේ නම් ඒ පිළිබද වෛද්‍යවරු විශේෂයෙන් සැලකිලිමත් වෙති.හේතුව එය ගර්භ විෂ රෝගයේ මූලික අවස්ථාව විය හැකි නිසාය.මේ සමග රුධිර පීඩනයත් වැඩි වන්නේ නම් එම ගැබිනි මව රෝහල් ගත කරන ලෙස උපදෙස් දෙනු ලැබේ.එහිදී මුත්‍රා පරීක්ෂණයක් කර මුත්‍රා සමග ඇල්බියුමින් පිට වන්නේද යන්නත් සොයා බැලේ.මේ සියලු දේ මගින් ගර්භ විෂ රෝගය හදුනාගත හැකිය.

මෙයට් ප්‍රතිකාර නොගෙන සිටියොත් සිදුවන්නේ එය උග්‍ර තත්ත්වයට පත් වී ගර්භ වලිප්පුව හට ගැනීමයි.මෙම වලිප්පු තත්ත්වය පැමිණි පසු උදරයේ අධික වේදනාව, ඇස්වලට අමුතු එළි පෙනීම, බල නහරවල ඉබේ සිදුවෙන ක්‍රියාවන් අධිකව දැනීම වැනි ලක්ෂණද රෝගියා තුළ ඇතිවේ.

මේ රෝගය භයානකය.යම් ගැබිනි මවකට අධික රුධිර පීඩනය ඇති විට රෝහලේ නවත්වා ගනු ලබන්නේ ඉහත කී අනෙකුත් පරීක්ෂණද කර ගර්භ විෂ රෝගය ඇත්නම් අවශ්‍ය ඉක්මන් ප්‍රතිකාර ලබාදීම පිණිසය.

යම් ගැබිනි මවකට අධි රුධිර පීඩනය පැවතියේ නම් ප්‍රසූතියෙන් පසුවත් වෛද්‍යවරු විශේෂයෙන් සැලකිලිමත් වෙති.

ඉතා කලාතුරකින් ගැබිනි සමයේ අධි රුධිර පීඩනය නොතිබූ මවකට දරුවා ප්‍රසූත කිරීමෙන් පසු එකවරම රුධිර පීඩනය වැඩි වී ගර්භ වලිප්පුව හට ගැනීමටද අවකාශ තිබේ.

ගැබිනි සමයේදී ගර්භ වලිප්පුව හැදී මව සිහිසුන්ව සෑහෙන වේලාවක් සිටියොත් දරුවාට ඔක්සිජන් නොලැබීම නිසා දරුවාට අනතුරක් වීමටද ඉඩ තිබේ.එසේම ගර්භ වලිප්පුව සෑදී මවට වමනය ගොස් වමනය ස්වාසනාලයේ සිර වුවහොත් මවට අනතුරක් වීමටද ඉඩ තිබේ.ගර්භ වලිප්පුව, පසු ප්‍රසව වලිප්පුව සහ වැදූගෙයි සන්නිය ආදී වශයෙන් හදුන්වන මේ රෝගය භයානක වන්නේ එබැවිනි.

"පොතක් ගැන යමක් "

2010-06-10T00:06:00.000+05:30

අද මම අලුත් බ්ලොග් එකක් ලියන්න පටන් ගත්ත.බ්ලොග් එකේ නම තමයි "පොතක් ගැන යමක්".

අලුත් බ්ලොග් එකේ මම ලියන්න බලාපොරොත්තු වෙන්නෙ මම කියවන සිංහල හා ඉංග්‍රීසි පොත් ගැන පොඩි හැදින්වීමක්.හැබැයි මම පොත් ගැන විචාරයක් නම් ලියන්න බලාපොරොත්තු වෙන්නෙ නැහැ.බොහොම සරලව මම කියවපු පොත් ගැන හැදින්වීමක් විතරයි මම මේ බ්ලොග් එකේ ලියන්නෙ.

ඉතින් ඔබත් ඇවිත් මගේ අලුත් බ්ලොග් එක බලල හොද, නරක කියල යන්න.

ජීවිතයේ මුල් වරට දුටු සමහරුන්ව කලින් දැක පුරුදු බවක් හැගෙන්නේ ඇයි?

2010-06-04T23:01:00.000+05:30

උපදෙස් - විශේෂඥ මනෝ වෛද්‍ය ඩී.වී.ජේ.හරිශ්චන්ද්‍ර.

යම්කිසි කෙනෙක් දැක්කම "එයාව නම් මට හොදට දැකල පුරුදුයි.එයාව දැකපු ගමන් මගෙ හිතට ඇල්ලුවා, එයා නම් හරිම මුස්පේන්තු පාටයි" වැනි දේවල් අපට සිතෙන්නේ ඇයි?

මෙහෙම වෙන්න බලපාන්නෙ කෙනෙකුගෙ රූප සම්පත්තියම නෙමේ.රූමත් කෙනෙක් දැක්කම "එයා පාට තිබුණට මූණ හරි නපුරු පාටයි" වැනි දෙයක් තවත් කෙනෙකුට හිතෙන්න පුලුවන්.ඒ වගේම වැඩි පෙනුම නැති කෙනෙක් දැක්කම "පෙනුම නැති වුණාට එයා හරි අහිංසක පාටයි" වැනි දෙයක් ද හැගෙනු ඇති.

අපේ මොළය කියන්නෙ මතක ගබඩාවක්.මෙහි ස්මරණය සම්බන්ධ වෙනම සෛල කලාපයක්ද පිහිටා තිබෙනවා.අපට අසන්නට දකින්නට ලැබෙන හැම දෙයක්ම මේ සෛල කලාපය තුළ තැන්පත් වෙනවා.මේ සැගවගත් මතකය (Repressed memories) තුළ සමහර විට අප කුඩා දරුවකුගේ කාලයේ බැලූ ළමා චිත්‍රපටියක රගපෑ නලුවකු, නිළියක පිළිබද මතකයත් සටහන් වෙලා තියෙන්න පුලුවන්.ඇතැම් විට අප ඊට පසු යම් කෙනෙකු දකින විට මනසේ සැගව ගත් මතකයේ තිබෙන අර නලුවා හෝ නිළිය පිළිබද මතකය ප්‍රසන්නතාවයක්ද සමග ඉස්මතු වන්න පුලුවන්.එවිට අප දුටු ඒ පුද්ගලයා පිළිබද ප්‍රසන්න බවක් අපේ සිතේ ඉබේම මතු වෙනවා.නමුත් ඒකට හේතුව ළමා කාලයේ දැකපු චිත්‍රපටිය බව අපේ උඩු සිතට කොහොමටවත් හැගෙන්නෙ නැහැ.

මෙය තවදුරටත් පැහැදිලි වන්නට තව උදාහරණයක් ගනිමු.

කිසියම් පුද්ගලයකුගේ මෝටර් රථයකින් ඔබ අනතුරකට පත්වන්නට ගියා හෝ යම් අනතුරක් සිදුවූයේ යැයි සිතමු.ඒ මොහොතේ එම රියදුරාගේ මුහුණුවර ඔබේ මනසේ තැන්පත් වෙනවා.ඊට වසර ගණනකට පසු ඔබේ සොයුරිය බලන්නට මනාලයකු පැමිණෙනවා.ඔහු දුටුමනින්ම ඔබ තුළ අප්‍රසන්න බවක් ඇති වෙනවා.ඊට හේතුව ඔහු දුටු මුල්ම අවස්ථාවේ අර රියදුරා පිළිබද මතකය කුමන ආකාරයකින් හෝ ඔබ තුළ ඉස්මතුවීම නිසයි.නමුත් උඩු සිතට මෙය නිවැරදිව වටහා ගන්න බෑ.තමාට රියදුරා පිළිබද මතකය මතු වූ බවක් තේරෙන්නේ නෑ.හිතට දැනෙන එකම දේ "අපෝ ඒ මනමාලයා නම් මට දැකපු ගමන්ම එපා වුණා" යන්න පමණයි.

තමාට බොහෝ දඩුවම් කළ පාසල් ගුරුවරියකගේ මතකය යම් දිනකදී එම තැනැත්තා විවාහ වූ පසු බිරිද තුළින් ඉස්මතු වුවහොත් ඔහුට කිසිම හේතුවක් නැතිව බිරිදව නොරුස්සන්න පුලුවන්.නමුත් ඒ නොරිස්සුම මිස එයට හේතුව ඔහුටවත් හිතා ගන්න බෑ.

මෙසේ එක අයකු පිළිබද හැගීම තවත් කෙනෙකු වෙත යොමු වීම තිරෝහරණය (Transference) ලෙස හදුන්වන්න පුලුවන්.මේ පදනම තුළ අපට යම් යම් දේවල් පිළිබද හේතුවක් නැතිවම අප්‍රියතාවය හෝ ප්‍රියතාවය හට ගන්නවා.මේ අනුව කෙනෙකු දුටු පමණින් අප ඒ පුද්ගලයා පිළිබදව හොද හෝ නරක වශයෙන් විනිශ්චයකට එළඹීම සුදුසු නෑ.ඔබට ප්‍රියමනාප නොවූ කෙනෙක් හොදින් දැන හදුනාගත් පසුව ඔහු/ඇය ඉතා හොද කෙනෙකු බව වැටහෙන්න පුලුවන්.ඒ වගේම පෙනුමෙන් ප්‍රියමනාප අය කලක් ඇසුරු කරන විට ඒ තැනැත්තා/තැනැත්තිය ඇසුරට නුසුදුසු බවක් වුණත් හැගෙන්න බැරි කමක් නෑ.

සමහරු තමන් ගැන මහා ඉහළින් සිතීම මානසික ආබාධයක්ද?

2010-06-03T13:14:00.000+05:30

උපදෙස් - විශේෂඥ මනෝ වෛද්‍ය ඩී.වී.ජේ.හරිශ්චන්ද්‍ර.

මේ පසුගිය දිනයක එක්තරා කාන්තාවක් අප වෙත යොමු කළ ගැටලුවකි.අද කතා කරන්නට බලාපොරොත්තු වන මාතෘකාවට එය අදාළ වන නිසා අපි එම කාන්තාවගේ පැනයෙන්ම මේ සාකාච්ඡාව ආරම්භ කරමු.

අප බැංකු ශාඛාවට අලුතින් පැමිණි කළමනාකාරවරිය නිතරම සිතන්නේ තමන් ගැනම පමණි.තමන් හැම විටම නිවැරදියි යන මතයේ හිදින ඇය ආයතනයේ සියලු දෙනා තමන්ට යටත් වී සිටිය යුතු බවක්ද හගවන්නීය.ආයතනයේ නීතිරීති, අණ පනත් වෙනුවට සේවකයන් සියලු දෙනා තමන්ට අවශ්‍ය පරිදි අවනත වී කටයුතු කළ යුතු යැයි ඇය තරයේම විශ්වාස කරයි.ඇගේ මෙම ස්වභාවය තේරුම් ගත් ආයතනයේ කිහිප දෙනෙකු ඇයට එකග වී කටයුතු කරති.එයින් ඇය තවත් ශක්තිමත් වී උඩගු වී සිටියි.තමන්ට අවනත නොවන සහ එකග නොවන අය පිළිබදව කිසිදු තැකීමක් නොකරන ඇය තමන්ට අවනත වී හිදින අය පිරිවරසේ සලකමින් එහි රාජිනිය ලෙස වැජඹෙන්නට උත්සාහ දරන්නීය.මෙය අනෙක් අයට විශාල පීඩනයකි.මෙවැනි තත්වයක් මනෝ විද්‍යාත්මකව විශ්ලේෂණය කළ හැකිද?

විසදුම

නාසිස්ම පෞරුෂ විෂමතාව (Narcissistic Personality Disorder) මේ සමාජය තුළ බහුලව දක්නට ලැබෙන තත්වයකි.මේ පෞරුෂ වර්ගයේ ස්වභාවය නම් ඉතාම ප්‍රභල ලෙසින් තමා තමාවම අගය කර ගැනීමයි.තමන් ඉතාම උසස් පුද්ගලයකු ලෙස මේ අය සිතා සිටින අතර, ජයග්‍රහනය පිළිබද, බලකාමය පිළිබද, තම බුද්ධිමට්ටම පිළිබද සීමා රහිත හැගීම් සහ අභිමානවත් හැගීම් ඇතිව ඔවුහු ජීවත් වෙති.තමන්ගේ බලය කොයි තරම්ද, තම රූපය කොතරම් යහපත්ද, බුද්ධිය කොතරම් උසස්ද යනුවෙන් නිරන්තරව තමන් ගන්නා තීරණ කොතෙක් නිවැරදිද ආදී වශයෙන් සිතන මේ අය අන්‍යයන්ගේ අවධානය යොමු කර ගන්නට නොකරන දෙයක් නැති තරම්ය.මොවුහු නිතරම අන් අයගෙන් උණුසුම් පිළිගැනීම් අපේක්ෂා කරති.නමුත් අනෙක් අය කෙරෙහි ඔවුන් එවැනි හැගීම් ඇතිව ක්‍රියා කරන්නේ නැත.

බොහෝ විටම මේ පෞරුෂ විෂමතාවය ඇත්තවුන් අනෙක් අයව තමන් වෙනුවෙන් පාවිච්චි කිරීමට යොමු වනු ඇත.නමුත් අනෙක් අය වෙනුවෙන් ඔවුන් ඒ ආකාරයට ක්‍රියා කරන්නේ නැත.නිරතුරුව සිතන්නේ තමා පමණක් උසස්, තමා පමණක් ඉස්මතු විය යුතුයි, අනෙක් අය තමා වෙනුවෙන් සිටිය යුතුයි යනුවෙනි.

විෂමතාබාධ (මායා රෝගී) පෞරුෂයට බෙහෙවින් සමීප නාසිස්ම පෞරුෂය ස්ත්‍රී පුරුෂ දෙපක්ෂයටම පොදු පෞරුෂය විෂමතාවයකි.

නාසිස්ම පෞරුෂ විෂමතාවය හැරුණු විට නාසිස්මය නමින් හදුන්වන ලිංගික අවවර්තන තත්වයක්ද තිබේ.මෙය Narcissism යනුවෙන් හදුන්වන අතර මෙහි අදහස නම් ස්වරූප රාගය යන්නයි.

ආදි කාලයේ සිටි තරුණයකු පොකුණක වැටී තිබෙන තමාගේම ඡායාව දැක ඒ කෙරෙහි බලවත් ආදරයක් උපදවා ගත්තේය.මෙම ලිංගික අවවර්තන තත්වය නාසිසිසම් යනුවෙන් හැදින්වෙන්නේ ඒ අනුවය.තමන්ගේම නග්න ශරීරය දෙස කැඩපතිකින් බලා හිද රාගික හැගීම් උපදවා ගැනීම මෙම ලිංගික අවවර්තනයේ ස්වභාවය වන අතර මෙයට හුරු වූ කෙනෙකුට බාහිර දෙයකින් ලිංගික උත්තේජනයක් ලැබීම අසීරුය.කැඩපතකින් තම ශරීරය දෙස බලාගෙන එය ස්පර්ශ කරමින් යම් ක්‍රියාවක යෙදී එමගින් ලිංගික තෘප්තිය ලැබීම ඔවුන්ගේ ස්වභාවයයි.ඔවුන්ගේ සිහින ලෝකය තුළ රගන්නේ තමන්ගේම ශරීරයයි.

සමාන්‍යයෙන් බාල කාලයේදී හැම කෙනෙක්ම උනන්දු වන්නේ තමන්ගේ ශරීරය දෙසය.ඔවුනට එය කණ්ණාඩියකින් දුටුවිට අමුතුම සතුටක් ඇතිවේ.නමුත් ක්‍රමයෙන් වර්ධනය වන විට එම හැගීම් නැති වී යන අතර ඒ වෙනුවට සෙසු අයගේ ශරීර කෙරෙහි හැගීම් ඉපදීම සිදුවනු ඇත.කෙසේ වුවද නාසිස්මය යනු සුලබව දකින්නට ලැබෙන ලිංගික අවවර්තනයක් නොවේ.නමුත් නාසිස්ම පෞරුෂ විෂමතාවය නම් සමාජය තුළ ඉතා සුලබව දැකිය හැකිය.

No news about the people who mixed poison to Dandugam Oya

2010-05-15T08:54:00.000+05:30

Hundreds of thousands fish died in Dandugam Oya on the 7^th of May probably due to a water poisoning. Yet, the reason behind this water poisoning has not yet been elicited.

This Oya is named as Atthanagalu Oya at its starting point. After it passes Kotugoda in Ja Ela area it is named as Dandugam Oya. It ends in the lagoon at Negombo. Even though the deaths of fish had been reported before from the same location, the residents of the area say that this is the first time that such large number reported. The residents say that some chemical is mixed to the water way by a factory situated at Seeduwa.

A kilogram of Korali fish, which was around 200 rupees a week ago, became just 50 rupees on last Friday. Yet, the residents didn’t want to buy fish as they knew the reason behind the decrease of the prices. They also avoided bathing in the oya.

However, still there is no idea about what the chemical mixed to the oya and what are its impacts. Yet, the environmentalists show that it can be mixed to the lagoon of Negombo affecting in a devastating manner to the aquatic environment in the area.

දඩුගම් ඔයට වස මුසු කලේ කවුදැයි තවමත් හෙළිවී නැහැ

2010-05-15T08:37:00.000+05:30

පසුගිය මැයි 07 සිකුරාදා අලුයම සිට ජාඇල දඩුගම් ඔයේ මත්ස්‍යයන් ලක්ෂ ගණනක් මිය යාමට හේතුව එහි ජලයට කිසියම් බරපතල විෂක් මුසුවීම බවට අනුමාන කෙරුණ ද එම විෂ ද්‍රව්‍යය පිළිබද තොරතුරු කිසිවක් මේ වන විට ද අනාවරණය වී නැත.

අත්තනගලු ප්‍රදේශෙයෙන් ඇරඹී අත්තනගලු ඔය යනුවෙන් නම් ලබා ජාඇල කොටුගොඩ ප්‍රදේශයේ සිට දඩුගම් ඔය වශයෙන් හැදිවෙමින් පමුණුගම දී මීගමු කලපුවට එක් වන මෙහි මසුන් හිටි හැටියේ මිය යාම වරින් වර සිදු වුවද මෙතරම් විශාල මත්ස්‍යය සංඛ්‍යාවක් එකවර මිය ගිය ප්‍රථම අවස්ථාව මෙය බව ප්‍රදේශවාසීහු පවසති.කොටුගොඩ ප්‍රදේශයෙන් පහල පිහිටි සීදූව පොලිස් වසමට අයත් ප්‍රදේශයේ සිට මීගමු කලපුව දක්වාම මෙම මසුන් මිය යාම සිදු වී තිබේ.ඊට හේතුව සීදූව ආසන්නයේ පිහිටි කිසියම් කම්හලකින් විෂ රසායන ද්‍රව්‍යයක් දඩුගම් දියට එක් කිරීම බව ප්‍රදේශවාසීන්ගේ අදහස වී තිබේ.

කලින් රුපියල් දෙසීයක් පමණ මිල වූ කොරලි මසුන් කිලෝවක් එම සිකුරාදා පෙරවරුවේ සිට හදිසියේ රුපියල් පනහ දක්වා මිල පහල වැටුණු මුත් දඩුගම් ඔයට විසක් මුසු වීම නිසා මත්ස්‍ය සංහාරයක් සිදුවන බව දැන ගත් ප්‍රදේශවාසීහු එම මසුන් ආහාරයට ගැනීමෙන් සේම දඩුගම් ඔයට බැසීමෙන්ද වැලකී ඇත.

එහෙත් මේ විෂ ද්‍රව්‍යය කුමක්ද?එහි ස්වභාවය සහ එම විෂවල ක්‍රියාකාරීත්වය කෙබදුද? යන්න මේ තාක් කිසිදු නිගමනයක් ලැබී නැත.එහෙත් මෙම ජලයට මුසු වී ඇති විෂ රසායනික ද්‍රව්‍යයන්ගේ අයහපත් බලපෑම මීගමු කලපුවට සේම මීගමුව ආශ්‍රිත මුහුදු තීරයට ද එල්ල විය හැකි බවටත් ඒ අනුව ඒ ජලජ පරිසරයන්හි මත්ස්‍ය අනුභවය මගින් මිනිසාට කෙටි කාලීන හා දිගු කාලීන අහිතකර ප්‍රතිවිපාක එල්ල විය හැකි බවත් පරිසරවේදීහු පෙන්වා දෙති.

පිළිසිද ගැනීමකින් තොරව ගර්භනී ලක්ෂණ පහළ වීම

2010-05-10T12:14:00.000+05:30

උපදෙස් - විශේෂඥ මනෝ වෛද්‍ය ඩී.වී.ජේ.හරිශ්චන්ද්‍ර.

විවාහ වී වසර තුනක් ද ඉක්මවා සිටි තරුණ කාන්තාවක් එතෙක් කලක් දරුවකු නොලැබීම හේතුවෙන් මහත් මානසික පීඩනයකට ලක්ව සිටියාය.කෙසේ හෝ පසුව ඇයට ගර්භනී ලක්ෂණ පහළ වූ අතර ඇය තුළ මෙන්ම සැමියා තුළත් එම පවුල් වල අය තුළත් හටගත්තේ ඉහ වහා ගිය සතුටකි.ඉන්පසු මේ යුවළ ප්‍රසව හා නාරිවේද විශේෂඥ වෛද්‍යවරයකු මුණ ගැසුනහ.එහිදී කරන ලද පරීක්ෂණ මගින් අනාවරණය වූයේ ඇයට දරු ගැබක් පිහිටා නැති බවයි.නමුත් ඇයට වෛද්‍යවරයාගේ කීම විශ්වාස කළ නොහැකි වුණි.දරු ගැබක් නැත්නම් ගැබිනි සමයේ ඇති වන ලක්ෂණ පහළ වූයේ කෙසේදැයි ඇය විමසා සිටියාය.

මේ තත්වය හදුන්වන්නේ ව්‍යාජ ගර්භය හෙවත් Pseudocyesis (සූඩෝසයිසිස්) ලෙසිනි.මෙය සුලු මානසික ආබාධයකි.මුලුමනින්ම මානසික හේතූන් මත කායික ලක්ෂණ හට ගන්නා මෙහි ස්වභාවය නම් දරු ගැබක් නොපිහිටා ගර්භනී ලක්ෂණ පහළ වීමය.එනම් මාස් ශුද්ධිය ඇන හිටීම, බඩ පිපීම, බඩ දගලන ස්වභාවය දැනීම, කෑම අරුචිය ඇති වී දොලදුක් ලක්ෂණ පහළ වීම, උදේට ඇති වන ඔක්කාරය, පියයුරු තුඩුවල පැහැය වෙනස් වීම (ලා පැහැවීම.) ආදියයි.නමුත් ගර්භනීභාවය පරීක්ෂා කෙරන මුත්‍රා පරීක්ෂණයකදී ඇය ගර්භනී නොවන බව සනාථ වනු ඇත.

මුලුමනින්ම මානසික සාධක මත ඇති වන මේ ආබාධය අයත් වන්නේ මායා රෝග (Hysteria - හිස්ටීරියා) ගණයටය.මායා රෝගය දැන් හැදින්වෙන්නේ විඝටනාබාධය (Dissociative Disorder) ලෙසිනි.විඝටනාබාධය හට ගැනීමට කරුණු 2ක් බලපායි.ඒ මානසික ගැටුම හා අති උපරිම උත්තේජනයයි.අති උපරිම උත්තේජනය යනු තමාට විද දරා ගැනීමට නොහැකි තරම් දැඩි චිත්ත වේග ඇති වීමයි.

දරුවකු ලැබීමට තිබෙන තදබල ආශාව මෙන්ම දරුවෙකු ලැබේවි යන බිය නිසාත් ව්‍යාජ ගර්භය හට ගත හැකිය.මෙය තව දුරටත් මෙසේ විස්තර කිරීමට පුලුවන.

යම් කාන්තාවක් විවාහ වී වසර කිහිපයක් ගත වීත් දරුවකු නොලබන්නේ නම් දරුවකුට තිබෙන ආශාව ඇයට ඉතා ප්‍රභල ලෙසින් දැනෙනු ඇත.එසේම දරුවකු නොලැබීම නිසා ඇයට සැමියාගෙන් විශේෂයෙන්, ඔහුගේ මව ඇතුලුව එම පාර්ශවයේ වැඩිහිටියන්ගෙන් විශාල ප්‍රතිරෝධයක් එල්ල විය හැකිය.එවැනි කාන්තාවක් තුළ මානසිකව ඇති වන දැඩි පීඩනය නිසා ඇයට ව්‍යාජ ගර්භ තත්වය ඇති වීමට ඉඩ තිබේ.

එසේම තමන්ගේ පෙම්වතා සමග ඉතා සුලු සබදතාවයක් පැවැත්වූ අවිවාහක තරුණියකට වුවද තමන්ට දරු ගැබක් හට ගනීවි යන සැකය මතින් ඇති වන තදබල බිය නිසා ව්‍යාජ ගර්භ තත්වය හට ගැනීමේ අවකාශ ඇත.

ගර්භනී ලක්ෂණ ඇති වූ පසු වෛද්‍යවරයකු ලවා පරීක්ෂා කරවා ගැනීමේදී එය ව්‍යාජ ගර්භයක්ද සැබෑවටම ගැබ් ගැනීමක්ද යන්න හදුනා ගත හැකිය. අල්ට්‍රා සවුන්ඩ් ස්කෑන් පරීක්ෂණයක් මගින් මේ තත්වය පහසුවෙන් දැන ගැනීමට පුලුවන.එය ව්‍යාජ ගර්භයක් බව ප්‍රසව හා නාරිවේද වෛද්‍යවරයා විසින් හදුනා ගැනීමෙන් පසුව මනෝ වෛද්‍යවරයකු වෙත යොමු කිරීම බොහෝ විටම සිදුවේ.මෙයට වඩාත්ම සුදුසු වන්නේ මනෝ චිකිත්සක ප්‍රතිකාරය.ඖෂධ ප්‍රතිකාර එපමණටම අවශ්‍ය වන්නේ නැත.

ව්‍යාජ ගර්භය හෙවත් Pseudocyesis රෝගයට සමීප තවත් මානසික රෝග කිහිපයක්ම තිබේ.

එයින් එකක් වන්නේ මැලින්ගරින් රෝගයයි. (Malingering Disorder) ඉහත කී ව්‍යාජ ගර්භ තත්වයේදී තමාට දරු ගැබක් නැති බව රෝගියා නොදනියි.නමුත් මැලින්ගරින් රෝගයේදී සිදු වන්නේ තමන් ගැබ් ගෙන නැති බව දැන දැනම ගැබ් ගත් ලෙසින් බොරු රගපෑමක යෙදීමය.

මෙවැනි තවත් රෝගයක් ලෙස මුන්චවුසන් රෝගය (Munchausen Syndrome) දැක්වීමට පුලුවන.මෙය මනෝ වෛද්‍ය විද්‍යාවේ දැන් භාවිතා වෙන්නේ ෆැක්ටීෂස් රෝගය (Factitious Disorder) ලෙසිනි.මෙයද සිතේ ඇතිවන බලවත් ගැටලු සහගත තත්වයන් මත ඇතිවන අතර මැලින්ගරින් සහ ෆැක්ටීෂස් රෝග දෙක අතර පවතින වෙනස නම් මැලින්ගරින් රෝගියා තමා කරන්නේ බොරුවක් බව හොදින් දැන සිටීමත් ෆැක්ටීෂියා රෝගියා එය පැහැදිලිව නොදැන හිදීමත්ය.මුන්චවුසන් රෝගීන් රෝහල් ගත වීමට තදබල කැමැත්තක් දක්වයි.ඒ අනුව කුමක් හෝ ආපදාවක් තමන් විසින්ම සිදු කරගෙන රෝහලට ඇතුලු වනු අත.මෙය Hospital addiction ලෙස ද හදුන්වනු ලබයි.

මෙම රෝගවලට සමීප පිරිමින්ට පමණක් වැලදෙන තවත් මානසික ආබාධයක් තිබේ.මෙය කුවාඩ් රෝගය (Cauvadi Syndrome) නමින් හැදින්වෙයි.

කුවාඩ් රෝගයේ ස්වභාවය නම් බිරිද ගැබ් ගත් විට සැමියා තුළත් ගැබිනි මවක් තුළ ඇතිවන ලක්ෂණ පහළ වීමය.ඔක්කාරය, වමනය, විශේෂයෙන් දත් කැක්කුම මෙහිදී ඇතිවන ලක්ෂණ වේ.

කුවාඩ් රෝගයට එම නම ලැබී ඇත්තේ මෙසේය.කුවාඩ් යනු වනචාරී ගෝත්‍රයක නමකි.එම ගෝත්‍රයේ සිරිතට අනුව බිරිද දරු ප්‍රසූතියකට සූදානම් වන විට තිඹිරි ගෙට යන්නේ සැමියාය.ඔහු එහිදී තම උදරය අල්ලාහෙන කෑ ගැසීම සිදුවේ.මේ එම ගෝත්‍රිකයන්ගේ චාරිත්‍රයකි.ඒ අනුව මෙම රෝගයට කුවාඩ් යන නම ලැබී ඇත.දැන් ලෝකය කොතරම් දියුණු වුවත්, ඉතා දියුණු රටවල පවා ඇතැම් අවස්ථාවලදී මෙම රෝගය පිරිමින් තුළ දැකිය හැක්කේ යටිහිතේ ගැඹුරේම තැන්පත් වී තිබෙන සාධක මතය.

මේ රෝගයේදී බහුලව දැකිය හැකි ලක්ෂණයක් වන්නේ දත් කැක්කුමය.ඒ අනුව දත් නරක් වී නොතිබුණත් මානසික හේතූන් මත දත් කැක්කුම ඇතිවේ.එනිසා ඔවුන් දන්ත වෛද්‍යවරයකු ලවා එම කැක්කුම ඇති දත් උදුරා දැමීමට පෙළඹිය හැකිය.දත් උගුල්ලා දැමීමේ ක්‍රියාව දරු ප්‍රසූතියකට සමාන වේ.

මේ සියල්ලක්ම සුලු මානසික රෝග වන අතර මනෝ වෛද්‍යවරයකු හට පහසුවෙන්ම සුව කළ හැකිය.

ඔබට නොදැනෙන සේ නිහඩව වැඩෙන රෝග තුනක්

2010-04-30T11:57:00.000+05:30

උපදෙස් - වෛද්‍ය ශාන්ත හෙට්ටිආරච්චි.

සාමාන්‍යයෙන් අපට කිසියම් රෝගයක් වැළදී ඇතැයි අනුමාන කළ හැකි සංඥාව වන්නේ වේදනාවක් දැනීමයි.එම වේදනා වැනි කායික බලපෑම්, කැක්කුම් මුල් කරගෙන වෛද්‍ය පරීක්ෂණ කළ විට අපට වැළදී ඇති රෝගය හදුනා ගැනීමට වෛද්‍යවරයාට හැකිවේ.

නමුත් සෑහෙන කලක් යන තුරුම වේදනා, කැක්කුම් වැනි බාහිර සංඥා කිසිවකින් තොරව ශරීරය තුළ නිහඩව වර්ධනය වන රෝග තත්වයක්ද තිබේ.අධික රුධිර පීඩනය, දියවැඩියාව හා අධික කොලෙස්ටරෝල් ඒවා අතරට අයත් වෙයි.මේවා පහර දීමට අවස්ථාව ලැබෙන තුරු අප නිවෙස් තුළ ගුලි ගැසී බලා හිදින විශඝෝර සර්පයන් මෙනැයි කීම නිවැරදිය.බොහෝ විට මුල් කාලයේදී කිසිදු රෝග ලක්ෂණයක් පළ නොකරමින් ශරීරය තුළ වැඩෙන මෙබදු රෝග තමන්ට ඇති බව රෝගියා මුලින්ම දැන ගන්නේත් වෙනත් රෝග සදහා වෛද්‍ය පරීක්ෂණවලට සහභාගී වන විටය.

එහිදී මෙබදු අවදානමක් ඇතැයි වෛද්‍යවරයා මුල් වරට රෝගියා දැනුවත් කරනු ඇත.නමුත් විශේෂ රෝග ලක්ෂණ නොදැනෙන නිසා එය සැලකිය යුතු රෝගයක් ලෙස බොහෝ දෙනෙක් නොසිතති.ඒ අනුව රෝගියා ඒ පිළිබදව තැකීමක් නොකර තමන්ගේ එදිනෙදා සාමාන්‍ය කටයුතුවල නියැලෙනු ඇත.එහි ප්‍රතිඵලය වන්නේ රෝගය කලක් තිස්සේ නිහඩව සිරුර තුළ වර්ධනය වීමය.පසුව ඒවාට සම්බන්ධ රෝග ලක්ෂණ පළ කරන කාලය වන විට රෝගය බොහෝ සෙයින් වර්ධනය වී හමාරය.

අධික රුධිර පීඩනය.

මෙය බොහෝ විටම හදුනා ගැනීමට ලැබෙන්නේ වෙනත් රෝගයකට වෛද්‍ය ප්‍රතිකාර ගන්නට ගිය අවස්ථාවේ වෛද්‍යවරයා විසින් රුධිර පීඩනය මැන බලන විටදීය.එසේ නැත්නම් අලුතෙන් රැකියාවකට යාමේදී වෛද්‍ය පරීක්ෂණයකට යොමුවන්නට සිදු වූ විටය.

අධි රුධිර පීඩනයද මුල් කාලයේදී කිසිදු රෝග ලක්ෂණයක් පළ කරන්නේ නැත.මේ හේතුව නිසා කෙනෙකු තමන්ගේ වයස අවුරුදු 40 පමණ වන විට ශරීර සෞඛ්‍යයට අදාළ මූලික පරීක්ෂාවන් කර ගැනීම ඉතා වැදගත් වෙයි.රෝග ලක්ෂණ පහල නොවී ශරීරය තුළ පවතින අධි රුධිර පීඩනය එමගින් හදුනා ගැනීමට හැකියාව ලැබේ.

මෙම රෝගයේදී සිරුරට රුධිරය සැපයීම නිසි ලෙස සිදු නොවීම මත වෙනත් ඉන්ද්‍රියන්ට බරපතල හානි පැමිණෙයි.අධි රුධිර පීඩන වර්ග 2කි.

1. ශාරීරික හේතුවක් නැතිව ඇතිවන අධි රුධිර පීඩනය.(Essential hyper tension.)

2. ශරීරය තුළ වෙනත් හේතුවක් නිසා ඇතිවන අධි රුධිර පීඩනය.(Secondary hyper tension.)

මින් පළමු කී වර්ගය හට ගැනීම සදහා ශරීර අභ්‍යන්තරයෙහි කිසිදු හේතුවක් බල නොපාන අතර, බාහිර හේතු, එනම් තරබාරුකම, මානසික අසහනය, මත්පැන් පානය, අධික ලුණු භාවිතය වැනි තත්වයන් මෙයට හේතු වෙයි.නමුත් මේ කිසිවක්ම නොමැතිව පරම්පරානුගතවද කෙනෙකුට මේ වර්ගයේ අධි රුධිර පීඩනය වැළදිය හැකිය.

දෙවන වර්ගය වැළදෙන්නේ ශරීරය තුළ පවතින වෙනත් හේතුවක් නිසාවෙනි.වකුගඩු වලට අදාළ ඇතැම් රෝග, ශරීරයේ හෝමෝන සම්බන්ධ වෙනත් තත්වයන්, හෘදයට සම්බන්ධ සමහර රෝග තත්වයන්, සමහර ඖෂධ ආදිය මීට බලපාන හේතූන්ය.

මෙහිදී ඉහත කී හෝමෝන සම්බන්ධ රෝග තත්වයන් පිළිබදව විස්තර කළහොත් විවිධ හේතු නිසා හෝමෝන ශ්‍රාවය කරන ඉන්ද්‍රියන් වැඩියෙන් හෝමෝන ශ්‍රාවය කිරීම මේ සදහා බලපායි.නිදසුනක් ලෙස ඇඩ්‍රිනලින් ග්‍රන්ටියෙන් අධිකව හෝමෝන ශ්‍රාවය වීම දැක්විය හැකිය.අප කෝප ගන්නා විට ශරීරයේ ඇඩ්‍රිනලින් හෝමෝනය වැඩි වශයෙන් ශ්‍රාවය වෙයි.ඒ අනුව නිතර කෝප ගන්නා අය තුළ අධි රුධිර පීඩනය වැළදීමට ඇති හැකියාව වැඩිය.

කෙසේ වෙතත් අධි රුධිර පීඩනය වැළදුනු මුල් අවුරුදු කීපය තුළ රෝග ලක්ෂණ පළ නොකළත් රෝගය නිසා ශරීර අභ්‍යන්තරයට සිදුවන හානිය ඒ අයුරින්ම සිදුවේ.නොඑසේ නම් අධික රුධිර පීඩනය නම් සතුරා නිහඩව ඔබේ සිරුර තුළ ක්‍රියාත්මක වෙයි.ඒ නිසා කල් තබා රෝගය දැන ගැනීමෙන් ඖෂධ මගින් එය පාලනය කර ගැනීමට හැකි වන අතර, ඒ නිසා රෝගයෙන් වන සංකුලතාද අවම කර ගැනීමේ හෝ වළක්වා ගැනීමේ හැකියාව ලැබේ.

අවුරුදු 40 පසු වූ මුල් කාලයේදී මේ පිළිබදව පරීක්ෂා කර දැනගත් පසු එය නිතර නිතර කර බැලිය යුතුද, වසර 2-3 කින් පරීක්ෂණ කිරීම ප්‍රමාණවත්ද යන කරුණු වෛද්‍යවරයා වෙතින් දැනගත හැකිය.

දියවැඩියාව.

මේ රෝගයේදී සිදු වන්නේ රුධිරයේ ග්ලූකෝස් මට්ටම ඉහළ යාමය.

දියවැඩියාවද Type A සහ Type B යනුවෙන් වර්ග 2 කි.

Type A ශරීරයේ ඉන්සියුලින් මද වීම හේතු කොට ගෙන මුල් කාලයේදී ඇති විය හැකිය.

Type B ජීවිතයේ මැදිවයසේදී හට ගනියි.

මේ වර්ග දෙකේදීම රෝග ලක්ෂණ ලෙස නිතර දැනෙන පිපාසය, අධිකව මුත්‍රා පිටවීම, රාත්‍රියේදී කිහිපවරක් නින්දෙන් නැගිට මුත්‍රා පහ කිරීමේ අවශ්‍යතාවය ඇති වීම වැනිදෑ දැකිය හැකිය.මෙබදු ලක්ෂණ පවතියි නම් අනිවාර්යයෙන්ම දියවැඩියාව තිබේදැයි යන්න දැන ගැනීම සදහා රුධිර පරීක්ෂණයක් කරවා ගත යුතුය.

නමුත් මෙවැනි කිසිදු ලක්ෂණයක් නැතිව වුවද දියවැඩියා රෝගය මුල් කාලය තුළ කෙනෙකුගේ ශරීරය තුළ පැනනගිනු ඇත.එයද ශරීරය තුළ ක්‍රියාත්මක වන නිහඩ සතුරෙකි.

දියවැඩියාව නිසි ලෙස ඖෂධ ගෙන පාලනය නොකළහොත් කරදර රාශියකට පසුව මුහුණ දීමට සිදුවනු ඇත.මේ රෝගය නිසා ශරීරයේ ස්නායු පද්ධතියට, වකුගඩු වලට, ඇස්වලට ආදී වශයෙන් වූ ශරීරයේ සෑම ඉන්ද්‍රියකටම හානි පැමිණේ.

ඇස්වල සුද මතුවීම මෙන්ම ඇස්වල ග්ලූකෝමා රෝගය හට ගැනීම තුළින් අන්ධභාවයට පත්වීම ආදිය දියවැඩියාවේදී බහුලව දැකිය හැකි අතුරු රෝග තත්වයන්ය.එසේම රුධිර වාහිනී අවහිර වීම(Atherosclerosis) නිසා හෘදයාබාධ, ආඝාත(Stroke) හට ගැනීමද මෙහි ප්‍රතිඵලයක් ලෙස ඇතිවිය හැකිය.

යම් පුද්ගලයකුට දියවැඩියා රෝගය ඇති බව හදුනාගත හැකි පරීක්ෂණයක් වන්නේ පැය 8ක් නිරාහාරව සිට ගන්නා රුධිරයේ සීනි පරීක්ෂාවයි.(Fasting blood sugar) මෙහිදී d1/mg 115 ට වැඩි අගයකින් රුධිරයේ සීනි ඇත්නම් ඒ පුද්ගලයා දියවැඩියා රෝගියකු ලෙස පිළිගත හැකිය.කෙසේ වුවද මේ අගය d1/mg 300 ට වැඩි වුවද කිසිදු දියවැඩියා රෝග ලක්ෂණයක් පළ නොකරන අය වෛද්‍ය පරීක්ෂණවලදී අපට මුණ ගැසී තිබේ.මෙය සාමාන්‍ය අගයට වඩා ඉතා වැඩි අගයක් වුවද මේ අය තුළ කිසිදු දියවැඩියා රෝග ලක්ෂණයක් පහල නොවීමට හේතුව කාලයක් තිස්සේ රුධිරයේ ඉහළ ගිය සීනි ප්‍රමාණයට අනුව ඔවුන්ගේ ශරීරය ඉබේම ඊට හැඩ ගැසීම(Adaptation) ය.මේ තත්වය ශරීරයට ඉතා අහිතකර වන අතර, මේ නිසා ශරීරයේ ඉන්ද්‍රියන්ට වෙන හානියද ඉක්මනින්ම සිදු වනු ඇත.අවසානයේ රෝගියා කිසිදු රෝග ලක්ෂණයක් පළ නොකර වුවද දියවැඩියා කෝමා(Diabetic coma) තත්වය හෙවත් මුර්ජාවට පත්විය හැකිය.මෙය ඉතා අනතුරුදායක තත්වයකි.

දියවැඩියාව නිසා ශරීරයේ ඉන්ද්‍රියන්ට හානියක් නොවී පවත්වා ගන්නට නම් ක්‍රමවත් ආහාර පුරුදු ඇති කර ගැනීම, ව්‍යායාම හා ඖෂධ ප්‍රතිකාර ලබා ගැනීම නිසි අයුරින් කළ යුතු වෙයි.මේ නිසා ඇස්, වකුගඩු, හෘදය ආදී වශයෙන් වූ එක් එක් ඉන්ද්‍රියන්ට අහිතකර බලපෑම් ඇති වී තිබේදැයි දැනගත හැකි වෛද්‍ය පරීක්ෂණ තිබේ.එමගින් මෙම රෝගය තුළින් ශරීරයට නිහඩව ඇති කරන හානිය හදුනා ගත හැකිය.

අධි කොලෙස්ටරෝල්තාවය.

ඉහත සදහන් රෝග අවස්ථා දෙකේදී මෙන් මෙම රෝගයේදී ද එකවර රෝග ලක්ෂණ මතු වන්නේ නැත.කුඩා රුධිර වාහිනී ඇතුළත මේදය තැන්පත් වී අවහිර වීම මෙහිදී සිදුවන අතර, එමගින් ඉන්ද්‍රියන්වලට රුධිරය සැපයුම නිසි පරිදි සිදු වන්නේ නැත.හෘදයට රුධිරය සපයන කිරීටක ධමනිවල මේදය තැන්පත් වී අවහිර වීම නිසා හෘද පේශිවල ක්‍රියාකාරීත්වයට අවශ්‍ය රුධිර සැපයුම කිරීටක ධමනි මගින් නිසි ලෙස සිදු නොවේ.

වකුගඩුවලට රුධිරය සපයන කුඩා රුධිර නාලවල අවහිර වීම නිසා වකුගඩුවලට හානි පැමිණී එය අක්‍රිය වීම සිදුවනු ඇත.

මේ රෝග තුන සම්බන්ධ පරීක්ෂණ වයස අවුරුදු 40 දී පමණ සිදුකරගත යුතු අතර, පරම්පරානුගතව මේ රෝග පවුලේ කෙනෙකුට පවතියි නම් රෝග ලක්ෂණ පහල නොවී තිබුණත් වයස 40ට පෙර මේ රෝග තුන සම්බන්ධයෙන් වෛද්‍ය පරීක්ෂණවලට සහභාගී වීම අතිශයින් වැදගත්ය.

පවුල් අවුල් කරවන ලිංගික විකෘතිතා

2010-03-30T11:20:00.000+05:30

විශේෂඥ මනෝ වෛද්‍ය කපිල රණසිංහ මහතා සමග කළ සාකාච්ඡාවක් ඇසුරිනි.

බොහෝ දේවල් සම්බන්ධයෙන් මෙන්ම ලිංගික ක්‍රියා සම්බන්ධයෙන් ද පිළිගත් ආචාර ධර්ම ඇත.සදාචාරයට පටහැනි වුවත් අනියම් සම්බන්ධතා වුවද අසාමාන්‍යතාවන් ලෙස නොසැලකේ.නමුත් කෙනෙකුගේ ලිංගික ක්‍රියාවකින් ඒ පුද්ගලයාට මෙන්ම අනෙක් අයටත් කායික හෝ මානසික හිරිහැරයක් වන්නේ නම් එය ඒ පුද්ගලයාගේ ලිංගික අසාමාන්‍යතාවයක් හෙවත් විකෘතිතාවයක් ලෙස නම් කළ හැකිය.මේවා මනෝ වෛද්‍ය විද්‍යාවේ මුලදී හැදින්වූයේ ලිංගික අවවර්තන(Sexual deviations) ලෙසිනි.නමුත් දැන් ඒවා "ලිංගික කැමැත්තෙහි පවත්නා ආබාධ"(Disorders of sexual preference.) ලෙස මනෝ වෛද්‍ය විද්‍යාව අරුත් දක්වයි.

ලිංගික අවවර්තන රාශියක් වෙයි.මේවා 99.9%ක්ම වැළදෙන්නේ පිරිමින්ටය.මෙමගින් බොහෝ කාන්තාවෝ පීඩාවට පත්වෙති.

අපේ රටේ පාලු පාරක තනිව ගමන් කරනා කාන්තාවකට හදිසියේම එම පාරේ කිසිවකුට වැඩිපුර නොපෙනෙන ස්ථානයක නතර වී හිදින පිරිමියකු තමන් ඇද සිටින ඇදුම නිරාවරණය කොට ලිංගේන්ද්‍රිය පෙන්වන්නට සලස්වා ලිංගිකත්වය සම්බන්ධ වදන් පිට කිරීම ඉතා සුලභව දැකිය හැකි තත්වයකි.එහිදී එම කාන්තාව බියට, චකිතයට, අපහසුවට හා ලැජ්ජාවට පත් වන අතර ඇගේ එම ක්ෂණික චිත්තාවේග මගින් ඇති වන වෙනස, කලබලකාරී බව දකින එම පුද්ගලයා එතුළින් ලිංගික තෘප්තිය ලබයි.ඒ අප රටේ බහුලව දකින්නට ලැබෙන ලිංගික අවවර්තනයකි.

ඉහත කී ලිංගික අවවර්තනය මනෝ වෛද්‍ය විද්‍යාවේ හැදින්වෙන්නේ "ප්‍රදර්ශනකාමය"(Exhibitionism) ලෙසිනි.ජනයා නොගැවසෙන පාලු පාරක් වැනි ස්ථානයක නතර වී නන්නාදුනන කාන්තාවකට සිය ලිංගේන්ද්‍රිය ප්‍රදර්ශනය කිරීම, ප්‍රදර්ශනකාමයේ ස්වභාවයයි.එම තැනැත්තා කරන ක්‍රියාවට කාන්තාව දක්වන දැඩි ප්‍රතික්‍රියා ඔහුගේ ලිංගික තෘප්තිය පිණිස හේතුවනු ඇත.මෙසේ ලිංගික තෘප්තියට පත්වනු මිස ඒ තැනැත්තා එකී කාන්තාවට ලිංගික අතවරයක් කිරීමට පෙලඹෙන්නේ නැත.ඊට හේතුව ඔහු තුළ ඇති ලිංගික විකෘතිතාවය නිසා ඔහු කාන්තාවක් සමග ලිංගිකව එක් වීමෙන් තෘප්තියක් ලැබීම වෙනුවට මේ ආකාරයට සතුටක් ලැබීම ප්‍රිය කරන බැවිනි.

ඕනෑම සමාජයක, ඕනෑම සංස්කෘතියක ප්‍රදර්ශනකාමයෙන් පෙලෙන්නෝ සිටිති.නමුත් මේ පිරිමින් ඕනෑම කාන්තාවක් ඉදිරියේ තම ලිංගේන්ද්‍රිය ප්‍රදර්ශනය කිරීමට උත්සාහ ගන්නේද නැත.තමන්ට පහර කෑමට සිදු නොවෙතැයි අනුමාන කරන කාන්තාවක් ඉදිරෙයේ ඔවුහු මෙසේ රහස් ඉන්ද්‍රිය ප්‍රදර්ශනය කරති.

ප්‍රදර්ශනකාමයෙන් පෙලෙන පිරිමින් තුළ බොහෝ විට තවත් ලිංගික අවවර්තනද තිබිය හැකිය.අපි ඒ ගැනත් මදක් විමසා බලමු.

මුහුණේ එක් පැත්තක ඇලවූ පැලැස්තරයක් හා එක් අතක වැලමිටෙන් පහල සිට මැණික් කටුව දක්වා වෙලන ලද බැන්ඩේජ් පටියක් ද සහිතව තරුණ පිරිමි අයකු මනෝ වෛද්‍යවරයාගේ කාමරයට ඇතුලු වූයේ ඔහුගේ බිරිද යයි සිතිය හැකි තරුණ කාන්තාවක් ද සමගිනි.

ඔහුගේ මුහුණට සහ අතට සිදුවූයේ කුමක්දැයි වෛද්‍යවරයා ඇසූ විට "පොඩි සිද්ධියක් වුනා ඩොක්ටර්" යනුවෙන් කියා ඔහු නිහඩ වූවා පමණි.ඔහුගේ කතාවෙහි ඌන පූරණය කළේ බිරිදය.

"මේ මනුස්සයට තියෙනවනේ ඩොක්ටර් අමුතුම විදිහේ ලෙඩක්."බිරිද කීයේ තරහ මුසු හඩිනි.

ඇය ඉන්පසුව කී දීර්ඝ විස්තරයට අනුව මේ තැනැත්තා මෑතකදී විවාහ වූවෙකි.නමුත් එම බිරිද කී පරිදි ඔහුට ඇය සමග කායික සම්බන්ධතා පැවැත්වීමට වැඩි උනන්දුවක් නැත.යෝජනාවක් මත ඇය හා විවාහ වී තිබූ මේ තරුණයා තමන් ගැන වැඩි උනන්දුවක් නොදැක්වීමට හේතුව කුමක්දැයි බිරිදට වටහා ගත හැකි වූයේ නැත.දිනක් ඔහු පිරිමින් කිහිප දෙනෙකුගෙන් හොදහැටි පහර කෑම නිසා වෙනත් අසල්වැසි පුද්ගලයකු විසින් ගෙදරට ගෙනත් ඇරලවන ලද්දේ ඔහු පිළිබදව අප්‍රසන්න රහසක්ද හෙළි කරමිනි.ගමේ ලිදක තරුණියන් දෙදෙනෙකු නාමින් සිටියදී ඔහු ඒ අසල උණ පදුරකට මුවා වී එය නරඹමින් හිද තිබේ.එතැනින් යන්නට ආ එක තරුණියකගේ සහෝදරයකු හා ඔහුගේ මිතුරෙකු මේ සිද්ධිය දැක ඔහුට හොදහැටි පහර දී ඇත.වෙනත් අසල්වැසියෙකු මේ තැනැත්තාව නිවසට ඇරලවා ඇත්තේ එසේ පහර කා වැටී සිටියදීය.

මෙයද ඉහත බදුම ලිංගික අවවර්තනයකි.එය හදුන්වන්නේ "දර්ශාස්වාදය"(Voyeurism) ලෙසය.

කාන්තාවන් දිය නාන විට, ඇදුම් මාරු කරන විට ආදී වශයෙන් ඇගේ ශරීර අභ්‍යන්තරය යම් පමණකට නිරාවරණය විය හැකි අවස්ථාවලදී ඒ දෙස හොරෙන් බලා හිදීමෙන් ලිංගික තෘප්තියක් ලැබීම මේ මානසික ආබාධයේ ස්වභාවයයි.

සමාන්‍යයෙන් කාන්තාවන්ගේ ශරීරයේ වැසී ඇති කොටස් පිලිබදව පිරිමින් තුළ කුතුහලයක්, උනන්දුවක් පවතියි.එනිසාම ඒ කෙරෙහි පිරිමින්ගේ ආකර්ශනයද වැඩිය.කිසියම් අවස්ථාවක එනම් නාන විට, ඇදුම් මාරු කරන විට ආදී වශයෙන් කාන්තාවකගේ සිරුරේ වැසී ඇති කොටස් දකින විට නව යොවුන් පිරිමින් තුළ ලිංගික උත්තේජනයක් ඇති වෙයි.නමුත් ඔවුන් තවත් වර්ධනය වී ප්‍රේම සම්බන්ධතා ආදිය ඇති කර ගත් පසු නව යොවුන් වියේදී තරම් කාන්තාවක් ස්නානය කරනු දකින විට, ඇදුම් මාරු කරනු දකින විට ලිංගික ඇවිස්සීමක් සිදු වන්නේ නැත.

ඒ සමාන්‍ය තත්වය වුවත් ටික දෙනෙකුට මෙය පුරුද්දක් බවට පත් විය හැකිය.කාන්තාවක් කිසිසේත් බලාපොරොත්තු නොවන අවස්ථාවක සැගවී සිට ඔවුන්ගේ පෞද්ගලික ක්‍රියාකාරකම් බලමින් ලිංගික ආශ්වාදයක් ලැබීම මේ දර්ශාස්වාදයේ ස්වභාවයයි.

ප්‍රදර්ශනකාමය මෙන්ම දර්ශාස්වාදයත් බොහෝ විට එක පුද්ගලයකුට පිහිටීමට පුලුවන.මේවා මානසික රෝග වශයෙන්ම නොසැලකෙතත් යම් කෙනෙකුට මෙය ඇබ්බැහියාවක් බවට පත් වීමේ ඉඩකඩක් තිබේ.ඒවා ලිංගිකත්වය සම්බන්ධ විකෘති තත්වයන්ය.එවැනි දේකින් සතුටක් ලබන පිරිමියකුට කාන්තාවක් සමග කායිකව එක් වීමෙන් එතරම් සතුටක් ලැබීම අසීරුය.එවිට එම කාන්තාව ඔහු නිසා සිත් වේදනාවට, කලකිරීමට පත් විය හැකිය.

ප්‍රදර්ශනකාමය, දර්ශාස්වාදය වැනි බොහෝ ලිංගික අවවර්තන පවතින අය පෞරුෂ ඌනතාවය සහිත පුද්ගලයන් වෙති.ඔවුන් සමාජශීලී නැත.දක්ෂතාවයන්ද අඩු අයයි.කාන්තාවන් ඉදිරිපිටදී අපහසුතාවයට පත් වන මේ පුද්ගලයන් තුළ බොහෝ විටම සමාජ භීතිකාවද(Social phobia) පවතිනු ඇත.

මෙවැනි ලිංගික විකෘතිතාවයන් සහිත පුද්ගලයන් විවාහ වුවත් ඔවුනට බිරිද සමග එක් වීමෙන් නියම ලිංගික සතුට නොලැබෙන නිසා බිරිදටද අසාධාරණයක් සිදුවේ.එනිසා ඔවුන්ගේ පවුල් ජීවිතය අසාර්ථක විය හැකිය.

එසේම ඔවුන් මෙවැනි ක්‍රියාවල යෙදීමේදී අන් පුද්ගලයන් වෙතින් පහර කෑමට ද ලක් වනු ඇත.කොතරම් පහර කෑම් වලට ලක් වුනත් ඔවුන්ට මේ පුරුද්දෙන් මිදිය නොහැකිය.එනිසා සුදුසුම දෙය මෙවැන්නන් මනෝ වෛද්‍ය ප්‍රතිකාරවලට යොමු කිරීමය.මන්ද මෙම ලිංගික අසාමාන්‍යතා නිසා ඒ පුද්ගලයා අපහසුවට පත්වන අතරේ බිරිද කළකිරීමටත්, පවුලේ සියලු දෙනාම තදබල ලජ්ජාවටත් පත් වන නිසාය.දිගු කලක් මනෝ වෛද්‍ය ප්‍රතිකාර ගැනීම තුලින් මෙම තත්වයන් සුව කළ හැකිය.

සමහර පිරිමින් තමන්ගේ බිරිද අන්සතු කොට සතුටු වන්නේ ඇයි?

2010-03-25T17:37:00.000+05:30

විශේෂඥ මනෝ වෛද්‍ය කපිල රණසිංහ මහතා සමග කළ සාකාච්ඡාවක් ඇසුරිනි.

"මගේ හස්බන්ඩ් සමාජයේ ඉහළ පිලිගැනීමක් තියෙන කෙනෙක්.සල්ලි, සැප සම්පත් මේ කිසිම දේකින් අපට කිසි අඩුවකුත් නෑ.අවුරුදු දෙක හමාරක පුංචි දුවෙකුත් අපි දෙන්නට ඉන්නව.බැලූ බැල්මට ඕනෙ කෙනෙක් හිතන්නෙ මම මේ ලෝකෙ ඉන්න වාසනාවන්තම ගෑනු කෙනෙක් කියල.ඒත් කාටවත් කියා ගන්න බැරි එක ප්‍රශ්නයක් හින්දා මම ලොකු මානසික පීඩාවක් විදිනව."

මේ නමක් ගමක් සදහන් නොකල එක්තරා කාන්තාවක් දුරකථනය මගින් පැවසූ විස්තරයකි.ඒ අනුව ඇගේ ගැටලුව පිලිබදව දිගින් දිගටම විමසා බැලූ මට ඇය නොකැපිලව එය විස්තර කලේ මේ තත්වයෙන් ගොඩ ඒම සදහා කිනම් හෝ උපදෙසක් දෙන්නැයි ඉල්ලීමක් ද කරමිනි.

තවමත් 28 හැවිරිදි වූ මේ කාන්තාව විවාහ වී තිබුනේ සමාජයේ පිලිගැනීමට ලක්ව හිදින ධනවත් පුද්ගලයකු සමගිනි.ඇය පවසන අන්දමට එය යෝජිත විවාහයකි.විවාහයෙන් වසරකට පසු ඔවුනට දියණියක ලැබී ඇති අතර දියණියට වසරක් පමණ වන තුරුම ඔවුන් අතර මතභේද, අවුල් කිසිවක් ඇති වී නොමැත.

මේ කාන්තාව පවසන ආකාරයට ඇගේ සැමියාට දැන් ටික කලෙක සිට වැලදී තිබෙන්නේ අමුතුම 'පිස්සුවකි'.ඔහු මේ තත්වයට පත් වූ මුල් කාලයේදී ඇගෙන් විමසා ඇත්තේ ඇය අතීතයේ ඇසුරු කල පෙම්වතුන් පිලිබදවය.තමාට පාසල් යන කාලයේ මාසයකට දෙකකට පමනක් සීමා වූ කෙටිකාලීන ප්‍රේම සම්බන්ධයක් තිබූ බව ඇය හෙලි කලේ ඔහුගේ ඇවටිල්ල හිසරදයක් තරමට කරදරයක් වූ නිසාය.

ඊළගට ඔහු කීවේ අමුතුම කතාවකි.

"ඔයා එයාට කැමති නම් එයත් එක්ක සම්බන්ධයක් තියා ගත්තට මට කමක් නෑ.හැබැයි පිට කොහේවත් යන්න බෑ.මේ ගෙදර ඇතුලෙ මං දැනුවත්වයි ඒක කෙරෙන්න ඕනෙ."

මේ ලෝකයේ කිසිම සැමියකු නොකියන අන්දමේ කතාවක් තම සැමියා වෙතින් පිට වීමට හේතුව ඔහුට මානසික රෝගයක් වැලදීම නිසා වත්දැයි මෙම කාන්තාව කල්පනා කරන්නට වූවාය.නමුත් ඒ ගැන ඔහුට සෘජුව පැවසීමේ ශක්තියක් ඇයට නොතිබිනි.

කෙසේ වුවද තම පලමු පෙම්වතා නැවත කැදවීමට ඇයට කිසිදු වුවමනාවක් තිබුනේ නැත.ඉන් ටික කාලයකට පසු ඔහු තවත් අමුතු කතාවක් කියන්නට පටන් ගත්තේය.

"මාත් එක්ක මේ ඉන්නව වගේ තවත් කෙනෙක් එක්ක ඔයාට ඉන්න ඕනෙ නම් මගෙ ඒකට අකමැත්තක් නෑ."කායික සම්බන්ධයක් පවත්වන අවස්ථාවලදී ඔහු එලෙස කියන විට ඇය තුළ ඇති වූයේ තදබල පිලිකුලකි.ඔහුගේ මතය වූයේ ලිංගික සම්බන්ධතා නිදහසේ තමන් කැමති කෙනෙකු හා පැවැත්වීමට විවාහය බාධකයක් කර ගත නොගත යුතු බවය.

ඔහුගේ මෙම අදහස් තරුණ බිරිද තුළ මහත් වූ පුදුමයක් ඇති කිරීමට සමත් විය.නමුත් මේ පිලිබදව කටක් ඇර කාටවත් කීමේ හැකියාවක් ඇයට නොතිබිනි.එසේම සැමියා පිලිබදව ඇගේ සිතේ පිලිකුලක් සහ දැඩි කළකිරීමක් ද ඇති වී තිබිනි.

තව ටික කලක් ගත වන විට සැමියාගේ මිතුරෙකු ඔවුන්ගේ නිවසේ නතර වූයේ ඔහුට උසස් විභාගයකට පාඩම් කිරීමට අවශ්‍ය බව කියමිනි.ඔහුට නවාතැන් ලැබුනේ මේ යුවල සිටි කාමරයට යාබද කාමරයෙහිය.

සැමියාගේ මිතුරා ඉතා යහපත් ගති ඇති අයකු බවට ඔහුගේ හැසිරීම් වලින් සනාථ කර ගත හැකි වූ නිසාම මේ තරුණ කාන්තාව වැඩි කල් නොයවාම ඔහුගේ මිතුරියක බවට පත් වූවාය.මේ තරුණයා කොතරම් උසස් ගතිගුණවලින්, හැදියාවකින් යුතු විනි දැයි කිවහොත් ඔහු තම සැමියාට වඩා මොන තරම් ශ්‍රේෂ්ථ අයෙකු දැයි කල් යාමේදී ඇයට හැගෙන්නට විය.මේ කාලය වන විට ඇය සැමියාගේ අමුතු යෝජනා නිසා ඔහු එපා වන තත්වයකට පත් වී සිටියාය.

කෙසේ හෝ කල් යාමේදී මේ තරුණයා සමග ඇගේ අනියම් සම්බන්ධයක් ඇති වූ අතර එය කිසිදු ආකාරයකින් සැමියාට දැන ගන්නට ඇය ඉඩ තැබුවේ නැත.නමුත් දිනක් ඇය තම අනියම් පෙම්වතා සමග කායික සම්බන්ධතාවයක යෙදී සිටියදී හදිසියේම ඇගේ සැමියා කාමරයට කඩා වැදුනේ ඇය බියෙන් සහ ලැජ්ජාවෙන් මුසපත් කරවාලමිනි.එසේ වුවද සැමියා ඒ මොහොතේ ඇගෙන් කළ ඉල්ලීම ඇය තුළ තදබල කල කිරීමක් ඇති කරවීමට සමත් විය.පසුව ඇයට දැන ගන්නට ලැබුනු පරිදි සැමියාගේ මිතුරා ඇය සමග ප්‍රේම සම්බන්ධතාවයකට මුල පුරා ඇත්තේ සැමියාගේ ඉල්ලීම මත ඔහු දැනුවත්වය.එසේම ඔවුන් අතර වූ සෑම කායික සම්බන්ධතාවයක්ම ඔහු රහසේම නරඹා ඇත.

මේ හේතුව මත ජීවිතය පිලිබදව බෙහෙවින් කළකිරී තිබූ ඇය දරුවා නිසා සැමියාගෙන් වෙන් වී යාමට බැරිකමට ඔහුගේ නිවසේ වෙනත් කාමරයක ජීවත් වන්නට පටන් ගෙන තිබේ.ඇය දුරකථන ඇමතුමක් දී විමසා සිටියේ මේ ගැටලුවට විසදුමකි.

සාමාන්‍යයෙන් සතුන් මෙන් නොව මනුෂ්‍යයන් අතර ලිංගික ක්‍රියාකාරකම් සිදු වන්නේ අන් අයට නොපෙනෙන්නට රහසේය.එසේ නොවන සමූහ ලිංගික ක්‍රියාකාරකම් වැනි දෑ සමාජයේ විවිධ කොටස් තුළ ඇතැම් විට පවතින මුත් මේ කතා කරන්නේ ඒ ගැන නොවේ.අපේ සමාජයෙහි පිලි ගත් සම්ප්‍රදාය පිලිබදවය.

නමුත් එසේ නොවන ඉහත කී සිද්ධියේ එන ආකාරයේ පුද්ගලයෝද මේ සමාජය තුළ සිටිති.විවාහක කාන්තාවක් අන් පිරිමියකු සමග මෙන්ම විවාහක සැමියකු අන් කාන්තාවක සමගද අනියම් සම්බන්ධතාවයක් පැවැත්වීම අසාමාන්‍ය දෙයක් හෝ මානසික විකෘතියක් ලෙස පිලි නොගන්නා මුත් තමන්ගේ බිරිද අන් අයකු හා ලිංගික ක්‍රියාකාරකම්වල යෙදෙනු බලා යම් සැමියකු තෘප්තියක් ලබන්නේ නම් එය ලිංගික විකෘතියක් හෙවත් අවවර්තනයක්(Disorders of sexual preference.) ලෙස මනෝ වෛද්‍ය විද්‍යාවේ සදහන්වේ.ඒ අනුව මානසික ආබාධයක් වන මෙය මනෝ වෛද්‍යවරුන් නම් කරන්නේ ට්‍රොයිලිසම්(Troilism) ලෙසිනි.

මේ මානසික ආබාධයේ ස්වභාවය නම් ලිංගික ක්‍රියාවලියට තිදෙනෙකු සම්බන්ධ වීමය.එනම් ලිංගික ක්‍රියාකාරකමෙහි නිරත වන දෙදෙනා සහ එය නරඹමින් සතුටු වන්නාය.බොහෝ විට පිරිමින් තුළ දැකිය හැකි මේ මානසික ආබාධය කාන්තාවන්ටද වැළදෙතත් එය පිරිමින්ට සාපේක්ෂව අඩු බව මනෝ වෛද්‍යවරුන්ගේ අදහසයි.

යුවලක් අතර කාලයක් ඒකාකාරී ලිංගික සම්බන්ධතා ඇති වන විට සමහර පිරිමින් එය නීරස වීමෙන් මෙවැනි දේකට යොමු විය හැකිය.මෙහි මුලින්ම සදහන් කල සිදුවීමේදී මෙන් මෙහිදී තම බිරිදට අන් පිරිමියකු හා ලිංගිකව එකතු වීමට ඉඩ සලස්වන්නේ සැමියාය.මෙසේ එකතු වනු බලා හිදින විට ඔහු තුළ ලිංගික උත්තේජනයක් සහ ප්‍රාණවත් භාවය ඇති වනු ඇත.සමහරු එය නරඹමින් ස්වයං වින්දනයේ යෙදී සුරතාන්තයට ද පත් වෙති.එවැනි දෙයක් දැකීමෙන්ම සුරතාන්තයට පත් වන පිරිමින් සිටිති.තවත් සමහර පිරිමින් ඒ අවස්ථාවේ ඒ දෙදෙනා අතරට වැද ලිංගික ක්‍රියාකාරකමට සම්බන්ධවේ.

බොහෝ දෙනා මෙවැනි දේවල් ලිංගිකත්වයට අදාළ විවිධත්වයක් වශයෙන් සලකන්නට ඉඩ ඇතත් සැබවින්ම මේවා මානසික ආබාධයන්ය.නමුත් මේවා බොහෝ විටම බාහිරට අනාවරණය නොවන්නේ සමහර බිරියන් මුලින් අකමැති වුවත් පසුව ඒවාට හුරු වීම වැනි හේතු නිසාය.අනෙක් විශේෂම දෙය නම් මේවා මානසික ආබාධ බව සමාජය නොදැන හිදීමය.

ට්‍රොයිලිසම් වැලදෙන පිරිමින් අතර බහුතරයක් මැදි වියේ අයයි.මත්පැන් සහ ගංජා ආදී මත්ද්‍රව්‍යවලට ඇබ්බැහි වූ පිරිමින්ටද ට්‍රොයිලිසම් වැලදීමේ හැකියාව තිබේ.

කුඩා කල සිට නිසි ලෙස පෞරුෂය සංවර්ධනය නොවීම නිසා වැඩිහිටි වියට එන විට පෞරුෂ දුබලතා සහිත පුද්ගලයන් බවට පත් වූ අයටද මෙවැනි මානසික රෝග වැළදීමට පුලුවන.එසේම ආත්ම විශ්වාසය අඩු තමන්ගේ ප්‍රශ්ණ විවෘතව කතා කිරීමට ඉදිරිපත් නොවන පිරිමින්ද පසුකාලීනව මෙබදු මානසික රෝගවලට ගොදුරු වීමේ හැකියාවක් පවතියි.

කෙසේ වුවත් ඉහත සිද්ධියේ මෙන් යම් බිරිදකට සැමියාගෙන් මෙබදු බලපෑම් තිබේ නම් කළයුතු එකම දෙය වන්නේ ඔහු මනෝ වෛද්‍යවරයකු වෙත යොමු කිරීමය.මන්ද මෙවැනි දේට යොමුවන පිරිමින් පසුව ඒ ඔස්සේම හබා යාමට ඉඩ ඇති බැවිනි.සමාජයට හානිදායක වන මෙබදු මානසික ආබාධවලට මනෝ වෛද්‍ය ප්‍රතිකාර ගැනීම සියලු ආකාරයෙන්ම යහපත්වේ.

නීති විරෝධී ගබ්සාවන් සීග්‍රයෙන් වැඩි වන්නේ ඇයි?

2010-03-17T12:49:00.000+05:30

උපදෙස් - වෛද්‍ය නිලංග සමරසිංහ.

කලකට උඩදී ගම්පහ දිස්ත්‍රික්කයේ ජනාකීර්ණ නගරයක ගබ්සා මධ්‍යස්ථානයක් වැටලීම සදහා අදාළ ප්‍රදේශය භාර මූලස්ථාන පොලිසියේ කැදවීම මත අපට ද යාමට සිදු විය.අප යන විටත් එහි ගබ්සාවන් කර ගැනීම සදහා කාන්තාවෝ පස් දෙනෙක් සිටියහ.

මෙම ගබ්සා මධ්‍යස්ථානය වටලන්නට මූලස්ථාන පොලිසියත් සමග අප සහභාගී වූයේ හතර වන වාරයටය.එහෙත් ඒ මොහොතේදීත් ගබ්සා මධ්‍යස්ථානයේ හිමිකරු සිටියේ බොහෝ සැහැල්ලු ලෙසය.තව කී වාරයක් වැටලුවත්, තමාට ඇප ලබා පහසුවෙන් ආපසු පැමිණ යලිත් මේ ව්‍යාපාරයම සුවසේ කර ගත හැකි බව ඔහු දැන සිටියේය.ඊට බලපෑ ලොකුම හේතුව ඔහු ප්‍රදේශයේ පොලිසියේ ලොක්කන්ට මාස්පතා රුපියල් තිස්දහස බැගින් අල්ලස් පිරිනැමීම බව නිල නොලත් ආරංචි මාර්ග මගින් දැන ගත හැකි විය.

මේ පුද්ගලයා සුඛෝපභෝගී වාහනයක් පාවිච්චි කරයි.ගබ්සා මද්‍යස්ථානයේ වෛද්‍යවරයාත් ඔහුය.නමුත් වෛද්‍ය විද්‍යාව සම්බන්ධ මළ පොතේ අකුරක් හේ නොදනියි.ඔහුට දවසට ලැබෙන ආදායම මනින්නට බාහිර තොරතුරු කිසිවක් අවශ්‍ය නොවේ.ඔහුගේ එදිනෙදා ගණන් හිලව් බැලීමම ප්‍රමාණවත්ය.මෙම වැටලීම සිදු වූයේ උද‍ය වරුවේය.එදින ඒ පැය කිහිපයක කාලය තුළ ඔහුගෙන් ගබ්සාවන් කර ගෙන ගිය කාන්තාවන්ගේ ප්‍රමාණය 12ක් බව පොතේ සටහන් වී තිබිණි.තව පස් දෙනෙක් ගබ්සාවන් අපේක්ෂාවෙන් එතැන රැදී සිටියහ.දවසකට කොපමණ ගබ්සාවන් ප්‍රමාණයක් කරන්නේද යන්න වටහා ගන්නට මීට වඩා තොරතුරු නැතුවත් කමක් නැත.

අප මේ පැවසුවේ කටුනායක නිදහස් වෙළෙද කලාපයට තරමක් ආසන්නයේ පිහිටි එක් ගබ්සා මධ්‍යස්ථානයක් පිළිබදවය.මේ ප්‍රදේශයේ තිබෙන හැම ගබ්සා මධ්‍යස්ථානයක්ම මීට දෙවෙනි නැත.මේ ඊට එක් උදාහරණයක් පමණි.

ගබ්සාවක් ඉබේ කිසියම් හේතුවක් මත සිදු නොවුණොත් එය හිතා මතා කර ගැනීම නීති විරෝධීය.නවීන විද්‍යාවේ දියුණුව අනුව මවකගේ කුසේ පිහිටි කළලයෙහි ජාන පරීක්ෂාවක් මගින් එම දරුවා අඩුපාඩු සහිත විකෘති දරුවෙක්ද, මන්ද මානසික දරුවෙක්ද යන්න කලින් දැන ගැනීමේ හැකියාව තිබේ.නමුත් අපේ රටේ නීතියට අනුව එවැනි දරු කළලයක් වුවත් ගබ්සා කිරීමට අවසරයක් නැත.ගබ්සාවක් කර ගැනීම නීතියට එකග වන්නේ එම ගැබ මගින් මවගේ ජීවිතය අවදානමකට ලක් වීමක් සිදුවන්නේ නම් පමණි.එයද ප්‍රසව හා නාරිවේද විශේෂඥ වෛද්‍යවරයකු විසින් සහතික කළ යුතුය.නමුත් අපේ රටේ දළ වශයෙන් දිනකට ගබ්සාවන් 700ක් පමණ සිදු වෙයි.ඒ වාර්තා වී ඇති ප්‍රමාණයයි.වාර්තා නොවූ ප්‍රමාණය මීට වඩා කිහිප ගුණයකින් ඉහළ වීමට ඉඩ තිබේ.

සංඛ්‍යා ලේඛන වලට අනුව නීති විරෝධී ගබ්සාවන් කරවා ගැනීමට පැමිණෙන කාන්තාවන්ගෙන් 60%ක් විවාහක අය වෙති.අවිවාහක කතුන්ගේ ප්‍රමාණය ඒ අනුව 40% කි.වයස් ප්‍රමාණය අනුව බැලුවොත් වැඩිපුරම නීති විරෝධී ගබ්සාවන් වලට යොමු වන්නේ වයස 20ට අඩු තරිණියන් හා 35ට ඉහළ කතුන්ය.අඩු වයසින් ගැබ් ගන්නා තරුණියන් බොහෝ විට ප්‍රේමය යනු කායික සම්බන්ධතා ලෙස වරදවා වටහා ගත් සහ අධ්‍යාපන මට්ටමින් අඩු අයයි.35ට වැඩි කතුන් අනපේක්ෂිත ලෙස ගැබ්ගත් අය වන අතර ඔවුහු තවත් දරුවකු අවශ්‍ය නොවන අය වෙති.

මේ කාණ්ඩවලට අයත් නොවන අනෙකුත් වයස්වල කාන්තාවන් අතර නීති විරෝධී ගබ්සා අඩු වීමට හේතුව ඔවුන් දැන උගත්, සදාචාර සම්පන්න අය වීමම නොවේ.මේ වයස් වල අය බොහොමයක් උපත් පාලන ක්‍රම අනුගමනය කරන බව පෙනේ.උපත් පාලන පෙති, එන්නත, සැක සහිත එක් වීමකින් පසුව පැය 72ක් ඇතුළත ගන්නා පෙති, පිරිමින් කොණ්ඩම භාවිතා කිරීම මේ අතර සුලබය.මින් වඩාත්ම ජනප්‍රිය වී ඇත්තේ එන්නත සහ පැය 72ක් ඇතුළත ගන්න පෙති වර්ගයයි.පෙති කෙසේ වෙතත් ඩිපෝප්‍රොවේරා එන්නත සාමාන්‍යයෙන් දෙනු ලබන්නේ දරුවකු බිහි කළ කාන්තාවකට පවුල සැලසුම් කිරීම සදහාය.නමුත් අවිවාහක, එකම දරුවකුවත් බිහි නොකළ කතුන් දැන් බහුල ලෙසම මේ එන්නත ලබා ගන්නා බව වාර්තා වෙයි.මෙසේ වී තිබෙන්නේ දැන් බොහෝ තරුණියන් විවාහයට පෙර පෙම්වතුන් හා කායික සම්බන්ධතා පැවැත්වීම බහුල බැවිනි.විශේෂයෙන් පිට පළාත්වලින් පැමිණ නගර ආසන්නයේ නැවතී රැකියා කරන තරුණියන් පෙම්වතුන් සමග එකට ජීවත් වීම වර්තමානයේ වැඩි වී ඇත.මේ තත්වය වඩාත් බහුල ලෙසම වර්ධනය වී තිබෙන්නේ නිදහස් වෙළෙද කලාපයේය.අප කළ සමීක්ෂණයකට අනුව කටුනායක නිදහස් වෙළෙද කලාපයේ පිහිටුවා ඇති වෛද්‍ය මධ්‍යස්ථාන වලට ඩිපෝප්‍රොවේරා පවුල් සැලසුම් එන්නත් සපයනු ලබන අලෙවි නියෝජිතයෙකු හෙලි කර සිටියේ තමා වැඩිම ආදායමක් ලබනුයේ වෙළෙද කලාපයේ වෛද්‍ය මධ්‍යස්ථාන වලින් බවය.ඔහු සදහන් කර සිටි අන්දමට කටුනායක වෙළෙද කලාපයේ වෛද්‍ය මධ්‍යාස්ථාන වලට පමණක් මෙම තුන් මාසයේ පවුල් සැලසුම් එන්නත් ඔහු විසින් බෙදා හරින ප්‍රමාණය මසකට පහලොස් දහසකි.ඒ අනුව කොපමණ සංඛ්‍යාවක් මාස තුනකට වතාවක් මෙම එන්නත විද ගන්නේද යන්න දළ වශයෙන් සිතා ගත හැකිය.ඊට අමතරම පැය 72කට වරක් ගනු ලබන පෙති ද බොහෝ ජනප්‍රිය වී තිබේ.මේ එන්නත් හා පෙති ලබා ගන්නා අයගෙන් විශාල ප්‍රමාණයක් අවිවාහක තරුණියන් වීම මෙහි ඇති බරපතලම ඛේදවාචකයයි.අපේ රටේ සදාචාරය පහල බැස ඇති තරම කොතෙක්ද යන්න ගණනය කිරීම මෙමගින් අසීරු නොවේ.

සදාචාරය පහල බසින වේගයට සාපේක්ෂව ගබ්සා මධ්‍යස්ථාන ඉදිවන වේගයද ඉහළ යයි.එනිසා ගබ්සා මධ්‍යස්ථාන අතර ඇත්තේ ලොකු තරගයකි.ඉහත සදහන් කල ගබ්සා මධ්‍යස්ථානයත් ඊට කිලෝමීටරයක් පමණ දුරකින් පිහිටි තවත් ගබ්සා මධ්‍යස්ථානයකත් දෙපිරිස අතර ඊට ටික කලකට උඩදී ගුටි කෙළියක් ගිය බවටද දැන ගන්නට ලැබිණ.ඊට හේතුව එක ගබ්සා මධ්‍යස්ථානයකට පැමිණි ගනුදෙනු කරුවන් කිහිප දෙනෙකුව අනෙක් ගබ්සා මධ්‍යස්ථානයෙන් සන්තෝෂම් මුදල් ලබන ත්‍රීරෝද රථ රියදුරන් කිහිප දෙනෙකු විසින් හරවා අනික් ගබ්සා මධ්‍යස්ථානයට යැවීමය.ගබ්සා මධ්‍යස්ථාන වලට කාන්තාවන් රැගෙන ඒමේදී ත්‍රීරෝද රථ රියදුරන්ට සන්තෝෂම් මුදලක් ලැබේ.විශේෂයෙන් අනෙක් ගබ්සා මධ්‍යස්ථානයෙන් සූක්ෂම ලෙස හරවා ගෙන ගනුදෙනු කරුවකු රැගෙන ආවොත් සන්තෝෂම් මුදල වැඩිය.මේ නිසා මේ පිරිස් අතර නිතර ගැටුම් හට ගැනීමද බොහෝ සාමාන්‍ය තත්වයකි.

ඇතැම් සුදුසුකම් ලත් වෛද්‍යවරුන් ද තමා ලගට පැමිණෙන කාන්තාවකට ගබ්සාවක් නොකරම බැරි අවස්ථාවක් යෙදුණොත්, එය අපේ රටේ නීතියට එකග නැත්නම් මානුෂීය හේතූන් මත සලකා රහසේම මෙවැනි ස්ථානවලට එම කතුන් යොමු කරන්නේ වෙන කරන්නට දෙයක් නැති තැනය.මේ අනුව එම වෛද්‍යවරුන්ට මුදල් ත්‍යාග, වර්ෂාවසානයේ තෑගි භාණ්ඩ වැනි දෑ ගබ්සා මධ්‍යාස්ථාන පවත්වා හෙන යන්නවුන් වෙතින් හිමි වෙයි.

කෙසේ වුවද අපේ රටේ ගබ්සා සිදු වන ප්‍රමාණය අනුව අවිවාහක කතුනට වඩා විවාහක කතුන්ගේ එය වැඩි බව සංඛ්‍යාලේඛන මගින් පැහැදිලිවේ.අවිවාහක කතුන්ට වඩා විවාහක කතුන්ගේ ගබ්සා කිරීම් වැඩි වීමට හේතු කීපයක්ම තිබේ.

විශේෂයෙන් මැදි වයසට එනවිට ඔවුන් කායික එක් වීම් සිදු වන වාර ගණන අඩුය.එවිට අනපේක්ෂිත ගැබ් ගැනීම් සිදුවීමට ඉඩ තිබේ.

එසේම වයස 40 ඉක්ම වූ කතුන් උපත් පාලන ක්‍රම ගැන දක්වන්නේ ද අඩු උනන්දුවකි.මේ නිසා ද අනපේක්ෂිත ගැබ් ගැනීම් ඇති විය හැකිය.

දරුවන් ලැබෙන වයසේ සිටින තරුණ කාන්තාවන් අනපේක්ෂිත ලෙස ගැබ් ගැනීමට බලපාන වෙනත් හේතු තිබේ.

දරුවකු බිහි කළ පසු බොහෝ කාන්තාවන්ට නැවත ඔසප් සෑදීම මාස කිහිපයක්ම ප්‍රමාද විය හැකිය.මේ නිසා බොහෝ කාන්තාවෝ උපත් පාලන ක්‍රමයක් අනුගමනය කරන්නට ඔසප් සෑදෙන තුරුම බලා සිටිති.නමුත් ඔසප් නොසෑදුනාට එම කාලයේ ගැබ් ගැනීමේ හැකියාව නැතිවී යන්නේ නැත.එක්වීම අනාරක්ෂිත නම් නිසැක වශයෙන්ම ගැබක් හට ගැනීමට අවකාශ තිබේ.

අලුත උපන් බිළිදකු මව් කිරි බොන විටද දරු ගැබක් හට ගැනීම වළකින බවට මතයක් තිබේ.මේ මතයෙහි සත්‍යතාවය පවතින්නේ යම් දුරකටය.එනම් දරුවාගේ වයස මාස එකහමාරක් පමණ වනතුරු මේ ආරක්ෂාව තිබේ.ඉන් එහාට ඉබේ උපත් පාලනය වීමේ හැකියාවක් නොමැත.මේ පිලිබද නොදැනීම නිසාද කාන්තාවන් යළිත් ඉක්මණින් ගැබ් ගැනීම සිදු වෙයි.

දරුවා ලැබී මාස 3-4 කින් ඩිපෝප්‍රොවේරා එන්නත ලබා ගන්නට එන සමහර මවුවරුන් එම කාලයේ අනාරක්ෂිත ලිංගික සම්බන්ධතා පවත්වා තිබූ අයයි.නමුත් වැඩි දෙනෙක් ඒ බව වෛද්‍යවරයාට පවසන්නේ නැත.මේ නිසා එන්නත් විද ගත්තත් සමහරුන් ඒ වන විටත් ගැබ් ගෙන හමාරය.ඉන්පසු ඔසප් නොසෑදෙන විට එය ලගදී දරුවකු ප්‍රසූත කල නිසා සිදු වන්නක්ද නැතහොත් ගැබ් ගෙන දැයි වෛද්‍යවරයාට වුව කිව නොහැකි වෙයි.එම කාන්තාවගේ මුත්‍රා සාම්පලයක් පරීක්ෂා කළොත් ගැබ් ගෙන ඇති, නැති බව අනාවරණය කර ගත හැකිය.

ගබ්සාවක් කර ගැනීමට එන විවාහක කතුන් අතරින් අනෙකුත් කොටස වන්නේ අනියම් සම්බන්ධතා නිසා ගැබ්ගත් අයයි.

ගබ්සාව නීති විරෝධී වුවද රට පුරා හොර රහසේ පවත්වා ගෙන යන ගබ්සා මධ්‍යස්ථානවල සංඛ්‍යාව ඉහළ යාමක් මිස පහළ බැසීමක් නැත.නීතිය කරවන ඇතැම් නිලධාරීන් තුළ පවත්නා දුර්වලතා හේතුවෙන් මේ මධ්‍යස්ථානද යහතින් වැජඹෙයි.නමුත් මේ සමහර ගබ්සා මධ්‍යස්ථාන මස් කඩවලට දෙවෙනි නැත.

පොලොන්නරුව ප්‍රදේශයේ පදිංචි කාන්තාවක් වරක් අප රෝහල වෙත පැමිණ තිබුණේ ඉතාම අසාධ්‍ය තත්වයෙනි.සෙප්ටිසීමියා රෝගයේ කම්පන තත්වය දක්වාම වර්ධනය වී තිබූ ඇය සිටියේ අසාධ්‍ය තත්වයේය.දින 12ක් දැඩි සත්කාර ඒකකයේ තබා ගෙන ප්‍රතිකාර කිරීමෙන් පසු ඇගේ තත්වය යහපත් අතට හැරිනි.ඇගෙන් කට උත්තරයක් ගන්නට ලැබුනේත් ඉන්පසුවය.

මේ කාන්තාව එක් දරු මවකි.දරුවාගේ වයස අවුරුදු එකහමාරක්වත් නැත.ඒ අතර ඇය අනපේක්ෂිත ලෙස යළි ගැබ් ගෙන තිබේ.ඇගේ ඥාති සොයුරියක් කටුනායක නිදහස් වෙළෙද කලාපයේ රැකියාව කරයි.මේ කාන්තාවගේ දරු ගැබ නැති කර ගන්නට උපදෙස් දුන්නේ එම ඥාති සොයුරියයි.ඒ අනුව ඇය තම බෝඩිමට මේ කාන්තාව ගෙන්වා ගෙන එම ප්‍රදේශයේ පිහිටි ගබ්සා මධ්‍යස්ථානයකට එක්කරගෙන ගොස් තිබුනි.ඉන්පසු ගබ්සාව සිදු කරන අතර ඇයට ප්‍රතිජීවක ඔසු ද ලබා දෙන ලදී.නමුත් දින කිහිපයකින් වෙව්ලමින් උණ ගැනීම හේතු කොටගෙන යළි ඇය ඒ තැනැත්තා වෙතම ගියාය.එහිදී ඔහු ඉන්ජෙක්ෂන් එකක් ලබා දී යළි ප්‍රතිජීවක ද දී තිබිණි.

එහෙත් තත්වය එන්න එන්නම නරක අතට හැරීම නිසා සුවයක් නම් තිබුණේ නැත.ඇය සිහි මද තත්වයට පත් වූ අතර කෙටි හුස්ම ගැනීම, ඇග සුදු මැලි වීම, සිහින් දහඩිය දැමීම වැනි ලක්ෂණ ද පල කළාය.මේ නිසා බියට පත් ඥාති සොහොයුරිය වහාම ඇය රෝහල් ගත කරන ලදී.මේ කාන්තාව සිටියේ සෙප්ටිසීමියා කම්පන තත්වයට ආසන්නවය.ඊට හේතුව ගබ්සා කිරීමේදී කළලයේ කොටස් ඉතිරි වී තිබීමය.ඒවා පැසවා ඇයට සෙප්ටිසීමියා තත්වය වැළදී තිබිණි.රෝහලේ දැඩි සත්කාර ඒකකයේ තබාගෙන දින 12ක් ප්‍රතිකාර ලබා දීමට තරම් අසාධ්‍ය තත්වයක හිදීමෙන් එම ගබ්සාවේ බරපතලකම වටහා ගැනීමට හැකි වේයැයි සිතමු.ඒ කාන්තාව ඒ අයුරින් හෝ එම මොහොතේ මරණයෙන් මිදුණාය.එසේ වුවද මෙබදු අනාරක්ෂිත ගබ්සාවන් නිසා දිවි තොර වන කතුන්ගේ ප්‍රමාණය සුලුපටු නැත.නමුත් නීති විරෝධී ගබ්සා මධ්‍යස්ථාන එදා මෙන්ම අදත් සුවසේ වැරඹෙයි.හෙටත් එය එසේම වනු ඇත.

"සුසිල් ප්‍රේමරත්න" මහතා දැයෙන් සමු ගනියි

2010-02-12T00:23:00.000+05:30

සුසිල් ප්‍රේමරත්න මහතා ඊයේ අභවප්‍රාප්ත විය.

රීටා ජෙනිවිව් ප්‍රනාන්දු යන නමින් උප්පැන්නයේ සඳහන් ලතා වල්පොලට එනම ප්‍රදානය කලේත් සුසිල් ප්‍රේමරත්න මහතා විසින්ය.

සුසිල් ප්‍රේමරත්න මහතානෙනි, ඔබට නිවන් සුව ලැබේවා!!!!!

සුසිල් ප්‍රේමරත්න මහතා ගැයූ ගීත මෙතනින් අසන්න.

"රන් වන් කරලින් සැදිලා
සැදිලා වෙල් යායම පැසිලා
පැසිලා කමණී සිරියා රමණී
කමණී සිනහ පාලා

මින්නේරිය ගොවි ජනපදයේ
සංගීතය මදනළ මුසුවේ
සිරි සිරි තාලෙන් ඉමිහිරි නදමින්
පැතිරේ පැතිරේ
මෙහි දස අත පැතිරේ

මල් මාලය සිරි ලකඟනගේ
මින්නේරිය වැව ළඟ සැදුනේ
සමනළ ගමනින් සැරසෙන විලසින්
සුදිලේ සුදිලේ
වෙල් යායම සුදිලේ"

බංග්ලාදේශ මැතිවරණ ක්‍රමය

2010-01-29T11:13:00.000+05:30

පහුගිය දවස්වල ලංකාවෙ පැවැත්වුනු ජනාධිපතිවරණය ඉවර වෙච්ච නිසා ඊට හාත්පසින්ම වෙනස් ආකාරයට පවත්වන බංග්ලාදේශ මැතිවරණ ක්‍රමය ගැන කියන්නයි මේ යන්නෙ.

අපේ රටේ විධායක බලතල සහිත ජනාධිපතිවරයෙක් හිටියට බංග්ලාදේශයෙ ඉන්නෙ විධායක බලතල නැති නාමික ජනාධිපතිවරයෙක්.මොහුට අයත් රාජකාරිය වන්නෙ වෙනත් රටක රාජ්‍ය නායකයෙක් පැමිණි විට ඔහුව පිළිගැනීම, පාර්ලිමේන්තුව විසුරුවා හැරීම වැනි ඉතාමත් සීමිත රජකාරියක් පමණයි.හරියට ඉන්දියාවේ සිටින ජනාධිපතිවරයාට සමානයි.නමුත් ඔහු කිසි දිනෙක දේශපාලන කටයුතුවල නිරත නො වූ, උගත් පුද්ගලයෙකුයි මේ සදහා ඔවුන් තෝරා ගන්නෙ.බොහෝ විට ජනාධිපතිවරයා ලෙස පත් වන්නේ විශ්ව විද්‍යාලයක උපකුලපතිවරයෙකු වැනි උගත් පුද්ගලයෙකුයි.

දැන් බලමු විධායක බලතල සහිත අගමැතිවරයා තෝරා ගන්නා ආකාරය.අගමැතිවරයා ඇතුලු පාර්ලිමේන්තු මන්ත්‍රීවරුන් තෝරා ගන්නෙ කොට්ඨාශ මට්ටමින් පැවැත්වෙන පාර්ලිමේන්තු මැතිවරණයකින්.මෙම මන්ත්‍රීවරුන්ගෙන් අනිවාර්යයෙන් 30% කට වඩා වැඩි පිරිසක් කාන්තාවන් විය යුතුයි.එසේ 30%ක් හෝ කාන්තාවන් මන්ත්‍රීවරුන් ලෙස තේරී පත් නොවුනහොත් එය වලංගු මැතිවරණයක් ලෙස පිළිගන්නේ නැහැ.

දැන් බලමු පාර්ලිමේන්තු මැතිවරණය පවත්වන ආකාරය.වසර 4ක පාර්ලිමේන්තු කාලය අවසන් වීමත් එක්කම ජනාධිපතිවරයා විසින් පාර්ලිමේන්තුව විසුරුවා හරිනු ලබනවා.ඉන්පසු රට පාලනය කිරීම ව්‍යවස්ථානුකූලව බාර දෙනු ලබන්නේ ප්‍රධාන උපදේශකවරයෙකු හටයි.මොහු කිසිම දේශපාලන පක්ෂයකට අයත් නොවන පුද්ගලයෙක්.පාර්ලිමේන්තු මැතිවරණය පැවැත්වෙන තෙක් රට පාලනය කරනු ලබන්නේ මොහු විසින්.එමෙන්ම මොහුට රට පාලනය කිරීම සදහා බොහෝ දුරට යුධ හමුදාවේ සහාය ලබා ගනු ලබනව.ඒ නිසා පාර්ලිමේන්තු මැතිවරණය පැවැත්වෙන තෙක් කාලය තුළ බංග්ලාදේශයේ පවතින්නේ හමුදාමය රජයක් කිව්වත් වැරැද්දක් නැහැ.

දැන් බලමු පාර්ලිමේන්තු මැතිවරණ ක්‍රමයේ තිබෙන විශේෂත්වය.පසුගිය පාර්ලිමේතුවේ සිටි මන්ත්‍රීවරුන් කල දූෂණ, අක්‍රමිතා පිලිබද සොයා බලා දඩුවම් පැමිනවීම මේ කාලය තුලදී සිදු කරනු ලබනව.මෙයට හොදම උදාහරණය තමයි පසුගිය පාර්ලිමේන්තුවේ සිටි අගමැතිනියටත්, විපක්ෂ නායිකාවටත් ඔවුන් කල දූෂණ, අක්‍රමිතාවලට දඩුවම් වශයෙන් ඔවුන්ට සිර ගත වීමට සිදු වීම.එමෙන්ම එම පාර්ලිමේන්තුවේ සිටි ඇමතිවරුන්, මන්ත්‍රීවරුන් ඇතුලු විශාල පිරිසක් තවමත් සිර දඩුවම් ලැබීම.සමහරුන්ට "ෂරීයා නීතියට" අනුව මරණීය දණ්ඩනය, අත් පා කපා දැමීම වැනි දඩුවම්ද ලැබී තිබෙනව.මේ නිසා බංග්ලාදේශය තුල සිටින දේශපාලඥයන්, ලංකාවේ දේශපාලඥයන් මෙන් නොව බොහෝ දුරට දූෂණ චෝදනාවලට ලක් නොවූවන් වීම විශේෂ ලක්ෂනයක්.

බංග්ලාදේශයේ ඡන්ද රැස්වීමක් පවත්වන ආකාරය.

බංග්ලාදේශයේ ඡන්ද දිනෙක ඡායාරූප කීපයක්.

බංග්ලාදේශයේ ඡන්ද පෝස්ටරයක ඡායාරූපයක්.

(බංග්ලාදේශයේ ඡන්ද රැස්වීමක් පවත්වන ආකාරය මා විසින් ගන්නා ලද ඡායාරූප 2ක් වන අතර, අනෙක්වා අන්තර්ජාලයෙන් ගන්නා ලදී.)

ඇත්තම "මචන්ල" සෙට් එක

2009-12-17T16:27:00.000+05:30

මම හිතන්නෙ සිංහල බ්ලොග් ලියන, කියවන හැම දෙනෙක්ම වගේ "මචන්" චිත්‍රපටිය එක පාරක්වත් බලල ඇති කියල.මම නම් 4 පාරක්ම බැලුව.ඊට පස්සෙ download කර ගෙනත් කීප වතාවක්ම බැලුව.

මේ කියන්න යන්නෙ හැබැයි "මචන්" චිත්‍රපටිය ගැන නෙමෙයි."මචන්" චිත්‍රපටියෙ කතාවට පසුබිම සපයපු ඇත්තම handball team එකේ වීඩියෝ කීපයක් ගැන.මේ වීඩියෝ ටික බැලුවම තේරෙයි ඇත්තම "මචන්ල" සෙට් එකයි, චිත්‍රපටියෙ "මචන්ල" සෙට් එකයි සෙල්ලම් කරපු විදිහෙ වෙනසක් නැහැ කියල.

ඒ වගේම තමයි "මචන්" චිත්‍රපටිය රූපගත කිරීමට ජර්මනියට ගිය නලුවන්ගෙන් පොලිස් නිළධාරියෙකුට රග පෑ නලුවෙකුත් ඉතාලියට පැන්න එකේ මේ කට්ටිය ජර්මනියෙන් පැන ගත්ත එක ගැන පුදුම වෙන්න දේකුත් නැහැ.

India Pakistan Wagah Attari Border

2009-12-15T23:52:00.000+05:30

පහුගිය දවස්වල මට ඉන්දියාවට යන්න ලැබුන.ඉන්දියාවට ලංකාවෙ අය යන්නෙ එක්කො වන්දනාවෙ, නැත්නම් සාප්පු සවාරිනෙ.මම ගියෙ ඔය දෙකටම නොවෙන නිසා මම ගියා බලන්න ඉන්දු-පාකිස්තාන් දේශ සීමාව විවෘත කරනව හා නැවත දේශ සීමාව වසන ආකාරය බලන්න.

ලෝකෙ වැඩිම ආරක්ෂාවක් යොදවල තියෙන දේශ සීමාව කියල කියන්නෙ මේ ඉන්දු-පාකිස්තාන් දේශ සීමාවට.දේශ සීමාව විවෘත කරනව බලන්න රටවල් දෙකේම විශාල පිරිසක් ඇවිත් හිටිය.දේශ සීමාව විවෘත කරන වෙලාවටයි, ආපහු දේශ සීමාව වහන වෙලාවටයි එතන ඉන්න කොට අමුතු හැගීමක් එන්නෙ.ඒක වචන වලින් නම් කියන්න බැහැ.ඒ වගේම තමා මේ රටවල් දෙක අතර ගමන් කිරීමට තියෙන එකම නීත්‍යානුකූල දොරටුවත් මේක විතරයි.

දේශ සීමාව විවෘත කරන විටයි, වසන විටයි වීඩියෝ කරන්න මට ලැබුනෙ නැහැ.කැමරාවක් ලග තිබුනත් ඒ වෙලාවෙ මේක දැක ගන්න තිබ්බ ආසාව නිසා වීඩියෝ කර ගන්න බැරි වුනා.ඒ නිසා පල්ලෙහ දාල තියෙන්න YouTube එකේ තිබ්බ වීඩියෝ දෙකක්.

ගොඩක් අය ඉන්දියාවට ගියත් මේ වගේ දෙයක් බලන්න යන්නෙ නැහැ.ඒ නිසා ඉන්දියාවට හරි පාකිස්තානයට හරි ගියොත් දේශ සීමාව විවෘත කරන හා වසන ආකාරය බලන්න යන්නත් අමතක කරන්න එපා.

මේ තියෙන්නෙ දේශ සීමාව විවෘත කරන ආකාරය.

මේ තියෙන්නෙ දේශ සීමාව වසන කරන ආකාරය.

"සුදු සීයා" දැයෙන් සමු ගනියි

2009-11-11T14:20:00.000+05:30

හෙන්රි ජයසේන මහතා අද දින දකුණු කොළඹ ශික්ෂණ රෝහලේදී අභවප්‍රාප්ත විය.

1931 ජූලි 6 වන දින ගම්පහ බැන්ඩියමුල්ලේදී උපත ලැබූ හෙන්රි ජයසේන මහතා ගම්පහ ලෝරන්ස් විද්‍යාලයෙන් හා කොළඹ නාලන්දා විද්‍යාලයෙන් අධ්‍යාපනය ලැබීය.ගම්පෙරලියේ "පියල්", හුණුවටයේ කථාවේ "අසඩක්" හා දූ දරුවෝහි "සුදු සීයා" ඔහු නිරූපණය කල ප්‍රධාන චරිත විය.

මිනිසුන් වූ දරුවෝ(1965), කරළියක කතාවක්(1995), නිම්නැති කතාවක් 1(1996), නිම්නැති කතාවක් 2(1996) හා ලාසරස්(1999) ඔහු රචනා කල නවකතා වෙයි.

ජනේලය(1964), කුවේනි(1964), තවත් උදෑසනක්(1964), හුණුවටයේ කතාව(පරිවර්තනය-1967), අපට පුතේ මහක් නැතේ(1968), දිරිය මව හා ඇගේ දරුවෝ(පරිවර්තනය-1972), මකරා(පරිවර්තනය-1972), දෙව් ලොව ගිය ශිෂ්‍ය භටයෝ(1991) ඔහු නිර්මාණය කල නාට්‍ය නිර්මාණ වෙයි.

හිතට හිතෙන කවි සින්දු(1972) හා කතන්දරේ හැංගිලා(1979) ඔහු රචනා කල ළමා සාහිත්‍ය ග්‍රන්ථ වෙයි.

ගැහැනු ගැට(1959), ශ්‍රී 296(1959), ගම්පෙරලිය(1963), වෙන ස්වර්ගයක් කුමටද(1963), සුහද සොහොයුරෝ(1963), හෙට ප්‍රමාද වැඩි(1964), දහසක් සිතුවිලි(1968), හන්සවිලක්(1980), බැද්දෙගම(1981), සොල්දාදු උන්නැහේ(1981), කලියුගය(1983), අම්මයි දුවයි(1984), සදකඩ පහන(1988) හෙන්රි ජයසේන මහතා රගපෑ චිත්‍රපටි වෙයි.

හෙන්රි ජයසේන මහතානෙනි, ඔබට නිවන් සුව ලැබේවා!!!!!

"සාතන් පලවා හැරීමට ජේසුස් කැදවීම"

2009-11-09T23:16:00.000+05:30

මේ තියෙන්නෙ යාඤාවෙන් ලෙඩ සුව කිරීම ගැන සදහන් වීඩියෝ කීපයක්.තොරතුරු හොයා ගත්තෙ Gossip Lanka වල මෙන්න මෙතනින්.

පහුගිය දවස්වල මියගිය කාන්තාවන් දෙදෙනාත් මිය යන්න ඇත්තෙ මේ ආකාරයෙන් වෙන්න ඇති.මේක දැක්කම හිනත් යනව, මිනිස්සු මේ තරම් මෝඩ ද කියල හිතිල.ඒ වගේම හිතට දුකකුත් එනව, බයිබලේවත් නැති විදිහට ආගම් ප්‍රචාරනය කරන්න මේ වගේ වැඩ කරනව දැක්කම.

මේ වගේ වැඩ වලට බෞද්ධ භික්ෂූන් වහන්සේලාගේත් ආශිර්වාදය ලැබෙන බව පහත පිංතූරෙන් පේනව.(ඡායාරූපය ලබා ගත්තේ Gossip Lanka වෙතින්.)ඒ වගේම තමා මානෙල් වානගුරුත් මේ යාඤාවලින් සුවය ලබා ගෙන තියෙන බව තව වීඩියෝ එකක තියෙනව.මේවයෙ ඇත්ත නැත්ත දන්නෙ මේව කරන අයම තමයි.

ප.ලි.-මමත් මේ දවස්වල හොදටම අසනීප වෙලා ඉන්නෙ.මටත් මේ වගේ short and sweet ක්‍රමේකින් සනීප වෙලා බලන්න ආසයි.ඒත් ඇදෙන් බැහැල ඔය වගේ තැනකට යන්න විදිහක් නැතුවයි ඉන්නෙ.

දුමට තිත ද? තිතට දුම ද?

2009-10-16T16:49:00.000+05:30

ලංකාවෙ දැන් ප්‍රසිද්ධ ස්ථානවල දුම් බීම තහනම් කියල නීතියක් තිබුනට තාමත් නිදහසේ දුම් බොන්නන් ඕන තරම් දකින්න ඉන්නව.බස් රථවල දුම් බීම තහනම් කියල දැන්වීම් ගහල තිබ්බට බොහෝ වේලාවට කොන්දොස්තර හා රියදුරු බස් රථය ධාවනය කරද්දි දුම් පානය කරනව.

කියන්න ගියෙ බස් රථවල දුම් බීම ගැන නෙමේ.දැන් උතුරු දුම්රිය මාර්ගය ප්‍රතිසංස්කරණය කරනවනෙ.ඉතින් ඒකට විවිධ දුම්රිය ස්ථාන ප්‍රතිසංස්කරණය කරන්න විවිධ ආයතනවලට ලබා දීල තියෙනව.ඉතින් කිලිනොච්චිය දුම්රිය ස්ථානය ප්‍රතිසංස්කරණය කරන්න "මතට තිත" තියපු රජයෙන් ලබා දීල තියෙන්නෙ "ලංකා දුම්කොළ සමාගමට".මේ ගැන විස්තර මෙතනින් බලා ගන්න පුලුවන්.

දුම්කොළ සමාගමත් මේකට ආයෝජනය කරන්නෙ පිං තකා නෙමේනෙ.දුම්රිය ස්ථානය ප්‍රතිසංස්කරණය කරන ගමන්ම එහි වැඩ කරන සේවකයන්ටයි, ඒ අවට සිටින ජනතාවටයි නොමිලේ දුම් වැටි දීල දුම් බීමට කොහොම හරි පුරුදු කර ගනීවි.ඉස්සර යුධ හමුදාවෙ සේවය කරපු සොල්දාදුවන්ට නොමිලේ දුම් වැටිත් දුන්නෙ මේ සමාගමමනෙ.ඒ දවස්වල සොල්දාදුවන්ට දාව ලැබෙන දරුවන්ගෙ අඩුවකුත් දකින්නට ලැබුන කියල අහල තියෙනව.

දුම් වැටි විකුනල හම්බ වෙච්ච සල්ලි වලින් ලැබිච්ච ක්‍රිකට් ලෝක කුසලානෙකුත් තියෙන රටේ දුම් වැටි තහනම නියමාකාරයෙන් කෙරෙයි කියල නම් හිතන්න අමාරුයි.අඩු ගානෙ දුම් වැටි භාවිතය නවත්වන්න සකස් කරපු වෙලෙද දැන්වීමක් වත් කිසිම රූපවාහිනී නාලිකාවක යන්නෙ නැහැනෙ.සමහර වෙලාවට එහෙම සකස් කරපු දැන්වීමක් දැම්ම වුනත් ඒව ඉක්මනින්ම අයින් කර ගන්නත් දුම් වැටි සමාගම් දක්ෂයිනෙ.

මේ තියෙන්නෙ වෙනත් රටවල් කීපයක දුම් වැටි භාවිතය නවත්වන්න සකස් කරපු දැන්වීම් කීපයක්.

"වාසනා ලොවක්"

2009-10-15T15:03:00.000+05:30

අහල තියෙනව නේද "වාසනා ලොවක්" කියන සිංදුව.දුෂ්‍යන්ත් වීරමන් "Dancing Star" චිත්‍රපටියෙ ගායනා කලේ.ඒත් මේ සිංදුව මුලින්ම ගායනා කරල තියෙන්නෙ අපි කවුරුත් දන්න "ති.නා."ඒ කියන්නෙ තිස්ස නාගොඩවිතාන මහත්මයා.තිස්ස නාගොඩවිතාන මහත්මයා ගැන "සරසවිය" පුවත් පතේ පල වෙච්ච ලිපියකයි මේ ගැන තිබ්බෙ.තිස්ස නාගොඩවිතාන මහත්මයගෙ මුල් ගීතය මෙතනින් අහන්න පුලුවන්.දුෂ්‍යන්ත් කියපු ගීතය බා ගත කරන්න මෙතනට යන්න.

පරණ ගීත නව පරපුරේ ගායකයින් ගායනා කරල මුල් ගීතය විනාශ කරනව කිව්වට මට නම් දුෂ්‍යන්ත්ගෙ මේ ගීතයෙ ගායනය ගැන වරදක් කියන්න බැහැ.අඩු ගානෙ මේ ගීතය මෙහෙම හරි අහන්න ලැබුනෙ දුෂ්‍යන්ත්ගෙ ගායනය නිසා.නැත්නම් මේ ගීතය කවුරුත් නොදැනම තියේවි.

මේ තියෙන්නෙ "Dancing Star" චිත්‍රපටියෙ "වාසනා ලොවක්" ගීතය තියෙන ජවනිකාව.

මේකත් අහල බලන්න.මේ වීඩියේ එකේ "ති.නා." ගැන සදහන් වෙලා තියෙනව.

අහෝ "තුෂාරා"

2009-10-14T14:50:00.000+05:30

අද ගිහින් බැලුව නැවත නිෂ්පාදනය කරල තියෙන "තුෂාරා" චිත්‍රපටිය.ඇත්තම කියනවනම් යසපාලිත නානායක්කාර මහත්මය නිර්මාණය කරපු "තුෂාරා" චිත්‍රපටිය ලගින්වත් තියන්න බැහැ අලුත් චිත්‍රපටිය.

මීට කලින් පරණ චිත්‍රපටිය බලල තිබ්බ නිසා චිත්‍රපටි දෙකේ වෙනස හොදට තේරුන.මීට කලිනුත් මේ විදිහටම නැවත නිෂ්පාදනය කරපු "හතර දෙනාම සූරයෝ" චිත්‍රපටියෙයි, "තුෂාරා" චිත්‍රපටියේ කිසිම වෙනසක් නැහැ.දෙබස්, පසුතල ආදිය බොහෝ දුරට පරණ චිත්‍රපටියෙ ආකාරයටම යොදා ගෙන තියෙනව.වෙනසකට තියෙන්නෙ පරන කලු, සුදු චිත්‍රපටිය වෙනුවට මෙදා වර්ණ චිත්‍රපටියක් වීමත්, විජය කුමාරතුංග නම් සිංහල සිනමාවේ ජනප්‍රිය නලුවා වෙනුවට සාලිය සත්‍යජිත්වත්, මාලිනී ෆොන්සේකා වෙනුවට ශාලිකා එදිරිසිංහවත් යොදා ගැනීමයි.එදා සෝනියා රග පෑ චරිතය මෙදා රගපාන්නෙ පියුමි පුරසිංහයි.සෝනියා මෙම නව නිෂ්පාදනයේ සාලියගේ මව ලෙස කුඩා චරිතයක් රග පායි. තව වෙනසකට තියෙන්නෙ අලුත් ඇදුම්, පැලදුම් යොදා ගෙන තිබීමත්, පියුමි පුරසිංහගෙ ලස්සන කකුල් දෙක පුන පුනා පෙන්වීමත්ය. නව නිෂ්පාදනයෙ තියෙන, පරණ චිත්‍රපටියෙ නැති තවත් විශේෂ දෙයකට තියෙන්න ජංගම දුරකතන භාවිතයත්, sms පණිවිඩ යැවීමත්ය.

"තුෂාරා" චිත්‍රපටියෙහි තිබු සියලුම ගීත නව සංගීතය යොදා මෙහිදී යොදා ගෙන තියෙනව.ජෝතිපාල මහතා, ඇන්ජලීන් ගුණතිලක මහත්මිය හා සුජාතා අත්තනායක මහත්මිය මෙහි ගීත ගායනා කර තිබෙනව.

අන්තිමට කියන්න තියෙන්නෙ පරණ සිංහල චිත්‍රපටි නැවත නිෂ්පාදනය කරන්න කලින් අපේ අධ්‍යක්ෂකවරුන්ට ඉන්දියාවෙ කරපු "Don" චිත්‍රපටියෙ නව නිෂ්පාදනය හා පැරණි චිත්‍රපටියවත් බලල ඒකෙන් දෙයක් ඉගෙන ගන්න කියලයි.

"තුෂාරා" පැරණි චිත්‍රපටියෙ ගීත කිහිපයක්.

"තුෂාරා" නව නිෂ්පාදනයේ trailer එක.

මම ගත්තු පොත්

2009-09-28T18:54:00.000+05:30

මේ අවුරුද්දෙ ජාත්‍යන්තර පොත් ප්‍රදර්ෂනයෙන් ගත්තු පොත් ටික ගැනයි ලියන්න යන්නෙ.පොත් ගන්න දවස් දෙකක්ම ගියා.පටන් ගත්තු සෙනසුරාද සහ බදාදා තමයි ගියෙ.

සෙනසුරාද ගිහින් ගත්තු පොත් ටික තමයි මේ පිංතූර වල තියෙන්නෙ.

"අටවකපුත්තු" පොත ගත්තෙ "ගුණසේන" එකෙන්."පොදු පුරුෂයා" පොත ගත්තෙ "සරසවි" එකෙන්.මහාචාර්ය නන්දසේන රත්නපාල මහත්මයගෙ "ශ්‍රී ලංකාවේ යාචකයා" පොතයි එස්.බී. දිසානායක මහත්මයගෙ පොතයි ගත්තෙ "ආරිය ප්‍රකාෂකයෝ" වෙතින්."Database Management Systems" පොත ගත්තෙ Expographic එකෙන්.

මම කලෙක ඉදන් ඉස්ලාම් ආගම ගැන ඉංග්‍රීසියෙන් ලියවෙච්ච පොත් ටිකක් හොය හොයා හිටිය.ඒ නිසයි මේ පොත් ටික ගත්තෙ.පොත් ගත්තෙ "Islamic Book House" එකෙන්.ශුද්ධ වූ කුරාණයේ ඉංග්‍රීසි පිටපතකුත් ගන්න මට එතනින් පුලුවන් වුනා.

මගෙ ගාව තියෙන බයිබලය දැන් ගොඩක් පරණ නිසාත්, දිනපතා භාවිතයට අලුත් බයිබලයක් අවශ්‍ය නිසාත් අලුත් බයිබල් දෙකක්ම ගත්ත.මීට කලින් මම භාවිතා කලේ ඉංග්‍රීසි බයිබලයක්.ඒ නිසා මේ පාර සිංහලෙන් ලියවෙච්ච බයිබලයකුත් ගත්ත.ශුද්ධ වූ බයිබල් දෙක මිලදී ගත්තෙ "Catholic Book Depot" වලින්.

සිරිමාවෝ බණ්ඩාරණායක ප්‍රදර්ෂන මධ්‍යස්ථානයේ British Council පුස්ථකාල සාමාජිකත්වය රුපියල් 1400කට දෙනව.ඉතින් හිත හිතා ඉන්නෙ නැතුව British Council පුස්ථකාල සාමාජිකත්වයත් එදාම ගත්ත.

මේ තියෙන්නෙ බදාදා මිලදී ගත්තු පොත්.

මේ ඔක්කොම පොත් ගත්තෙ "Sarath Books" කියන bargain පොත් කඩෙන්.පොත් ඔක්කොටම ගියෙ රුපියල් 1500ක් විතර.

කොච්චර පොත් ගත්තත් හිතට නම් මදි.ගත්තු පොත් ටික කියවන්න වෙන්නෙත් නොවැම්බර් මාසෙ ඉදල.ඔක්තෝම්බර් 19-29 වෙනකම් විභාගෙ නිසා ගත්තු එක පොතක්වත් අතින් වත් අල්ලන්න වෙන්නෙ නැහැ.

මේ පාර රුපියල් 8000ක විතර පොත් ගත්ත.ඒත් අවුලක් නැහැ.මොකද Sir Francis Bacon කියල තියෙන්නෙ "Reading makes a full man" කියලනෙ.

අසභ්‍ය වෙබ් අඩවි තහනම සැබෑ ලෙසම ක්‍රියාත්මක වේද?

2009-09-07T23:47:00.000+05:30

මේක ගැන ගොඩක් දවස් ඉදන් ලියන්න හිතා ගෙන හිටියත් අද තමයි ලියන්න පුලුවන් වුනේ.මේ ගැන ගොඩක් බ්ලොග් සටහන් ලියවිලා තියෙනවත් දැක්ක.ඒත් තවමත් අපිට මෙවැනි වෙබ් අඩවි වලට proxy sites මාර්ගයෙන් කිසිම අවහිරයකින් තොරව යාමට ඕන තරම් පුලුවන් කමක් තියෙනව.ඒ වගේම මේවායේ ඇති වීඩියෝ දර්ෂන ආදියත් කිසිම අපහසුවකින් තොරව බා ගත කිරීමේ හැකියාවත් තවම තියෙනව.තවමත් මෙවැනි වෙබ් අඩවි වලට එන ලාංකිකයන්ගෙ අඩුවක් නැති බව මෙම වෙබ් අඩවි වල දක්වා ඇති ප්‍රතිචාර මගින් පෙනී යනව.

තමන්ගේ නිවසේ අන්තර්ජාල පහසුකම් ඇත්නම් මෙවැනි වෙබ් අඩවියක් එක් වරක් හෝ බැලූ අයෙක් නැති තරම්ය.නො බැලූ කෙනෙකු ඇත්නම් ඔහු හැගීම්, දැනීම් නැති මනුෂ්‍ය රොබෝවෙකු විය යුතුය.අසභ්‍ය වෙබ් අඩවි තහනම් කිරීමට කෑ ගැසූ අයත්, එය ක්‍රියාවේ යෙදවූ අයත් ඉද හිට හෝ මෙවැනි අඩවියකට ගොස් ඇතුවාට සැකයක් නැත.එනිසා රජය කල යුත්තේ මෙවැනි අසභ්‍ය වෙබ් අඩවි තහනම් කිරීම නොව කැමති අයට මේවා බැලීමටත්, අකමැති අය තමන් විසින්ම පනවා ගත් ස්වයං වාරණයක් මගින් මේවා නො බලා සිටීමත්ය.